Osayi ko Oyohana18

1Itikpi ko omani nmo oyoleho oye yawa bwi iso. Ogbo oshu nyakwu, igyashi nu yese mani yu kpiri.2Oyoleho ngmegba kpoko nwaa mo: <<Ogbo! Obabila gbo! Awomaku bibi ni gbinyi ni ba bipu nu; edo ko oza ni shoshi lo ni kpa awigbano ni gbinyi ni ase ba fu ni bipu nu.3Ikweyi koni ase kese kpiri gwinyi nu. Inyi loshu keba boba nu. Awose kese ba gwutagye kpa anu, awino yi ipishi kese kpiri wo olodu ikweyi koza bibi keba ni oya shibita lo ni.>>
4Ebeni nki pwoko oye bwi iso ya kamo,<<Ala bose, ase hin! Ala bose shobita!Ala ka gba abo ipu ko ozalabi nu lo;ala ka gbingbo ipu ko owe nu lo!5Koni ozalabi nu tukpa sikpokyi gi iso,kweyi Owuso ya rela ko bibi nu.6Ala yo oza byoni oya ala ni;ala sore igbepa ko oza kpiri ni oya ala ni.Ya abwa nu na nwu igbepa kpi inyi loshubyi inyi ni oda ala ni.7Ala danu owe kotata kpotu byobyashi igyashi kpo onye ni odi iyi nu ni.Ikweyi oka di iyinu mo:<Nyyagye ebe mani, nwo onya ni rose!Nwo onyokwu la lo,Nyya gyotu byobya lo!>8Ikweyi ko omani, eno oye ebi ya yo ngmo,ose, otubyobya kpe emye ya yo ngmo.Aba yoyi kpo ola,ikweyi koni Adole Owuso ni ya kepwo ni gyokwu shaha.>>
9Awose kese ni beba kpa anu ni ba kyegba ikweyi ko ogya nyakwu ishini ami iwola kola ni yayo ni.10Ahagye ebe lenu kpa anu, ikweyi koni aba yoshi ko mowe kpanu. Akamo, <<Owe nu ya lemoji! Oya shoshi lo! Obabila mani wo ogya nyakwu! Ipu kishi oye kponu omegye!>>
11Awoyotoyu kese mani kyegba ki ba byotu mamani ikweyi nu, ikweyi koni ashishe riyo wa kelo;12Ashishe rozinariya, azurupa, okpo neshi, kpekye ni gbakwekye ni; kpo opa neshi, oshiye inyi kishi kpuru, owulu kposhiye nowa; kpedo kashini koza ni aya kpefu ni ya kpehe neshi kpoza ni aba ya kpodu kebe nyakwu, kpefu, awowatu, ogye fufukwu kpokpo yoyu;13omu ka apata kefu ni aba yogwu mo osinamo ni, iyo ko obobo, ozakpehe, apata kefu ni aba yogwu mo omayiri ni, kpo omu ki ikpiye kefu ni aba yogwu mo ofrakises ni; inyi kpa ano, omu kpe ewo, ena kpo otukpo, onya kpo oza ko biyo nu, oshe, kpo olayi kasuse.14Awoyotoyu kada nu mo, <<Kpiri kawoza ni oyimu ko gbo ni gebi, odu wo kpiri kpo oyi bawa kweyi, oya pyuwa kelo!>>15Awoyotoyu, ni gbodu ogya nyakwu oni, ba hagye lenu kpa nu, ikweyi koni aba yoshi ko gbingbo ko owe moma nu. Aba kyegba kpo otubyobya,16kweyi akamo, <<Ebi, ebi, Owe nu ya lemoji! Oya shoshi do ogya nyakwu lo! Oya shoshiye ko opa ni gbogye, inyi kishi kpuru, iyo nowa, kweyi agwagya kpo ozinariya kpo okpo neshi kpe ekye neshi ni gbakwekye ni!17Ipu kishi gbayayi odu nu mani kpiri kweyi!>>
Awopowu ki inyo kpase ni bipu nu, oteyi ka awopowu kpa ashini kase ni ba pyoza rore wa bwi ishu, wa hagye ebe lenu,
18ni ami iwola kola ni ya yo ni asheha mo: <<Okpagye wonya lebyo okpagye nyakwu mani wa?>>19Afa agye shi ikweyi, aba kyegba ba byotu mo, <<Ebi! Ebi yo ogya nyakwu mani re wa! Owogya nyakwu ni kpiri kase ni gbo owu ki inyo ba sheyi ki inya ba wo olodu bwebe ko odu ko onya mani! Kweyi ipu kishi gbayayi ojoji kweyi!>>
20Ala ase kiso, ala shotunehe, ikweyi kikwu nu! Ala shotunehe, ase ko Owuso, kpa ayikoko ko Oyesu kpa awobane! Koni Owuso kwepwo ko oza ni oyala ni!
21Ebeni oyoleho nyakwu zi ikyikpo ni gyokwu bye ego ni kweyi yi ta gipu ki ishu, ya kamo, <<Mamani aba yo ogya nyakwu ko Obabila ya ta ga agye koshu kweyi aba mo ebyibye ke lo.22Ashishe ya pwoko ki igye wowo kwe eya ko okwuburu, kwa amada kpajigwo kelo! Aba pya awoyoko ko otoyu oyoye kelo; kweyi aba pwe eya ke ego ogya mani kelo!23Aba mola ki ikwomu ipu wo kelo; aba pwoko ka awonyape kpo obu wa ipu wo kelo. Awoyotoyu wo pini loshu she kpiri ese la, kweyi abodiyi kokame wo gyase kese kpiri egya!>>
24Ado Obabila owe ikweyi koyi kawo bane kpase ko Owuso ni apye ipu nu ni; olemani, oyi kawase kpiri ni ayi ngmo ese mani.

The Word for the World International

https://app.library.bible/content/5762b83c586abca6