YESAYA29
1Ndzo mitã-ɔ Ariel, Ariel,ɔmagɛ̃ wɔ ame i David ɔsɛ!Bua ikɔ i ikɔ isosi atã fɔ ayi iɖe si akɛlɛ i katɔ̃.2Ɣɛɛ loapia ɔkpã loki lolɔ Ariel;ɔ̃abiɛ ɔwãnaɔ̃ase lɛ kasege ɔtã me.3Loapɛ kakpã ɔgba lopia-ɔloatsue kakpã ayo kɔlɛa loki lolɔ-ɔfiɛ loali-ɔ kakpã adziriku.4Gɔ maɔbɔ-ɔ karɔ̃ ne, aaɖe ika abɔrɛgu i karɔ̃ ame;Fɔ ikaɖe abɔrɛ i karɔ̃ ame lɛ kaɣɔdɛ̃.Fɔ silɔ aabɔrɛ i karɔ̃ ame lɛ kpise awe.Ato aaɣɛ siwɔwɔi abɔrɛgu i karɔ̃ ame.5Ɣɛɛ fɔ matsirise gbodzoo aakpese lɛ ɔsebu,ɔwiri aafuri maturi lalaa ma nto mapia-ɔ ifɔ̃ ɔruigu lɛ sirɔ̃.Mala, ɔluwɛ̃,6Bosate Ɔlesate aabaku kadoiɖu gu karɔ̃iti gu kulu titiiti,ku ɔwiri teterea gu awɛ gu ɔtɔ wɔ loatsuedza ara.7Iyɔ nɖebi lalaa mɛ maturi nto makpɛ̃gu Ariel,ma nto makpɛ̃gu wũ gu ɔ̃ ɔmagɛ̃ wɔ matsue ibere maki malɔ fiɛ mali wũ kakpã adziriku,aase lɛ kurɛ,lɛ kaɖikate i kasɛ̃ ame -8lɛ ɔturi wɔ i kukã to fiɛ ɔsɛ̃ kurɛ sɔ ɔto ɔɖe aɖera,ɣɛɛ ɔsɛ ɔrɛgɛ̃ ne, kukã to wũ ana;lɛ nwɔ i kutukã to ɔsɛ̃ kurɛ sɔ ɔto ɔnɛ ndu,ɣɛɛ ɔsɛ ɔrɛgɛ̃ ɔto ɔfɛ̃ ku kutukã, ɔme togu wũ ikore.Ngbɔ iase nɖebi lalaa ɔɖuɖuma nto makpɛ̃gu Zion Kube ne.9Misusu si ibara mi ɣii,mibiɛ anɔ si midaanya ara;mirɛ̃ ndã mɛ miinɛ,minene mipia so, ɣɛɛ miito mirɛ̃ ndã.10Bosate ɔɔsia mi sirɛ wodoroa iso:Ɔ̃ɔtɛ̃ mi anɔmi (kanyamaɖidze);ɔ̃ɔfu mi ara i ati (mi maranyadze).11I mi kɔrɛ ne, kaɖikate gagbe ɔɖuɖu se kere lɛ atɔ̃me wa matsɛrɛ i kakosɛ iso fiɛ masɛ̃ kanya. Fiɛ si misu kakosɛ mitã ɔrere wɔ loawo ɔka, miɣere wũ sɔ, "Loto-ɔ i kukpa, ka nnɛgbe tã me." ne, ɔ̃atã-ɔ mmuai sɔ, "Masɛ̃ ne kanya, loibawo ɔka."12Ɣee si misu mitã ɔrere wɔ loibawo ɔka miɣere wũ sɔ, "Loto-ɔ i kukpa ka nnɛgbe tã me." ne, ɔ̃atã-ɔ mmuai sɔ, "Loiɣe ɔko ika."13Bosate sɔ,"Maturi magbe to maba i wũ kɔrɛ ku ma kanyamale me ku kanya kunu,ɣɛɛ ma situ ɔdzorogu me.Wũ kasumu ga mato mabara ne,maturi mmara mɛ mabara kere miɖe. Siefe mato masumu me;14Loto loaledza nnɛ loabara mmagbe ɣii ibaraiwawãra ikpa iwawãra;mawolai iwola aawɔ;mma nɣe ɔko ikotsue aayu."15Ndzo mitã mma nsɛ makɛlɛ dzoroosɔ maakɔla ma adzuni i Bosate kɔrɛ,masɛ mabara ma ara i idududu ame mabu sɔ,"Nna nto ɔnya bo? Nna loatsue?"16Misɛ mifirikira ara iti mito,Mibara lɛ sise dzɛ masɛ mapɔ ala ara nɖe rapɔdze!Ira nɛ mato mapɔ sɛ iɣere nwɔ nto ɔpɔ ne sɔ,Iiɖe fɔ lopɔ me"?Ibui aawo rapɔdze ɔɣere sɔ,"Aiɣe kuira"?17I ɔwi kurukutu ame ne, Lebanon iibakpese kakpɛrɔ̃ sɛɛkakpɛrɔ̃ sɛɛ ga lonyɔ lɛ ipo?18Ɔwi wɔmɔ ne, matsuetɛ̃se aanɔ ɔko ame atɔ̃me,mabɔrɛ i nnya gu idududu amemanɔbiɛdze anɔ aanya ara.19Mma lobɔsokarɔ̃ to maaledza isoɣɔ ina i Bosate ame,so aaɣɔ maɣiãni i Israel Ɔsekelea iso.20Maturi dzeredzerea aayu,mma nsɛ mabara aɣiãra iisibawe,fiɛ mma nsɛ masu anɔmi mabara ala ikpi ne, maaɖoe ma -21mma iki i ma itɔ̃meiɣɛ ame aatã ɔturi ipɔ,mapia nwɔ makɛlɛgu atɔ̃mekaɣɛkɔ̃ i itɔ̃me amemasu aɖansiɛ matã nwɔ loɖe ibɛ ipɔ.22Ne ɔso kumɛgɔgbe i Bosate wɔ loɖi Abraham to ɔɣere Yakob iyo i ngbe ne:"Kunuarɛ iisibakpɛ̃ Yakob;ma katɔ̃ iisibase foee.23Si manyɔ ma mabi ndɛ̃ ne,wũ nrɔɔ̃ ame karabara,maala wũ iyere sekelee;maaɖi Yakob Ɔsekelea mate,maya i Israel Ɣaa kunigã ame.24Mma loɣɛrɛ i siwarã ame aatsue ara;mma nto maɣɛ kusakuso aafɔ ara isuã."
The Seed Company