AGBÃ23
Ikuɔ
1Si asi i ɔpɔrɔ̃ katɔ̃ sɔ aaɖegu ɔɖeisoi ara ne,nyɔ nnɛ nse i fɔ katɔ̃ kukaakɔ.2Si aɖe ɖeɖei ne,iyɔ ɖesoiso teteree.3Daawe ɔrakolo i ɔ̃ aɖera mɛrɛ̃mɛrɛã iso,alasɔ aɖera wa masɛ masɔsɔla ɔturi aɖe.Ikɔdzɛ
4Daaɖaa so sɔ aakpese ranase;tsue iwola si aɖi ne i adzuni ame.5Su anɔmi si anyɔ karana, kere ka kakpa,alasɔ kato kaare abuefiɛ kaafɛrɛrɛ kakɛlɛ ɔwiri ame lɛ finikpo awe.Fafarana
6Daaɖe ɔyiriɖoi aɖera,daawe ɔrakolo i ɔ̃ aɖera mɛrɛ̃mɛrɛã iso;7alasɔ ɔɖe ɔturi ɔwɛ̃ igbãnwɔ nto ɔbu iti ame i kuso iso ɔwi biara.Ɔsɛ ɔɣere-ɔ sɔ, "Ɖe ara, si anɛ ara,"ɣɛɛ atɔ̃me wagbe iibɔrɛ i ɔ̃ ɔtu ame.8Ato aara aɖera kɛkɛĩ wa ɔɔɖefiɛ fɔ ile atɔ̃me wa aɣɛ to aɖe siefe.Kaiwɛ̃
9Daaɖe kadzunsɛĩ ika,ɔto ɔ̃anyɔ iwola nɛ mpia i fɔ atɔ̃me ame pupurii.Iweo
10Daarui kume kuere kuere,ɣee amɔɛ̃ makpisemabi nkpɛkɔ̃ afɔ i ma kɔrɛ.11Daabara ngbɔ alasɔ ma Fɔdze ba ɔle;ɔto ɔ̃afɔ ma kanya i itɔ̃me iso ɔta ɔya-ɔ iso.Iweo-ɔ̃wɛ̃
12Su fɔ ɔtu sia i araite atɔ̃me iso,si akã inɔkpa atɔ̃me atsue.Iweo-inyɔ
13Daasɛ̃ sɔ aito akpadzɛ̃ fɔ ɔbi kutsue.Si aɖeɖe wũ ɔdziri ne, ɔ̃ibakpi.14Kpadzɛ̃ ɔbi kutsue ku ɔdzirisi aɖi ɔ̃ ngbã abɔrɛgu i kukpi ame.Iweo-itɛ
15Wũ ɔbi, si fɔ ɔtu ɔtsue iwola ne,iyɔ wũ ɔtu to ɔ̃ana isoɣɔ;16so to siaɣɔ wũ ɔkalasi aɣɛ nnɛ loya.Iweo-ina
17Daarɛtɛra anɔmi i makpibaradze iso,ɣɛɛ we Bosate kunigã ame teteree ɔwi ɔɖuɖu.18Si abara ngbɔ gbaã ne, ɔriinyɔ pia i kɔrãkaɖe ame itã-ɔ,fiɛ fɔ ɔriinyɔ iibaɖe siefe.Iweo-iru
19Wũ ɔbi, nɔ, si atsue iwola,si asu fɔ ɔtu asia i ɔri sɛɛ iso.20Daapia kulaa ku ndã gbodzoo manɛdzeɣee daapia kulaa ku mina siare mawedze,21alasɔ tarɛ̃dze gu ɖeɖei sɛ makpese mawɛrɛba;fiɛ mirɛ siare irɛ sɛ mitã mawe i ara kɛkɛa ame.Iweo-ikuɔ
22Kã fɔ ɔse wɔ loɣe-ɔ atɔ̃me atsue,ana ne daanyɔ fɔ ɔnyi pupurii i ɔ̃ sikpakpaso ame.23Ɣa ɔnukuare, daaɖi wũ arɔĩ.Na iwola, iturikpadzɛ̃ gu ara karɔ̃inɔ.24Ɔturi bɔlɔlɔa ɔse sɛ ɔna isoɣɔ gbaã;ɔrɛrɛ̃ wɔ loɣe ɔbi wolai sɛ ɔna isoɣɔ i ɔ̃ iso.25Tã fɔ ɔse gu fɔ ɔnyi si mana isoɣɔ;si ɔnyi wɔ loɣe-ɔ si ɔna isoɣɔ!Iweo-ikɔdzɛ
26Wũ ɔbi, su fɔ ɔtu tã me,si anyɔ wũ nsɛgbai asɛ ikpo,27alasɔ sidzetɔrɔ̃go ɖe iwo wodoroa,fiɛ ɔre wɔ loɔsu so rãrɔdze ɖe itubiɔ mɔmɔriã.28Ɔsɛ ɔwɛrɛ ɔsia lɛ yukukpe awe,fiɛ ɔsɛ ɔbara sɔ mma loisɛ maɖe ɔnukuare sɛ masi i marɛrɛ̃ ndɛ̃.Iweo-fafarana
29Nna mba isoma? Nna nsɛ ɔna ibo gu ibɛbɛrɛ?Nna nsɛ ɔbara kulu? Nna nsɛ ɔlɔ ɔsɔ?Nna iso nsɛ ibɛbɛ siefe? Nna anɔmi nsɛ arɛtɛ abara dɔɔ̃?30Mma nsɛ makamu i ndã kayirinɔ,mma nsɛ maɖɔɛ ndã mɛ malupu inɛ inyɔ ne.31Daanyɔ ndã gɔ mirɛtɛ,gɔ mito mifu i ikɔi ame,fiɛ si anɛ ne misɛ mife pɔkɔsɔɔ!32Katsɔrakɔ̃ ne misɛ miɖo lɛ aɣɛ awe,fiɛ misɛ miɖi kabiɛtɛ lɛ kabeku awe.33Fɔ anɔmi to aanya afɔ̃rafiɛ aato aanya akpɔkpɔtɔra i fɔ adzuni ame.34Ato aase lɛ ɔturi wɔ nto ɔrɛ sirɛ i ɔpo wɔ loise kpoo iso.Aase lɛ ɔturi wɔ nsi i nduisoibuɛ ame fiɛ ito ife i ngbe gu i mmɔ.35Ato aaɣɛ sɔ, "Mawuĩ me ira, ɣɛɛ iraboa iibara me!Mapɛ me ɣɛɛ iibo me!Iɖe ɔwi wɔ loarɛgɛ̃si loabie ndã mama lonɛ?"The Seed Company