1 Otesalonika5
1Nabani ayene, ela kishi kpe eno ashu ko ta dala ke lo ikweyi kawo oza ni bawa gbodagye ni,2koni ala gye mo eno ka Adole ya wa byowi yawa otu ni.3Ishini ase ba ka mo, <<Aba bagye ko mene kpo otu shosha.>> Kweyi owe wa tawa wo gyogye wa lo, byoni ose koma ya lonya ni bifu ni, aki ba gbo owe ko bose lo.4Ayene ala ke bipu kebe dibu lalo, eno mani naka wa tala byo owi wa tase ni lo.5Kpiri ka ala wa ayi ko yoyu kpe eno la. Aha wako otu kwe ebe dibu lalo.6Ni olemani oni ahan ka gbola bya ashishini kase lo, akyiyi ka tu kweyi bagye kotu mene.7Otu pini ase ba gbola la, otu pini ase ba yinyi la.8Koni aha ke wa ke eno la, ahan gbiyi ka. Ahan shoshiye ko otuse kpi imu byo oshiye kogye kweyi iyitagye ka na ngmaha byo ozakeyi kogye.9Owuso shaha ko mo we ipu kanya nu lalo, ke wa ko ngmaha bwebe ka Adole Oyesu Okristi.10Ogekwu ikweyi kaha, kwa abiyi kwa aba gbola, ishini owa ahan bagye dudu kpa anu.11Ni olemani oni ala tiyikala otugbagba, ala tiyikala abo byoni ala baya ni.12Anani aba ba ala ayene, ala za abokpa da awase ni ba yo oko kpotu oye kponu ipu kala, ni wa anyakwase kala ipu ka Adole ni ya dala ela ni.13Ala byuwa kpotu neshi ipu ki imu, ikweyi ko oko ni aba ya ni. Ala bagye ko neshi kpi iyi kala.14Aba ba ala ayene, ala gba awine ka ayaga mani apwo, ala tawase ni ba yoshi ni otugbagba, ala tawase ni gboshu lo ni abo, ala gbotu mene kpa ananaho.15Ase ni yo bibi ka sanu obibi lo, ala ke yoza neshi kpiyi kala ki kpa ananoho ishi kpiri.16Ala gbotu shosha ishi kpiri;17tinarigwu ishi nye;18ala shotunehe ipu kojoji. Oza ni Owuso ya yimu ebe kala ipu ko Okristi Oyesu ni oma.19Ala ka wo Omaku ko Owuso obi ko yoko lo;20ala ka tela koleho ko Owuso lo.21Ala mo oza kpiri ma: ala ya abo byo olamu ni wo neshi ni22kweyi ala gwowe koza labi wonyonya tagye.23Owuso ni ya daha omene ni, na ya ala wase neshi, kweyi na gbeho kala; ko omaku, ko otu kala kpiri, shini ana ka kwalepwo eno ko wowa ka Adole kaha Oyesu Okristi lo.24Anu ni yala ogwu ni ya kokame lo, oyaya mani.25Ayene, ala tinarigwu daha.26Ala ta ayene kpiri ogbogba kweyi kwuwa botu kpotu oye kponu.27Nyya bala ipu koshu ka Adole, ala koza ni yipu ko okpa mani da ayene kpiri.28Nyya beshi ka Adole Oyesu Okristi na yo kpa ala.
The Word for the World International