Nunei Reantenangfo1
1Na reantenang parifo mani, arahio Allai niari rorafaisi tuti nunei.Nunei reantenangfo2Nunei kehabi tuti tami kaharai tuti mamantitifoi tebung wedua rawanang kehabifoi sentenang. Tuti Allai Nuaninufoi da towana toninai na mereha nuwowongfo.3Allai medu deyo, “Sambewaraifa!” Ainanaya sambewarafo kaririaia.4Allai firaise weo deti sambewarai nanai mahikai, ampefe kiatate sambewarafo weru mamantitifo.5Tuti Allai sahu sambewarai nani we rahida, tuti mamantitifo we diru. Dirufoi da wa, mayeai ahafoi yiwangni aha. Nana mani rahida bo reantenangfoi dinani.6Mayeai Allai medu aha deyo, “Katai kehabi bei dariai we biau merehafoi we boru.”7Ampefe Allai niari katai kehabi nani we kiatate mereha na yaifoi weru mereha bo kofafoi. Ampefe we tarai kaririai.8Ainanaya Allai sahu katai kehabi nani we rora. Dirufoi da wa tuti ahafoi yiwangni aha, nana mani rahida bo borufoi dinani.9Mayeai Allai medu aha deyo, “Mereha na rora amawawanei, fianduhi na katai bei, ambori katai sarahiai feai kawariai.” Tuti finanai kaririai.10Ainanaya Allai sahu katai sarahiafo we rei, tuti katai mereha fianduhi naifoi we rawanang. Allai firaise weo deti finanai mahikai fefe.11Ampefe Allai medu aha deyo, “Kahofane wau tifu fio tetifu bongnei kiai, fi sifuo webong tuti wekamamieifoi, ambori kamieifoi sifu kaririai aha.” Tuti finanai kaririai.12Ampefe kahofafoi tifu fio tetifu bongnei kiai, amani ne wekamamieifoi tuti ai bongnei kiai webong tuti wekamamieifoi sifu kaririai aha. Allai firaise weo deti finanai mahikai fefe.13Dirufoi da wa, mayeai ahafoi yiwangnia aha, nana mani rahida botorufoi dinani.14Ainanaya Allai medu aha deyo, “Fi danggararu feai dariai na roranei we kiatate dirufoi weru rahidafoi, kontai we deinawi kariri ne diruneungfo, ne rahidafo tuti defuinafo,15tuti fi danggararu nanai we sambewa nunei.” Tuti finanai kaririai.16Mayeai Allai niari fi danggararu fuba boru, amani wofoi we sambewarai na rahidafo, tuti embaifoi we sambewarai na dirufo. Tuti niari awahafo kontai.17Fi danggararu nanai Allai dohongnai nayai na rorafaisi we sambewarai to nunei,18we sambewa dirufoi tuti rahidafoi, we kiatate mamantitifo weru sambewarafo. Allai firaise weo deti finanai mahikai fefe.19Ainanaya dirufoi da wa, ahafoi yiwangni aha, nana mani rahida bo boafoi dinani.20Mayeai Allai medu aha deyo, “Na mereha rorongfo dariai fidarangnei kiai, tuti na roranei romufoi siafo.”21Ampefe Allai niari ansurang bebafoi na rawanang kehabifoi, tuti fi darang urengnei kiai na mereha rorongfo, tuti romunei kiai. Allai firaise weo detio finanai kai mahikai fefe.22Ainanaya Allai mioang fi niari nanai kai, tuti medu deyo, “We ansurangrausi metawing separai bitoya we mesefa mereha rorongfo, tuti romune mea na nunei metawing separai bitoya kontai.”Romu etawing separai23Dirufoi da wa, mayeai ahafoi yiwangni aha, nana mani rahida bo ringfoi dinani.24Ainanaya Allai medu aha deyo, “Fi darang urengnei kiai dariai na nunei, amani andowafoi kiai na rei reisi, mano terirafoi, andowa mano ahumifoi tuti mano fiafa na arongfoi.” Tuti finanai kaririai.25Ampefe Allai niari maino fi darang urengnei kiai, tuti Firaise weo detioai we fi niari nanai mahikai fefe.26Ainanaya Allai medu aha deyo, “Tonari inontarainesa enetarai toyari Totoru, ambori ewemambiriu sau diangfosa kiai, romufosa kiai, tuti andowafosa kiai na nunei.”27Ampefe Allai niari inontarainesa enetarai kariri mantauni. Niari mangfosa tuti wiwingfosa.28Ainanaya Allai medu we suru deyo, “Imoang muru ambori murawing separaia bitoya ambori mune ririanei sefa nunei. Tuti mewemambiriu we meru nunei, mewemambiriu we diangfosa na mereha rorongfo tuti romufosa na rorafoi tuti andowafoi kiai na reirei.”29Mayeai Allai medu aha deyo, “Boti! Yohongno fi tifuo wekamamieifoi tuti we bongfoi kiai we fiang we mea.30Wape we andowafoi kiai tuti romufoi kiai, Yohongno ninoifo tuti fi tifuo we reraungfoi kiai we fiang wesa.” Tuti finanai kaririai.31Allai firaise paria, weo detioai we fi kiaio niariri nani mehikai. Ainanaya dirufoi da wa, tuti ahafoi yiwangni aha, nana mani rahida wonangfoi dinani.
The Seed Company