1 Obitrus5
1Nyya ba awanyakwase ni bipu kala ni, ami ni wanyakwase abiyun ni, ami olobene ko owe moma ko Okristi, ami ki yawa gbingbo ki igyashi ni ya wa bose ni.2Shini ala wa awogbeho ko obize ni Owuso dala ni, ko yiyi kwuwa kpo otu oye kponu, byoni Owuso ya yimu ni, ka ya bya abyo koshu lo. Ka ya koni aba sore ni lo, ke ya koni ogbimu koya ni.3Ka yawase ni adawo ko yiyi kwuwa ni oza koshu lo, ke yoza ni aba gba ebe wo ni.4Shini ishini Inogbeho Nyakwu bose, oya lo otu kigyashi ni ya gba lo ni.5Mamani ala ayileke ala geyagye da awanyakwase kala. Kpiri kala ala sho oshiye ko yikweyi bagye, shini ala yoko diyikala, koni okpa kamo, <<Owuso ya tela kino zikweyi iso, ase ni ke ya yikweyi bagye oya yoneshi.>>6Yikweyi bagye, ipu koshu kabo ko Owuso, shini anu na ngawo iso ipu kishi neshi nu.7Kpojoji ni ya shiwo wo ni shikweyi, ikweyi koni oya dotose wo.8Ala gbera, ala wiyikala shu! Ibiri ni wo omonyekwotu kala ni ya gyehe bya abaga niya wonu ni, ya labo kase noya yi sha ha ni.9Ala ka kyo ogwu lo, ala hagye giri ipu kotuse, ikweyi koni ala gye mo ayene kala shishini ipu kese kpiri ba medo ko owe ni ala ba ma ni.10Ishini ala mowe kishi gbayayi, Owuso ine ke eshi kpiri, ni yala ogwu ko gbingbo ipu kigyashi nu ko gbogbo ipu ko Okristi ni, anu abiyinu ya kyala tu kweyi ya dala oshu, ki ya yala ba gbogba neshi.11Oshu wakakanu ko gbogbo-gbogbo! Nalemani.12Osila pini tumabo tenena mani la, nggye mo owino gboso Okristi kokwokwoshi. Nyya yimu ko tala otugbagba ki ka dala mo omani pini we eshi ko Owuso ko kwokwoshi la. Ala hagye giri ipu nu.13Oda ko Owuso ko Obabila, ni Owuso shuwa kpala dudu ni ba talogbogba, oyi hin ko Omarkus ya tala ogbogba mamani.14Ala tiyikala ogbogba kweyi kwiyi kala botu ipu kimu ko Okristi.
Omene nayo kpala kpiri ni wako Okristi ni.
Omene nayo kpala kpiri ni wako Okristi ni.
The Word for the World International