Read YESAYA 48

YESAYA48

Israel Maturi Atsuele

¹Bosate sɔ, "Yakob ɔkparɛ, mikã atsue si minɔ nnɛgbe,mi ma marɔ iyere sɔ Israelfiɛ miɖe Yuda ɔkparɛ.Mikã me atsue, mi ma nsɛ mikã ndamu i Bosate iyere isofiɛ misɛ mikpere Israel Ɣaa -ɣɛɛ iiɖe i ɔnukuare ɣee ara bɔlɔlɔa ibara ame -²mi mma nsɛ mikpere so sɔ ɔmagɛ̃siare sekelea kaɖemabifiɛ misɛ misiaiti i Israel Ɣaa iso -nwɔ iyere nɖe Bosate Ɔlesate.³Kokooko ne loɣere mi ara wa nto aaba,wũ kanya ɔɖi wã aɣɛ fiɛ lotã mi wã itsue.Ɔluwɛ̃ ne lota i ne iso, ne ara wamɔ ɔba i ne ame ne.⁴Alasɔ loɣe kumɛgɔ miba atsuele;fiɛ mi simɔ ɔka gbegbeegbe lɛ ibɔra,fiɛ mi atɔ̃gbo ɔkore lɛ ayiwa awe.⁵Ne ɔso loɣere mi ara wagbe kokooko;fiɛ aaba ne, loɖi wã kayi loɣere mi.Iyɔ ne aibawo ɔɣɛ kuiyikuiyi sɔ,'Wũ kuɣɔpɔa lobara ne,wũ kudziri kumiamia gu ibɔra ɣaa lotã ne iba.⁶Miɔnɔ ara wagbe; minyɔ wã ɔɖuɖu,ɣɛɛ misɛ̃ miifɔ ne mipia i kame."Kiniɔ ne loaɣere mi ara ɣɛtɛ,awɛrɛra wa miinɔ minɔ.⁷Maɔbara wã kiniɔ, aiɖe ara wa lobara ta kokooko;miinɔ wã iso ara fiɛ nɔme.Ne ɔso aibawo ɔɣɛ sɔ, 'Aĩ ka loɣe wã koko.'⁸Loɣe sɔ ɔturi wɔ loiɖe ɔnukuarese aɖe.Tsuelese maɔkpere-ɔ ita ɔwi wɔ maɣe-ɔ.Ne ɔso ainɔ anɔ kɔraa ɖuɖuuɖu; aiɣe ne kuiyikuiyi.Ta kokowi ne maibusi-ɔ atsue.⁹Ala wũ mɔmɔ iyere ɔso ne nsɛ lopia so i ɔyuɛ ame i wũ sikpã teterea iso.Ala wũ ile ɔso ne losia kɔrɔ̃ i wũ sikpã i fɔ iso,si loibawɔra-ɔ loɖi.¹⁰Nyɔ lo, loɔfore-ɔ, ɣɛɛ iiɖe lɛ sikãfudza awe.Loɔla-ɔ lonyɔ i inyɛwe ɔferewu ame.¹¹I wũ mɔmɔ iti, i wũ mɔmɔ iti, lobara ne.Be ɔso loatã masopara wũ iyere?Loibasu wũ kuwarɛ lotã ɔturi mama kuwɛ̃.

Kores, Tɔ̃ɖedze Wɔ I Bosate Ɔɖi

¹²Bosate sɔ, "Kã me atsue Yakob ɔkparɛ,Israel wɔ lokpere.Mme nɖe ɔ̃.Mme nɖe ɔɖeakatɔ̃ fiɛ Mme nɖe ɔtsɔra.¹³Wũ kɔrɔ̃ losu lopia karɔ̃ sikaĩ,fiɛ wũ kuɖearɔ̃ lowarɛ kato ame.Ɔwi wɔ lokpere wã ne,wã ɔɖuɖu ɔba aare asakanya.

¹⁴"Mi ɔɖuɖu miba miasakanya, si minɔ.Iɖe aɣɔpɔa wa loɣɛ ara wagbe asɛ?Bosate nwɔ ɔɖi ɔpia soaabara nnɛ sɔ ɔbara Babilon,fiɛ ɔ̃aɖi ɔ̃ ɔle ɔta ɔya i ma Babiloniase iso.¹⁵Mme, kɔraa Mme loɔɖe ika;loɔkpere Kores.Nto lokɔ wũ lobɔfiɛ nnɛ ɔto ɔ̃abara aare iti.

¹⁶"Mibore miba wũ kɔrɛ si mikã nnɛgbe atsue."Ta karɔ̃kasɛkɔ̃ ne loiɖe ika i iwɛrɛ ame.Lopia i mmɔ koko fiɛ iba."Ne Yesaya sɔ: Kiniɔ ne Bosate Wɔ Nsiguso loɔseseme ku ɔ̃ Siwarã.

Bosate Adzuni I Israel Maturi Iso

¹⁷Bosate, fɔ Ɖidze,Israel Ɔsekelea sɔ -"Mme nɖe Bosate fɔ Ɣaawɔ nsɛ ɔte-ɔ nnɛ nlɛ iɖo itã-ɔ.Mme nsɛ lokɔ-ɔ lokigu i ɔri wɔ iso aaki ne.¹⁸Si ɔkã akã wũ mmara atsue ne,tee fɔ isobuɛ aabore lɛ ɔwore awe,fiɛ isaruɛ aase lɛ ɔpo sipotutaa.¹⁹Fɔ ɔkparɛ aase lɛ iwarĩ awefiɛ fɔ mabi aasi lɛ iwarĩ abi wa nna kukame.Maibawɔra ma ayere kuiyikuiyiɣee manukutu wã maɖi i wũ anɔ."

²⁰Mirui i Babilon,mirui mitere i ma Babiloniase kɔrɛ!Miɖi nnɛgbe miɣɛ ku isoɣɔ kulusi mipɛ ne imomo.Miɖi ne miɣɛ misese karɔ̃ kawirikɔ̃.Miɣɛ sɔ, "Bosate ɔɔɖi Yakob,"²¹Kutukã iikpɛ̃ ma ku ɔwi wɔ ɔkɔ ma ɔkigu i fafuĩ ame.Ɔkɛ itane ndu ɔbɔrɛ pupuupu ne.Ɔtã ndu ɔbɔrɛ i ita ame mibore mitã ma.

²²Bosate sɔ, "Isobuɛ kuiwɛ̃ na itã matilese."

The Seed Company

https://app.library.bible/content/86f4bd306e059174