Osayi ko Oyohana9
1Kweyi oyoleho ko omeho ta ajigwo nu. Nmi inyiwo oye gbo okpagye, kweyi adano oba ko gwogo ni gbomeyi lo ni.2Inyiwo gwogo oni, kweyi iwola bose bwanu, lebyi iwola ko ola ni ya kye mla-mla; iwola ko ogo mani yo oyoyu ke eno kpo owu dibu.3Awihima bose bwipu ki iwola wese, adawo oshu ko sase byena.4Aka dawa mo anaka ya akyashi kwe efu kpa ashini koza ni ba bwu ni ojije lo; awase ni ke gbo oyi ko Owuso ogo wa lo ni kin pini aba yuwofo la.5Ada awihima mani oshu ko ngmase lo, ake ba dase owe kin la koya eho. Owe ni aba dase ni ya duwose byo osose kena.6Ipu koya eho mani, aba labo kikwu, ake bapye lo; aba yimu ko gekwu, ikwu ke ya ngmuwa lo.7Awihima mani lebya awonya ni wiyiwashu ko gefu kpokpo ni; ikweyi wa gbo oje lebyo otu ko ozinariya, ahiyiwa lebya akasuse.8Inyeyi wa lebyi inyeyi kanya, ahanu wa lebya ahanu ka abaga.9Awihima mani koje ni lebyo oshiye kogye otuwa, eya kakya wa lebye eya ko ozakobiyo ni onya nwashika pyi kpe enya ba gokwunu kefu ni.10Agbewa kweyi ba sase byena ni, agboshu ko sase kpe ewa koya eho.11Awihima mani gbo ose ni ya kpuwa ogwu ni, anu wo oyoleho ni woteyi ko ogo ni gbomeyi lo ni. Iyenu ipu ki igbenu ko Ibru wo, Abadon; ipu ki igbenu ko Ogirik wo Apoliyon (asenu wo <<Ino ngmase.>>)12Ebi kikyikyo shigbo; itikpi ko mani, ebi epa ki bawa.13Ebeni oyoleho ko omwihiri ta ajigwo nu. Npwoko bwo agbabo ene ko okpe ko ozinariya ni hagye obutu ko Owuso ni.14Oko mani kela do oyoleho ko omwihiri mo, <<Sha ayoleho ene ni ayuwa gbo ishu nyakwu ki Ifretus ni bita!>>15Ake sha ayoleho ene mani bita; ayuwa shagye ba gbeyi kishi mani, eno mani, oya mani kpi ishayi mani koga ngmo okwu oye ipu ke eta kase kese mani kpiri.16Akewa kadakare mani dami: awi ikpokyo ogbogbo epa.17Ipu ko oza ni asayi dami ni, nma awonya kpa awino suwa: agbo oshiye kogye nowa botu wa byo ola, awinyi ketu ni kwu neneshi byo okpo ni gba akwekye, winyi kayi bye ehola. Ikweyi ka awonya mani lebyikweyi ka abaga, kweyi ola, iwola kpe ehola ba bose okwunu wa.18Awebi eta mani yo okwu oye ipu ke eta ka asuse yi ngmo: ola, iwola kpe ehola ni ba bose okwunu ka awonya ni.19Oshu kawo onya mani yo okwunu wa kpo ewa wa. Ewa wa lebyikweyi ke egwa, aba yoko kpanu ba yase ofo.20Ashini kasuse, ni gekwu kebi mani lo ni, kwikyikye ni ashagbotu ko sho ozalabi wa bita lo. Agohobu ko geyagye do omaku bibi, kpe eka ko ozinariya kpa azurupa, ogye-fufuku kpa akyo, kpefu, ni ba mebe lo, aba pwaha kwe ba yawu lo.21Kwikyikyeni ashagbotu ko ngmase lo, ba ya abodiyi ba beba, ba wi.
The Word for the World International