AGBÃ6
Atɔ̃me Mama Wa Iso Ɔturi Aadzuɛ̃ So
1Wũ ɔbi, si aya i fɔ ɔnyii kama,aya i kuso kanya atã ɔturi mama ne,2fiɛ fɔ kanya ɔɔpia-ɔ i kata ame,fiɛ fɔ atɔ̃me wa aɣɛ ɔnyi-ɔ ato ne,3iyɔ ɔɔbo i fɔ ɔnyii nrɔɔ̃ ame.Wũ ɔbi, nnɛ aabara aɖi so nɖe sɔ:Kɛlɛ ɔ̃ kɔrɛ si abɔsokarɔ̃;si apɛ fɔ ɔnyii nrɔɔ̃ teteree!4Daama anɔmi arɛ sirɛ,daatua sirɛ ana kɔraa.5Ɖi so lɛ kumɛgɔ i kasɔlɔ sɛ kaɖi so kabɔrɛgu i gbere nrɔɔ̃ ame,lɛ kumɛgɔ i karodzai sɛ kaɖi so kabɔrɛgu i karɔisɛdze ɔwɛ̃ ame awe.6Dãdze, kɛlɛ kabɔibi kɔrɛ;si anyɔ kã arabarara si atsue iwola!7Kɔdze na wũnyɔisose ɣee ɖeisose kuwɛ̃ ana na wũ.8Ɣɛɛ ɔsɛ ɔledza araɖea ɔkɔla ɔsɛ i kusɛ ame,fiɛ ɔsɛ ɔsira ɔ̃ araɖea kanya ku ɔraɖui ɔsɔrɛ̃wi.9Ɖãdze, ku me ɔwi aakɛlɛ arɛ i mmɔ isɛ iabo?Iɖe ɔwi wɔ aata i sirɛ?10Si nrɛ kɛkɛĩ, ntua sirɛ kɛkɛĩ,lopia nrɔɔ̃ i ngba ame losɛ lowarã ni -11siwɛrɛba to siaba-ɔ iso lɛ yukukpe awefiɛ idaawe aabo-ɔ iso lɛ adzoɖaɛse awe.12Nwɔ nɖe ipɛ̃ gu ɔtileseɔ̃ nsɛ ɔkiki ɔla mila ne.13Ɔsɛ ɔma ɔturi anɔmi,ɔbara ikparĩ ku ngba i karɔ̃,fiɛ ɔsɛ ɔsu nrɔɔ̃ gu arɔĩ ɔbara ala akparĩ.14Ɔɖe kasɔla ɔturi, ɔsɛ ɔbara iranyanyariã adzuni -fiɛ ɔsɛ ɔpia kulu i maturi ndɛ̃ ɔwi biara.15Ne ɔso kukpakpi to kuaba wũ iso ɔluwɛ̃ kere,ɔto ɔ̃afɛ̃ ɔluwɛ̃ - gɔ ɔ̃isibawo ɔta i ɔnyɛ.16Ara akuɔ pia i Bosate sɛ ɔtsiri,wã akɔdzɛ ɖe anyanyara atã wũ:17iteso anɔmi,mila ɔnyagɛmi,nrɔɔ̃ mɛ lofere mma loiɣɛrɛ ima i karɔ̃,18ɔtu wɔ nsɛ ɔbara siriita nyanyariã,ngba mɛ nsɛ mipɛsiwa i iranyanyariã ibara iso,19aɖansiɛ ladze wɔ nsɛ ɔla milagu ɔturi wɔ nsɛ ɔpia kulu i manyiibi ndɛ̃.20Wũ ɔbi, mɔɛ̃ fɔ ɔse mmaraisi lasi adaanyua fɔ ɔnyi araite apɛyu.21Nyi wã sia i fɔ ɔtu iso ɔwi biara,si anyi wã apia i ɔme.22Si asɛ ne, ato aakɔkɔ-ɔ,si arɛ ne, aadzuɛ̃-ɔ,si ata ne, aaɖegu-ɔ ika.23Alasɔ mmaraisi mɛgbe ɖe ɔkaniɛ,araite wagbe ɖe ɔtɔ,fiɛ ikpadzɛ̃ iyiranɖe ngbã ɔri,24wa loaɖi-ɔ abɔrɛgu i sidzetɔrɔ̃go nrɔɔ̃ ame,abɔrɛgu i rãrɔdze ɔnyamɛrɛ̃ atɔ̃me ame.25Daatã ɔ̃ kulɛ si kukpɛ̃-ɔ ɔkã.Ɣee daatã ɔ̃ anɔmi ikikidza si imɔɛ̃-ɔ.26Alasɔ sidzetɔrɔ̃go ne, ɔ̃abɔ-ɔ karɔ̃ ase lɛ boɖoboɖo kaboi kere,fiɛ rãrɔdze aatã ayura fɔ mɔmɔ ngbã.27Ɔrɛrɛ̃ aawo ɔtɔ ɔɖi ɔsia so isosɔ ɔ̃ arapia iibatsue?28Ɣee ɔturi aawo ɔsɛ i atɔgirĩ isosɔ ɔ̃ ngba iibatsue?29Ngbɔ kere ise itã ɔrɛrɛ̃ wɔ nsɛ ɔrɛgu ɔturire ne.Ɔbiara wɔ nsɛ ɔrɔ ɔturire ne, maakpadzɛ̃ wũ kutsue.30Maturi iisɛ manyɔ yukukpe pupurii si kukã to wũfiɛ ɔyu ira ɔɖe ɔsu ɔnidza kɔ̃.31Ɣɛɛ si mamɔɛ̃ wũ ne, ikote sɔ ɔ̃atã kuso ikpɛ ikɔdzɛ,atoasɔ ɔto ɔ̃asu ɔ̃ iyo ara ɔɖuɖu ɔtã kuso.32Ɣɛɛ ɔrɛrɛ̃ wɔ nsɛ ɔrɛgu ɔturire ne ɔna adzuni.Ɔrɛrɛ̃ wɔ nsɛ ɔbara kumɛɔ ne ɔsɛ ɔwɔra so.33Agbɛ gu kunuarɛ loaɖe ɔ̃ ɔkpɛ,fiɛ ɔ̃ kunuarɛ iibaro kuiyikuiyi.34Alasɔ sirerɛ sɛ sitã ɔrã ɔna sikpã gbaã,iyɔ ɔ̃ibanyɔ nnya si ɔto ɔbara ɔtikuso.35Ɔ̃ibatɔrã ɔfɔ ikpata kuso kukuwɛ̃,fiɛ ɔ̃ibafɔ kuwɛrɛso kumekume kusi.The Seed Company