YESAYA41
Ɣaa Ɔtã Israel Katetere
1"Milo i wũ anɔ, mi ndukilɔnrɔ̃!Tã nɖebi si mapia so ɔle ɣɛtɛ!Tã mabɔrɛ maba maaɖe ika;mitã bosarɛ i atɔ̃mekaɣɛkɔ̃.2"Nna lotara ɔwɛ̃ ɔbɔrɛgu i kuɣɛ̃kabɔrɛkɔ̃,ɔkpere wũ i sibɔlɔlɔ ame ɔbɔ i ɔ̃ karabara ame?Ɔtara nɖebi ɔpia wũ i nrɔɔ̃ amefiɛ ɔbɔ magara karɔ̃ i ɔ̃ katɔ̃.Ɔsɛ ɔkpesera ma ɔsebu ala ɔ̃ ipɛmi,ɔ̃ sirɛ̃ sɛ sisamera ma lɛ simɔɣo i ɔwiri kanya.3Ɔsɛ ɔtere ɔsiai ma gɔ kuira iisɛ ikparĩ wũ,i ɔri wɔ i ɔ̃ ngba iisɛ minya iso.4Nna loɔbara nnɛgbe fiɛ ɔtã iba i ne ame,ɔkpere siɣekparɛ dzɛ mpia i ta karɔ̃kasɛkɔ̃?Mme nɖe Bosate ku maɖeakatɔ̃ ameku matsɔra ana - mme nɖe wũ."5Ndukilɔnrɔ̃ ɔnya ne, ifɔ̃ ɔmɔɛ̃ ma;karɔ̃ kuwirikɔ̃ ɔti kukpakpa.Mabore mabo maba;6ɔbiara sɛ ɔbuai ɔ̃ ɔlaaɔɣere ɔ̃ ɔnyiibi sɔ, "We ɔle!"7Kusɛ̃ ɔturi sɛ ɔpia sikãrɛtɛa karabara baradze katetere,fiɛ nwɔ nsɛ ɔbara ara pɔlɔpɔlɔa ala ɔsɛ̃ sɛ ɔpianwɔ nsɛ ɔtore i itoreta iso katetere.Ɔɣere nwɔ nsɛ ɔwɛnɛkɛ̃ra abɔra ɔsakanya sɔ, "Ilɛ."Ɔpɛ kumiamia ɔbɔi ɔmatãra sɔ kuibata kupɛ.8"Ɣɛɛ fɔ, O Israel, wũ ɔɖabo,Yakob, nwɔ loɖi losɛ,Abraham wũ ɔlaa mawa,9lokɔ-ɔ lobɔrɛgu i kayi kawirikɔ̃ta kadzorokɔ̃ akpakpai iso lokpere-ɔ lobɔrɛgu.Loɣɛ sɔ, 'Wũ ɔɖabo aɖe'.Loɖi-ɔ lotã so fiɛ loibasɛ̃-ɔ.10Ne ɔso daanigã alasɔ lopiagu-ɔ;we katetere alasɔ Mme nɖe fɔ Ɣaa.Loapia-ɔ ɔle fiɛ loabuai-ɔ;loadzuɛ̃-ɔ ala wũ kuɖearɔ̃ bɔlɔlɔa.11"Mma ɔɖuɖu nto marɛ̃ sikpã i fɔ iso ne,kunuarɛ aakpɛ̃ ma masopa;mma lota maɣɛ-ɔ isoiibare kuira fiɛ maawɔ.12Atoasɔ aanyɔnyɔ fɔ matsirise ne,aibanya ma.Mma lota kakpã i fɔ isoiibare kuira ɖuɖuuɖu.13Alasɔ Mme nɖe Bosate, fɔ Ɣaa,nwɔ nsɛ ɔmɔɛ̃-ɔ i fɔ kuɖearɔ̃ nsɛɔɣere-ɔ sɔ, Daanigã;loto loabuai-ɔ.14Daanigã, O irɔrɛ̃ Yakob,O Israel kosoi,alasɔ Bosate sɔ, "Mme mɔmɔ loabuai-ɔ,"fɔ Ɖidze, Israel Ɔsekelea.15"Nyɔ, loasu-ɔ lobara lɛ kamɔpɛkolo,ɣɛtɛ nɛ mba ɔle fiɛ itiri.aarui abe abibiɛ wã,akpesera kubemi simɔɣo.16Aafɛ ma fiɛ ɔwiri aasu wã,fiɛ kagbadadururu aasore wã kakɛlɛgu.