AGBÃ4
Iwola Kusia
1Wũ mabi, minɔ ɔse iturikpadzɛ̃ atɔ̃me;misɛ atsue kukaakɔ si mianɔ ara karɔ̃.2Alasɔ kuka sɛɛ nto lotã mi,ne ɔso midaanyua wũ araite mipɛyu.3Ɔwi wɔ loɖe kabirɛrɛĩ kere i tete iyo,gu ɔbi ɔnɔwɛ̃saã wɔ loimɔ, lotã wũ ɔnyi ne,4tete ɔte me ara. Ɔɣere me sɔ,"Mɔɛ̃ wũ atɔ̃me pia i iti ame kukaakɔ.Bara sia i wũ mmaraisi iso, si aasɛ ngbã.5Bie iwola, si abie karɔ̃inɔ;daaɣara wũ atɔ̃me ɣee anyua wã asɛ.6Daanyua iwola asɛ, iyɔ ɔto ɔ̃adzuɛ̃-ɔ.Ɖɔɛ wũ, iyɔ ɔto ɔ̃anyɔ-ɔ iso.7Iwola nɖe ira nɛ lonya iɖo; ne ɔso bie iwola.Si ana ara gbodzoo kɔraa ne, bie karɔ̃inɔ.8Dzuĩ wũ sɔ ɔɖe ira ne lofɔ kuɣa, iyɔ ɔto ɔ̃akɔlɛ-ɔ kato.Pɔrɛ wũ pia so, ɔto ɔ̃apia-ɔ kuwarɛ.9Iwola to ɔ̃ase lɛ aɣɔ̃la wa nto alɛnyɔ i fɔ iti iso,fiɛ ɔ̃asu igaraikoto nɛ nto ilɛnyɔ ɔtɔmedza-ɔ."10Wũ ɔbi, kã wũ atɔ̃me atsue si afɔ wã apia i kame,si aasɛ ngbã afɔ akɔ gbodzoo.11Iwola ɔri ɔɖe nto lote-ɔfiɛ siri tɔrɔrɔa iso nto lokɔkɔ-ɔ lokigu.12Si asɛ ne, kuira iibaya-ɔ i ɔri iso,si ato atere ise ne, aibatura i kuira iso.13Mɔɛ̃ ara wa mate-ɔ la teteree; daanyua wã asɛ.Dzuɛ̃ ne kukaakɔ, alasɔ ne nɖe fɔ ngbã ne.14Daasɛ i matilese kanenekɔ̃;ɣee daaki i maturi nyanyariã kakikɔ̃.15Sɛ̃ ɔri wɔmɔ, daasɛ i ɔ̃ iso.Sɛnɛkɛ̃ i ɔ̃ iso si aki i ɔri mama iso akɛlɛ.16Alasɔ maisɛ mawo ɔrɛ si maibara iranyanyariã.Maisɛ marɛ sirɛ tagbi mabara ɔturi iraboa.17Ɔtile ibara nɖe ma aɖerafiɛ amumuɔ nɖe ma ndã mɛ manɛ.18Ɔturi bɔlɔlɔa ɔri se lɛ kaya kuɣɛ̃ ibɔrɛ awe.Kusɛ kufiɛ kuledza ifiɛ kubua gbɔgbɔɔgbɔ kaɖe ɔɔkpa kukaakɔ.19Matilese ɔri se lɛ idududu kpirikpiria awe.Maisɛ matsue nnɛ nsɛ itã matura.20Wũ ɔbi, sɛ atɔ̃me wa nto loɣɛ atsue,si akã wũ atɔ̃me wa nto loɣere-ɔ atsue kukaakɔ.21Daatã wã arui i fɔ anɔmi iso,ledza wã pia i fɔ ɔtu ame.22Alasɔ aɖe ngbã atã mma nsɛ mana wã,fiɛ iɖe isosarɛ itã kuturidziri ɔɖuɖu.23I wã ɔɖuɖu ame ne, dzuɛ̃ fɔ ɔtu kukaakɔ,alasɔ ɔtu ame i irabiara nɛ asɛ abara i ngbã ame ɔbɔrɛ.24Tsiri nnɛ loiɖe ɔnukuare iɣɛ,si arera so kama i kasɔla gu mila atɔ̃me iɣɛ kɔrɛ.25Tã fɔ anɔmi si anyɔ fɔ katɔ̃ siĩ,si anyɔ nnɛ nsɛ-ɔ i katɔ̃ tutuutu.26Ɖi siri sɛɛ dzɛ iso aaki tã sosi asu siri dzɛ nɣɛ teteree kere.27Daasɛnɛkɛ̃ akɛlɛ kuɖearɔ̃ ɣee kubena iso.Rera so kama i iranyanyariã ɔri kɔrɛ.The Seed Company