Ibru13
1Ala gohobu ko yimu kiyikala koni ala wa ayine ipu ko Okristi ni.2Ala ka nwanyi ko nyo ogboga ole kala lo. Bwebe ko ya mani ase ashini nya ayoleho ko Owuso agyogye lo.3Ala rela kawase ni bo oruduru ni byala bo oruduru dudu kpa awa ni. Ala rela kawase ni ba mowe ni byala ba mowe dudu kpawa ni.4Oyagye ko onya kpo oba na woza neshi ebe kase kpiri, kweyi ogwudu nu na yo neshi, Owuso ya kepwo ikweyi ka awagbaza kpa awobeba kpiri.5Ala yotu kala ngma shimu kikwiri, kweyi ala shotunehe kpo oza ni ala gbo ni. Ikweyi koni Owuso kamo,<<Nyya shobita lo,nke ya nwanyi awo lo.>>6Mani oni aba ka kpotu oye kponu mo,<<Adole pini wino tumabo la,nyya yoshi lo.Oji ni asuse ya gege ya yun?>>7Ala rela ka awoteyi kala nekye, ni kela ko Owuso dala ni. Ala rela ko oyagye wa, kpikwu wa, kweyi ala gbawa owe kotuse wa.8Oyesu Okristi woye kponu ene, ikyeni kpo ogbogbo-gbogbo.9Ala ka yo ogboga ko ozafofu wonyonya na yala nyowe lo. Oshoshi shini eshi ko Owuso na tahotu gbagba, wono ko ozarore lalo; ni gboko kojije dawase ni re ni lo.10Awosapa ni ba yoko adaba ko Owuso kase ko Oyahuda ni gbo oshu ko roza oyoye ikweyi ko okpe lo.11Osapa nyakwu ya byo oyi ka obize gipu ke Ebe ni yo Sere She ni ko ga peshi ikweyi ko ozalabi; ebe wa ke aba yi yola itikpi ole.12Mani oni, Oyesu gekwu itikpi ko ogya shini ona yaha na shozalabi kpo oyi nu.13Ni olemani oni, ahan bose gebe nu itikpi ole, shini ahan ga gbowuru byoni anu gbo ni.14Koni ipu kese mani aha gbo ogya ni ya yaba ko gbogbo ni lo, aha ba tikpo ko ogya nyakwu ni ya wa ohobu ni.15Ni olemani oni, ahan peshi kiye shosha do Owuso bwebe ko Oyesu. Iye ni aba shanu ni na weshi ni aba ze kpo okwunu ko kamo owa Adole ni.16Kweyi ala ka sho oneshi ko yase kpo tase abo bita lo, ikweyi koni omani pini weshi ni ya sho Owuso otu ni la.17Ala geyagye da awoteyi kala kweyi ala ko ono wa. Aba gbeho kala gbo minyo lo, koni owotiri dawa ko za arisawu ko oko ni aya ni do Owuso. Ala geyagye da awa shini ana yoko wa kpo otushosha; onaka wegye dawa lo, lalo oya gboko kojije dala lo.18Ala tinarigwu daha. Aha gye mo otu kaha woye kponu, ikweyi koni aba yimu ko yoza neshi ishi kpiri.19Ko kwokwoshi nyya bala mala tinarigwu shini onaka gbeji lo Owuso na kwikye ami webe kala.20Nyya bo Owuso komene, ni ya Adole Oyesu shiyi bwikwu bwebe koyi ko okoyi ko gbogbo ni, anu ni wi Ino Gbeho Nyakwu ko otukpo ni,21na dawo ojoji neshi ni ya yo ya yoza ni oya yimu ni, kweyi nyya bo mo ona yoko ni shotu ni ipu kaha, bwebe ko Oyesu Okristi, ni wine kigyashi ko gbogbo-gbogbo ni! Nalemani.22Ayene hin, nyya bala, shini ala zakpaha kpotu mene do oshu ko otugbagba mani; okpa ni nta dala mani wirikpo lo.23Nyya yimu shini ala gye mo ayo oyene kaha ko Otimoti ngma sho oruduru wa. Owoni oshishi wa, nyya byo yawa kpami kowa mala.24Ala ta awoteyi kala kpase ko Owuso kpiri ogbogba daha. Ayene ka bwi Italiya ba tala ogbogba.25Nyya beshi ko Owuso na yo kpala kpiri.
The Word for the World International