2 Otesalonika3

1Ogwejeji nu ayene kaha, ala tinarigwu daha shini oleho ka Adole na ge ebebenya papa shini ase na gye kweyi geyagye danu, byoni ala nye kweyi geyagye danu ni.2Ala kyi tinarigwu shini Owuso na ngmaha shabo kase bibi ni gbonotu ni, koni kpiri kase pini gbo otuse la lo.
3Adole ke wine kokwokwoshi la, oya dala oshu ki ya gbala shabo ka Ase Bibi oni.4Kweyi ala yikpiye kaha loshu ipu ka Adole koni agye mala ba ya kweyi kyi ba gohobu ko yoza ni aha ka dala ni.5Adole na yotu kala na gyi imu nyakwu ko Owuso kweyi ala zotu ipu ko Okristi.
6Ayene kaha, aba ka dala ipu ki iye ka Adole Oyesu Okristi, ala gwabo sha ayene kpiri ni ba ya ayaga kweyi ba yoza ni aha fuwa ni lo.7Koni ala abiyikala gye mala shu ko yoza ni aha ya ni. Ishini aha bagye kpala ni aha ya ayaga lo.8Aha roza ka ashishe yeye lo. Abishi koni aha yoko kweyi mowe, kotu ke eno shini ahan ka wegye dala lo.9Aha ya mani koni aha gboshu ko doka koza ko tahabo lo ni lalo, aha ke ya mani shini an faloje la.10Ishini aha bagye kpa ala ni, adala ono mani mo, <<Ase ni tela ko yoko, ona ka roza lo.>>
11Aka mani ikweyi koni apwo mo ase ashini ipu kala ba ya ayaga, oko wa wako geye giso kin la.12Ipu kiye Adole Oyesu Okristi aba ka dawase mani kweyi ba pyuwa akpaha mana yotu wa kagye shini ana yoko ko pyoza naba re ni.13Ala ke ayene kaha, ala ka nwa ko yoza neshi lo.14Owoni ashe tela ko gboso oza ni ata ipu kokpa mani, ala yi iyi kwo neshi. Ala ka rema kpanu lo shini iweyi na kwo.15Ala ka zo wo omonyekwotu kala lo, ala ke pya akpaha byo oyene.
16Adole abiyinu ni wo otu ko omene kaha ni, na dala omene ipu ki ishi kpiri kpo owe wonyonya. Adole na yo kpa ala kpiri.
17Ami Obulus togbogba mani kpa abo hin, byoni nyya ta ipu ka awokpa hin kpiri ni; owe ni nyya ta ni yoma.
18Nyya beshi ka Adole Oyesu Okristi na yo kpala kpiri.

The Word for the World International

https://app.library.bible/content/5762b83c586abca6