YESAYA65
Atɔ̃meiɣɛ Gu Iɖi
1Bosate sɔ, "Loɖi so lote mma loikarɛ me iti.Mma loinyɔnyɔ me, ma lonya me ne.Kaɖe ga loikpere wũ iyere ne,kã loɣere sɔ, 'Nya Mme i ngbe, nya Mme i ngbe.'2Lobusi wũ nrɔɔ̃ losɛ ku iyi ɔɖuɖu,lotã atsuele kaɖe maturi,nga nto kabara ara wa loilɛ,fiɛ kato kabara kã mɔmɔ ara wa kasɛ iso.3Maturi ma nto makɛlɛ i katɔ̃ mapia me sikpãi wũ anɔmi ame,mato masɔrɛ ara i kuwĩ amefiɛ masɛ matsuedza kuakɔrɔ̃kɔrɔã i siseata isɔrɛkusege iso.4Masɛ mabɔdzo masɛ i akpibiɔ ndɛ̃fiɛ masɛ mawe marɛ kaloi i iwɛrɛ ame.Masɛ mawe kparako sina,fiɛ kutu ku sina dzɛ loisekele sɛ siwe i silakutu ame.5Maturi magbe sɛ maɣɛ sɔ, 'Ya dzoroo; daabore abo me,alasɔ losekele gbaã loɖo-ɔ!'Matsuelese magbe igbã ɖe kuyɔ i wũ ɔɣɔ̃ amegu ɔtɔ wɔ nto ɔtsue ikpɛnɛ ɔɖuɖu.6"Nyɔ lo, matsɛrɛ masɛ i wũ anɔmi ame sɔ,loibalo ɣɛɛ loatã kuso iyi pɔpɔɔpɔ;loatã ma kuso losia i ma akpabɔ iso.7Loatã ma, ma akpi gu ma mawa akpi kuso,"ngbɔ i Bosate to ɔɣɛ ne."Alasɔ matsuedza kuakɔrɔ̃kɔrɔã i abe isofiɛ maiwarɛ me i abemi iso.Loasusu ira i akpabɔ iso lotã malosu lotã ma ara wa mabara mafegu kuso."8Bosate sɔ,"Lɛ kumɛgɔ si ndu pia i wain abo amefiɛ maturi sɛ maɣɛ sɔ, 'Daawɔra ne,isɛɛ ɔkpese ipia i ne ame ne,'kumɛɔ nto loabara i wũ maɖabo iti ne;loibawɔra ma ɔɖuɖu.9Loatã sikparɛ ɔbɔrɛ i Yakob ame,fiɛ mma loaɖe wũ abe lɛ kaɖekɔ̃ aabɔrɛ i Yuda.Wũ maturi ma loɖi lotã so aaɖe wãfiɛ wũ maɖabo aasɛ i mmɔ.10Saron aakpese mabɔi akuri sikuakaɖekɔ̃,fiɛ Axor Kagbolomi aaɖe mabɔi akuri ngbegɔ maafu i karɔ̃,itã wũ kaɖe ga nsɛ kabie me.11"Ɣɛɛ mi ma losɛ̃ Bosatefiɛ miɣara wũ kube sekelea,mi ma lotu ɔpɔrɔ̃ mitã Itilɛ kuɣɔ fiɛ mi ma loka wain sɛɛ ikɔkɔ iyi mitã Karekɔ̃ kuɣɔ ,12loaɖi mi lotã mikamu i ipɛmi kanya.Mi ɔɖuɖu to miabɔ ati karɔ̃ maɖoe mi.Alasɔ lokpere mi ɣɛɛ miitɔrã,loɖe ika miikã atsue.Mibara iranyanyariã i wũ anɔmi amefiɛ nnɛ loisɛ iɣɔ me anɔ miɖi mibara."13Ne ɔso Bosate Wɔ Nsiguso sɔ,"Wũ maɖabo to maaɖe arami ɣɛɛ ne, kukã to kuakpɛ̃ mi.Wũ maɖabo to maanɛ arami ɣɛɛ ne, kutukã to kuakpɛ̃ mi.Wũ maɖabo to maana isoɣɔmi ɣɛɛ ne, mato maapia mi kunuarɛ.14Wũ maɖabo to maaka kukamana isoɣɔ mabɔrɛgu i ma situ ame,ɣɛɛ mito miabiɛmibɔrɛgu i ɔtu ibo gu ibɛbɛrɛ amefiɛ mi siwarã aamararã so mibiɛ kaku.15Mito mianyua mi iyere misɛ mitãwũ maturi ma loɖi losɛ mala maɔgbarĩ ala.Bosate Wɔ Nsiguso to ɔ̃aɖoe mi.Ɣɛɛ ɔto ɔ̃atã ɔ̃ maɖabo iyere mama.16Ɔbiara wɔ loafere so kusɛkusɛ i karɔ̃ isoaasu Ɣaa wɔ nsɛ ɔɣɛ ɔnukuare ɔfere so kusɛkusɛ.Ɔbiara wɔ loakã ndamu i karɔ̃ isoaakã me i ɔnukuare Ɣaa iso.Alasɔ mato maaɣara inyɛwe nɛ mawe kokooko mafegufiɛ wũ anɔmi iisibasia i ne iso.Kato Ɣɛtɛ Gu Karɔ̃ Ɣɛtɛ
17"Nyɔ lo, nto loabarakato ɣɛtɛ gu karɔ̃ ɣɛtɛ.Maisibanyigi akuereraɣee aisibaba i adzuni ame.18Ɣɛɛ mina isoɣɔ si milɛlɛ ɔwi ɖaai nnɛ nto loabara iti.Alasɔ nto loabara Yerusalem ɔɖe ilɛlɛfiɛ ɔ̃ maturi aaɖe isoɣɔ.19Loana isoɣɔ i Yerusalem isofiɛ loana isoɣɔ i wũ kaɖe iso.Kaku ibiɛ gu imararãsoiisibare manɔ i ɔ̃ ame kini.20"Itɔbu kuwɛ̃ iisibafɔ ayi kɛkɛĩ kereikpi i ɔ̃ ame kuiyikuiyi,ɣee ɔkpakpa kuwɛ̃ iibakpi si ɔ̃ agbanayi iiyi.Nwɔ lokpi gɔ ɔfɔ akɔ kulafa nemanyɔ wũ sɔ ɔporoporoi kere ɔɖe.Ɔturi wɔ loifɔ akɔ kulafa nemaanyɔ wũ sɔ sigbarĩ siɖe.21Mato maatsue ayo masɛ i wã ame.Mato maakpɛ̃ wainnkpɛkɔ̃ fiɛ maaɖe ma mɔmɔ adziribi.22Maisibatsue ayo fiɛ maturi mama aaba maasɛ i wã ame.ɣee maisibapia ɔraɖui fiɛ maturi mama aaba maaɖe.Alasɔ lɛ kudziri sɛ kufɔ akɔ gbodzoo nengbɔ i wũ maturi ma loɖi lotã so aasɛ ngbã dzoroo ne.Wũ maturi ma loɖi losɛ aaɖe ara wa masuma nrɔɔ̃ mabara karabara mana, ne ɔwi aadzoro.23Maito maabara karabara siefefiɛ maibaɣe mabi makpi kutɔfɔkpi.Alasɔ maɖe Bosate maturi ma ɔfere kusɛkusɛ ɔso,Bosate aafere ma mabi gu mawa kusɛkusɛ ana.24Loatɔrã koko fiɛ maakpere me.Maibaɖe ika maro fiɛ loanɔ atɔ̃me.25Ɔgidi gu sɛrɛrerɔ̃ibi aaɖe ara masakanya,fiɛ dzata aawe sikua lɛ nantsuĩ awe.Ɣɛɛ sise loaɖe aɣɛ aɖera.Bɔi kuwɛ̃ iibabara iboa ɣee iibawɔra ira mamai wũ kube sekelea ɔɖuɖu iso."Bosate loɣɛ ne.The Seed Company