YESAYA46
Babilon Mila Maɣaa
1Bel kuɣɔ bɔitikarɔ̃, Nebo kuɣɔ bɔ anɔ karɔ̃;ma aɣɔpɔa wa masu masia i mabɔi ma nsɛ masore ato iso.Ara kumiamia ɔkpese ato wa mba ɔrɔrã,ato wa nto aɖa ma.2Maɣaa inyɔ ɔɖuɖu ɔbɔ ati katɔ̃ fiɛ mabɔ anɔ karɔ̃ masakanya;maibawo so ɔɖi gu maturi,mato makɔ ma makɛlɛgu karɔ̃ mama iso.3Bosate sɔ, "Yakob ɔkparɛ,mi ma ɔɖuɖu lokuti i Israel ɔkparɛ ame mikã me atsue.Mme lola mi kayiri fiɛ lokole mi ta sibiɛtɛ,fiɛ loɔnyɔ mi iso ta ɔwi wɔ maɣe mi.4Mme nɖe ɔ̃ ne, loaɖe mi Ɣaa i mi agbanayi amegbɔgbɔɔgbɔ iti aafudza ku akɔ.Mme lobara-ɔ fiɛ loanyɔ-ɔ iso.Loamɔɛ̃-ɔ lola fiɛ loaɖi-ɔ.5"Nna miasu me mikateragu, ɣee nna miasu me sɔ bokate?Nna nɖe nwɔ bo gu wũ ɔkate fiɛ miasu bo sɔ bore so?6Maturi mawɛ̃ ɔɖi ma sikãfudza gu sikãrɛtɛa i akpo ame maferene makere sikãfudza i ikerera iso.Ne mapia sikãrɛtɛatorese sɔ ɔsu ɔbara ɣaa,iyɔ maɔpɛ agɛgɛ̃ mabɔ ati karɔ̃ masumu ne.7Makɔlɛ ne masia fiɛ masore i ma amɔiti iso;masu ne maɣedza i ne kasɛkɔ̃ ne ka iɣɛ i mmɔ ne.Iɣɛ i mmɔ fiɛ iisɛ iwo ɔrui.Atoasɔ ɔturi sɛ ɔbiɛ ɔtã ne ne, iisɛ itã mmuai.Iisɛ iwo wũ ɔɖi i ɔ̃ amɔrɛã ame.8"Mi makpibaradze, minyigi nnɛgbe, mitã iwe mi i adzuni ame,iwe mi i ɔtu ame.9Minyigi ara wa loɔba afe, nwa kokooko.Mme nɖe Ɣaa, kuwɛ̃ mama siina;Mme nɖe Ɣaa fiɛ kuwɛ̃ na lɛ me.10Wũ ɔnɔwɛ̃ loawo nnɛ loaba ɔɣɛ fiɛ iaba.Nsɛ loɣɛ losɛ koko fiɛ isɛ iba.Nsɛ loɣɛ sɔ, Irabiara nɛ lobara adzuni losɛ aaba i ne ame,fiɛ loabara irabiara nɛ loɖɔɛ.11Lokpere ɔwɛ̃ lobɔrɛgu i kuɣɛ̃kabɔrɛkɔ̃ wɔ nse lɛ karodzai ga nsɛ kamɔɛ̃ ara kawe;lokpere ɔrɛrɛ̃ lobɔrɛgu i karɔ̃ dzoroa iso si ɔbara nnɛ loɖo losɛ.Nnɛ loɣɛ, ne loabara ne.Nnɛ lobara adzuni losɛ, ne loabara ne.12Mikã me atsue, mi ma situ logbogboro,mi ma lodzorogu ira bɔlɔlɔa ibara.13Nto lobɔ wũ sibɔlɔlɔ siɔbore sibo,iidzoro kɔraa,fiɛ wũ iɖi iibasɛ kama.Loasu iɖi lotã Zion,loasu ikpawaĩ lotã Israel.The Seed Company