1 Otesalonika1

1Ami Obulus kpo Osila kpo Otimoti tenena mani dala ase ko Otesalonika, ipu ki iye ko Owuso Ada kpa Adole Oyesu Okristi: oneshi kpo omene na yo kpa ala.
2Aba shotunehe do Owuso ikweyi kala kpiri, aba rela kala ipu ki inarigwu kaha.3Aba rela kala obutu ko Owuso Ada ko oko ni ala ya kpo otuse kala ni, kpi imu kala ni yala yoko kotata ni, kpi iyitagye kala ipu ka Adole Oyesu Okristi ni loshu ni.4Ayene hin, agye mo Owuso ya yimu kala anu ki shala wa akaka nu.5Ikweyi koni abyo oshu neshi webe kala byela kin lalo ke wa kpo oshu, kpo Omaku ko Owuso kpo oshu ko kwokwoshi, ala rela kishi ni aha bagye dudu ni; owa ko neshi kala.6Ala ba gbaha kpa Adole, koni ala ba mowe ni, ala zela ko Owuso kpo otunehe na dala bwebe ko Omaku ko Owuso.7Ni olemani, ala ba woza ko gbogba dawo ko Owuso ni gbotuse kpiri Omakidoniya kpo Akaya.8Ela kotuse kala ebe ko Owuso bwebe kala gebe kase ebebe nya. Oki gohobu ko ogya ko Omakidoniya kpo Akaya, oke kweyi ebeni lo, oge ebebenya kpiri aba kela ko otuse kala daha ipu ko Owuso. Ashu ko kojije dawa ikweyi nu ke lo.9Koni kpiri wa kedo ko omaba ni ala yaha ni. Kpo owe ni ala bwu gbishini ala she eka yoya bita webe ko Owuso, kweyi geyagye do Owuso ni wo kwokwoshi kpo olayi ni,10kweyi gbabo ko Oyi nu bwi Iso. Oyi nu Oyesu ni oshiyi bwa amiri ni, anu ni ya ngmaha bwa anya ko Owuso ni yawa ni.

The Word for the World International

https://app.library.bible/content/5762b83c586abca6