NEXEMIA4
Nexemia Matsirise
1Ɔwi wɔ i Sanbalat ɔnɔ sɔ boto boledza Yerusalem ibere itsue ne, ikpɛ̃ wũ sikpã fiɛ ibo wũ so gbaã. Ɔbara ma Yudase aɣiãra.2Ne ɔɣɛ i ɔ̃ malaa gu Samaria makpakpɛ̃dze ikuri anɔmi ame sɔ, "Be i ma Yudase fɛfɛã mamɔ to mabara? Ma ibere mato maaledza? Mato maasɔrɛ ara? Maawo ne ɔro ku iyi iwɛ̃? Mato maawo ata wa ɔtɔ ɔɔpɛ, ɔkuri ɔɖi ɔbɔrɛgu i aku ikpe kame ɔsu ɔtsue ibere?"3Tobia Amonse, ɔwe i ɔ̃ kɔrɛ ɔ̃ wũ ɔɣɛ sɔ, "Nnɛ mato matsue ne - si ɔgidi kɔraa ɔya ne iso ne, ɔto ɔ̃abiɛ ma ata ibere ɔfere i karɔ̃!"4Ao, bo Ɣaa, kã bo kayiikparama atsue, nɔ kumɛgɔ mato masopara bo. Tã ma aɣiãra si akpese asia i ma mɔmɔ ati iso. Su mapia nrɔɔ̃ lɛ kakpãramɔɛã i kafɔrɔ̃ ame.5Daasu ma iɣɛrɛ atsɛ ma ɣee daaɖi ma akpi i fɔ anɔmi ame, alasɔ matia ibere matsuedze i ma anɔmi ame.6Ne ɔso bokɛlɛgu ibere itsue katɔ̃, gbɔgbɔɔgbɔ ne ɔɖuɖu ɔbo ne kukɔlɛme ndɛ̃, alasɔ maturi ɔbara karabara ku ma ɔtu ɔɖuɖu.7Ɣɛɛ gɔ i Sanbalat, Tobia, ma Arabse, ma Amonse gu Asdod marɛrɛ̃ ɔnɔ sɔ Yerusalem ibere iledza itsue karabara to kasɛ katɔ̃ kukaakɔ ne, fiɛ ka mato matɛ̃ kubiɛkɔ̃ maro ne, mana sikpã gbaã.8Ne ɔso mabara kanyakawɛ̃ sɔ ma ɔɖuɖu aata kakpã i Yerusalem iso mapia kukpɔkɔtɔ i ɔ̃ ame.9Ɣɛɛ bokparamakayi botã bo Ɣaa ne boɣedza madzuɛ̃se i ngɔi. Maturi magbe ɔla maɔdzuɛ̃ matsirise ifura nɛgbe kasɛ̃ i kakɔme.10Tɔtɔ ne, ma Yudase ɔɣɛ sɔ, "Marabaradze ɔle ka ɔto ɔro ɣɛɛ ibere bibiɛa ɔkpese isi gbodzoo gɔ boito boawo ibere ɔledza itsue."11Bo matsirise ana ɔɣɛ sɔ, "Maito maatsue kɔraa fiɛ boto boabo i ma ndɛ̃, boɖoe ma iyɔ kere karabara aatuĩ."12Ne ma Yudase ma nsi mamatã bo matsirise ɔba maatã bo itsue ɔwi gbodzoo sɔ, "Kakɔi biara mipɛ mifiriki ne, mato maata mabo bo iso."13Nnɛgbe ɔso ne, loɖi maturi losese ibere kama isɛ i ibere karɔ̃ isɛ ngɔi mɛ nfere kpawee. Loɣɛ ma lopia i akuri ame i ma ayomaturi kanya ne mato apɛmi, afele gu kuta fiɛ mato madzuɛ̃ mmɔ.14Gɔ lonyɔ ara ame kukaakɔ ne, lota loya loɣere makpakpaturi, matɔ̃ɖedze gu maturi tsɔra sɔ, "Midaanigã matsirise. Minyigi sɔ Sate ne ɔsiare gu nwɔ nɖe ifɔ̃ra ɔɖe, si mikpɛ̃ i mi manyii iti, mi mabi gu mi mare gu mi ayo iti."15Ɔwi wɔ i bo matsirise ɔnɔ sɔ ka boɣe ma ɔriita i bo iso ne, matsue sɔ Ɣaa ɔɔnina ne ame. Bo ɔɖuɖu ɔkpese bokɛlɛ ibere kɔrɛ, ne ɔbiara ɔkɛlɛgu ɔ̃ karabara katɔ̃.16Ita i iyi nɛmɔ iso ne, wũ marɛrɛ̃ kasɛ ɔbara karabara, gɔ i kasɛ tsɔra ɔwe i akpakpɛ̃rapia ame mala afele, akpirafɔra gu kuta. Matɔ̃ɖedze ɔya i Yuda maturi ɔɖuɖu17ma nto matsue ibere kama. Ma nto masore ibere itsue ara, ɔsu kɔrɔ̃ kuwɛ̃ mala maɔbara ala karabara, ne ka mato akpakpɛ̃ra i kɔrɔ̃ nyɔare ame ne.18Matsuedze ɔbiara ana ɔsara ipɛmi i ɔ̃ iso fiɛ mala maɔbara karabara. Ɣɛɛ ɔturi wɔ nɖe kadadafɛ̃dze ɔwe i wũ kɔrɛ.19Kere ne loɣere makpakpaturi, matɔ̃ɖedze gu maturi tsɔra sɔ, "Karabara ɔsi fiɛ kase kakpa, fiɛ bo ɔbiara ɔsame ɔɣɛ i ibere iso dzoroo i ɔ̃ ɔlaa kɔrɛ.20Kakɔi karere ga minɔ kadadã silɔ ne, mimɔɛ̃ ɔri miba miasakanyagu bo i mmɔ. Bo Ɣaa to ɔ̃akpɛ̃ kakpã ɔtã bo!"21Ne ɔso bokɛlɛgu karabara katɔ̃ ita i kaya gbɔgbɔɔgbɔ isɛ iabo ɔwi wɔ i awãmi sɛ abɔrɛ.22Ɔwi wɔmɔ ame ne loɣere maturi ana sɔ, "Ma ɔbiara gu ɔ̃ buaidze si mala maɔwe i Yerusalem ku kasɛ̃, si maaɖe madzuɛ̃se ku kasɛ̃ ame fiɛ ka maabara karabara ku ikpɛnɛ ame."23Ne ɔso mme oo, wũ manyii oo, ɣee wũ maɖabo oo gu wũ madzuɛ̃se ma mpia i wũ kɔrɛ ne, boiɖi bo arapia bosɛ. Ɔbiara ɔla akpakpɛ̃ra si ɔsɛ ɔka ndu ana kɔraa.The Seed Company