Ibru8

1Oza ni aha ba ka ni yoma: Aha gbo osapa nyakwu ni yagye abore ko Owuso Ine ko Oshu iso.2Osapa nyakwu mani yoko ebe ni yo sere she ni, ni wa adaba kokwokwoshi ni Adole abiyinu gwoni wa asuse lalo.
3Asho osapa nyakwu kpiri shini ona zeshi kweyi ona ki peshi ko bize do Owuso, mamani owotiri shini Osapa Nyakwu ka na gbo oje ko peshi ni.4Abi kamo oyese mani la obiya wo osapa nyakwu lo kpiri kpiri, ikweyi koni nekye-nekye agba awosapa ni ba zeshi byoni ono kawo Oyahuda ka ni.5Awosapa mani ba yoko wa ko peshi ipu ke Ebe-neshi le byo oyi koza ni aba ya yipu ki iso ni. Olemani byoza ni Omusa yani. Ishini oya ma adaba ko Owuso, Owuso kada nu mo: <<Ma mo oyo ojoji byo owe ni nshiya awo ikweyi kefu ni.>>6Anani ke, ado Oyesu oko ko osapa ni shakaka wa ni, byo koyi ni yo obepa ko Owuso kpase nu shoshi she ni, ikweyi koni ayo ikweyi ko koyi ni shoshi she ni.
7Abi kamo okoyi nekye bi gbepwo oyoye lo, abi ba doka ko okoyi pepe lo.8Owuso ke mo obibi kase nu kweyi kamo,<<Adole kamo, ishi ya wa bani nyya shokoyi pepe kpase ki Izrayila kpase ko Oyahuda.9Oya lema byo okoyi ni nshe kpa awokyikyi wa ni loeno ni npyuwabo bose shi Ijip ni.Ikweyi koni abyo okoyi hin ni nshe kpa awa ni lo,mani oni npyitikpi tuwa.10Adole kamo,<<Okoyi ni nyya she kpa ayi ki Izrayila ni yoma,ipu ki ishi ni ya wa ni,nyya yo ono hin tipu kotu wakweyi nyya yi ta ipu kotu wa.Nyya wo Owuso wakweyi awa ba wase hin.11Ashishe ya wa ko fa ayinanu oza kelo,kwe ko ka do oya ko yagye nu mo,<Gya Adole.>Koni kpiri wa ba gyun,bwa ayeke ga anyakwase.12Nyya yo ozalabi wa gbuwa,nyya rela ko ozalabi wa kelo.>>
13Ni Owuso yomani ogwu mo okoyi <<pepe>> ni, oya kikyikyo pya wo nekye, kweyi gbogba kweyi ya gebi.

The Word for the World International

https://app.library.bible/content/5762b83c586abca6