Ɣɛɛ fɔ so aaɣɔ-ɔ i Bosate isogu ɔle wɔ mpia i Israel Ɔsekelea ame.17"Mawɛrɛba gu maɣiãni to mabie ndu,ma sinyagɛmi ɔɔkore ala kutukã.Ɣɛɛ Mme Bosate aatã ma mmuai.Mme, Israel Ɣaa iibakora kama lotã ma.18Loatã siwore ɔbore ɔkore sibɔrɛ i kubemi korea iso,ndu ɔgodɛ̃ i kugbolomi ame.Loatã fafuĩ ame ɔyi ku atubu,ndugodɛã siwore ɔbore i karɔ̃ korea iso.19I fafuĩ ame ne,loatã seder adziri, akesia, matɔdzitɔ gu nnɔĩ adziri ɔre.Loapia sivɛi i karɔ korea iso,sɛsɛi gu kutekpakpã ana aare,20sɔ maturi aanya, matsue,aadzuĩ manɔkarɔ̃,sɔ Bosate kɔrɔ̃ lobara nnɛgbe,sɔ Israel Ɔsekelea loɖi ne.21Bosate sɔ, "Mibɔ mi itɔ̃me."Yakob Igara sɔ, "Mibɔ mi atɔ̃me ikpadzɛ̃."22"Mibɔ mi aɣɔ si aɣere bonnɛ nto iba iaba.Miɣere bo ara kuere wa loɔfe,si boabu wã bonyɔbotsue nnɛ loabɔrɛ i ne ame.Ɣee ɣere bo ara wa loaba,23miɣere bo nnɛ i kɔrãkaɖe aabɔ,si boatsue sɔ aɣɔ miɖe.Mibara ira, isɛɛ ɣee ilalaa,si ibara bo ɣii ɣee ipia bo ifɔ̃.24Ɣɛɛ miiɖe kuirafiɛ mi kurabarara ana na i kuira ame;nwɔ nsiai mi ne, katurisasoi ɔɖe.25"Loɔtidza ɔwɛ̃ i kato isɛ fiɛ ɔto ɔba -ɔwɛ̃ wɔ lobɔrɛ i kuɣɛ̃kabɔrɛkɔ̃ isɛ nwɔ nsɛ ɔkpere wũ iyere.Ɔsɛ ɔnene mma nto maɖeiso lɛ sise awe,lɛ rapɔse nto ɔbio sise awe.26Nna loɣɛ nnɛgbe ta karɔ̃kasɛkɔ̃, sɔ boawo ɔtsueɣee fiɛ kiniɔ, sɔ boawo ɔɣɛ sɔ, "Gbaã iɖe ɔɣɛ?Kuwɛ̃ iiɣɛ nnɛgbe,kuwɛ̃ iiɣɛ ne ɔsɛ,kuwɛ̃ iinɔ kuira ɔbɔrɛgu i mi kɔrɛ.27Mme loɖe katɔ̃ loɣere Zion sɔ, 'Nyɔ, nya ma i ngbe!'Losese Yerusalem itɔ̃me bielea katɔ̃mesɛdze.28Lonyɔ, ɣɛɛ kuwɛ̃ na -kuwɛ̃ na i ma ndɛ̃ ɔ̃atã adzuni,kuwɛ̃ na ɔ̃atã mmuai gɔ lokarɛ ma.29Nyɔ, ma ɔɖuɖu ɖe maladze!Ma kurabarara iiɖe kuira;ma aɣɔ ne, ɔwiri gu ikpɔkpɔtɔ aɖe.The Seed Company