Osayi ko Oyohana16
1Ebeni npwo oko nwa ya kela bwo ole ko Owuso da ayoleho ahapa mo, <<Ga yo owatu ahapa kanya ko Owuso mani yi pyashu shese!>>2Oyoleho kikyikyo gaya akakanu pyashu sho ese. Akrigya labi ni ya dose kotata ni bose ikpiye kawase ni gbe enena ko obekwu kpa awase ni ba geyagye do oyi nu ni.3Ebeni oyoleho ko omwepa ya akakanu pyashu shi ishu. Inyo pya lebyo oyi kase ni gekwu ni, awoza ni gbo olayi ipu ki ishu kpiri ni gekwu.4Ebeni oyoleho ko omweta ya akakanu pyashu sho awokpa, kpi ibwu, kweyi inyo pya woyi.5Npwo oyoleho ni gboshu ikweyi ki inyo ni kamo, <<Epwo ni oka mani wokwokwoshi, owase neshi, awo ni we, ki kwobonu we ni!6Ayo oyi kase ko Owuso kpa awobane yi shonu, ni olemani oni, odawo oyi ma anagwa. Apyo oza ni aba tikpo ni!>>7Ebeni npwoko bwo okpe kamo, <<Adole Owuso Ine koshu kpiri! Epwo wo wokwokwoshi!8Oyoleho ko omene ya akakanu pyashu she eno, kweyi asho okwola nu bita ya yase byo ola ni.9Akpowu kola nyakwu yuwa yi, ayiye ko Owuso okwunu ni gboshu ikweyi kebi mani. Ake tela ko shagbotu sho ozalabi wa shini ana shi igyashi nu iye.10Ebeni oyoleho ko omeho pyashu kakanu bwa ake sho obe ko obekwu. Ebedibu yo obula ko obekwu yi gwu, kweyi ase ba hahanu wa ikweyi ko dose nu,11kweyi ayo Owuso ki iso okwunu ikweyi ko dose kpa akrigya wa. Ake shagbotu ko ozalabi wa lo.12Ebeni oyoleho ko omwihiri ya kakanu pyashu bwa ake sho okpa ki Ifretus. Ishu ngmo, shini ana gwo owe da awose ni bawa bwa ahanokyi ni.13Ebeni nma awomaku bibi eta ni le bya akrifo ni. Aba bose bwo okwunu ke egwa nyakwu, okwunu ko obekwu, kpo okwunu ki inobane ko kame.14Awomaku bibi ni ba yawoza kigbashi ni. Awomaku eta mani ba bose gebe kawo ose kese kpiri, ko kpi ikweyi wa gbayikweyi kefu ke eno nyakwu ko Owuso Ine ko Oshu kpiri.15<<Ala pwo! Nyya wa byo owi! Otunehe yo kpase ni yiyi kweyi ba gbeho ko oshiye wa ni, shini ana ka yawu ewewa kweyi yiweyi ipu kase lo!>>16Ebeni awomaku bibi bya awose kpa wa gbayi ebeni aba yogwu okwunu ki Ibru mo Amagedo.17Ebeni oyoleho ko omwahapa pyashu kakanu bwa ake shipu kowu. Oko nwa bwo obe ipu kole ko Owuso, kamo, <<Okweyi!>>18Owusotasha, owusogbo, akpula gbo kweyi agye ja kotata. Bwishi ni aya asuse ni agye ja mani ebyibye walo; omani pini wa agye ni ja she ni la!19Ogya nyakwu ko wi ikpo eta, kweyi awogya nyakwu ko okpagye kpiri kya. Owuso rela ko okpagye nyakwu ko Obabila kweyi yo gwinyi bwa abwa nu, inyi ka anya nu kotata.20Awokpagye ni inyo shogba tuwa ni kpiri gebi, awefu kpiri gebi.21Owuso yiwo ka akyo ni lenu kotata ni, shonu bwi iso wasa awase ni so Owuso esa ikweyi ke ebi ka akyo ni oyiwo ni, ikweyi koni owe ebi labi labi ni.
The Word for the World International