YESAYA19
Ɣaa To Ɔ̃akpadzɛ̃ Egipte Kutsue
1Kaɣɛkasɛ i Egipte iso i ngbe ne.Nyɔ, Bosate si i adɔdɔ wa ntere teteree isoɔto ɔba Egipte.Egipte aɣɔ to ati akpakpa i ɔ̃ katɔ̃fiɛ situ ɔkpa ma Egiptese.2"Loatara ma Egiptese loɣedza so isoƆnyiibirɛrɛ̃ aakpɛ̃gu ɔnyiibirɛrɛ̃,ɔgbamikui aakpɛ̃gu ɔgbamikuiɔmagɛ̃siare aakpɛ̃gu ɔmagɛ̃siare,sigarakaɖekɔ̃ ɔkpɛ̃gu sigarakaɖekɔ̃.3Ɔtu aakpa ma Egiptese,loatã sɔ ara wa maɖo iibaba i ne ame;maakpere ma aɣɔ gu makpise,mawase gu makpise makperedze.4Loaɖi ma Egiptese lotãɔkɔse wɔ mba ɔtilefiɛ igara wɔ lonyanyarĩ aaɖe ma iso."Ngbɔ i Bosate Ɔlesate ɔɣɛ ne.5Ɔwore ame ndu aasɔ̃ɔwore ndɛ̃ karɔ̃ aafafã kakɛkɛ.6Kuworenya ame aafɔrɛ̃;Egipte siwore ame ndu aaro fiɛ miasɔ̃iwolowala gu iba ame sikua aaɣɔ,7ngbɔ ame i Nil ɔkpokpo siraɖui gu adziri anaisɛ iabo ta ɔwore kanyankpɛkɔ̃ mɛ ɔɖuɖu mpia i Nil ɔkpokpoaakore mitsue kuɣɛ̃ pelepele.8Makpɛɖidze aamararã so mawana,mma ɔɖuɖu nsɛ mapia ɖaɖiwa i Nil ame,mma nsɛ mapia asabu i ndu isoaare nrɔɔ̃.9Mma nsɛ mata ɖɔti aakpɔkpɔtɔmma nsɛ mawe sikati ɖɔbɔrɔa aayu ɔriinyɔ.10Mma nsɛ mabara sikati karabara aabo nnyafiɛ ɔtu aabiɛ kuwakpia marabaradze ɔɖuɖu.11Zoan makpakpa ne, matikpise maɖe,Igarakpakpa madzunitãdze wolai sɛ matã wũ adzunikpia.Nda miaɣere Igarakpakpa sɔ,"Manɔgbadze ɔwɛ̃ loɖemakuere magara rasuãdze loɖe?"12Lɛ i mi mawolai pia kiniɔ?Mate mi si matã mitsuennɛ i Bosate Ɔlesateɔɖo sɔ ɔ̃abara i Egipte.13Zoan makpakpa ɔɔkpese matikpisemaɔsɔsɔla Memfis matɔ̃ɖedze;mma iso i kaɖe piɛtɛɔɔkã Egipte kaɖe mayura.14Bosate ɔɔfedzaikigu siwarã ɔfere i ma iso;matã Egipte to ɔnene ɔpia so i irabiara nɛ ɔto ɔbara amelɛ kumɛgɔ i tarɛ̃se sɛ ɔnene ɔpia so ɔki ɔlɔ ɔ̃ kura.15Egipte iisibawo kuira ɔbaraɔna iti ɣee ngba, ɔkɛ ɣee kakpeku.16Ɔwi wɔmɔ ame ne, ma Egiptese aakpese lɛ marɔ̃go. Maati makpakpa i ifɔ̃ ame ala kɔrɔ̃ gɔ i Bosate Ɔlesate ɔkɔlɛ i ma iso ɔso.17Yuda karɔ̃ aapia ma Egiptese ifɔ̃, ɔbiara wɔ kɔrɛ maarɔ Yuda iyere ne, ifɔ̃ aamɔɛ̃ wũ ala nnɛ i Bosate Ɔlesate to ɔɖo sɔ ɔ̃abara ma ɔso.18Ɔwi wɔmɔ ame ne, simagɛ̃siare iru i Egipte aaɣɛ Kanaan siɖe fiɛ maakã ndamu matã Bosate Ɔlesate sɔ maaɖe ɔ̃ mare. Ma ɔwɛ̃ maarɔ sɔ Kuɣɛ̃ Ɔmagɛ̃siare ne.19Ɔwi wɔmɔ ame ne, isɔrɛkasege aaya i Egipte ndɛ̃ katã Bosate fiɛ maatsue ikparĩ itera matã Bosate i ma kume iso.20Iaɖe ikparĩ gu aɖansiɛ itã Bosate Ɔlesate i Egipte karɔ̃ iso. Si mabiɛ makpere Bosate i mma nto mabara ma kako iti ne, ɔ̃asese ma ɖidze gu fɔdze wɔ loaɖi ma.21Ne ɔso Bosate aaɖi so ɔte ma Egiptese fiɛ ɔwi wɔmɔ ame ne, maafɔ Bosate mapia. Maasɔrɛ wũ ku ala asɔrɛ gu geɖebu asɔrɛ, maakã ndamu matã Bosate mabara i me iso.22Bosate to ɔ̃apia Egipte ɔnyɛ, ɔ̃apia ma ɔnyɛ fiɛ ɔ̃asa ma. Maafiriki makɛlɛ Bosate kɔrɛ, ɔ̃afɔ ma iti itã fiɛ ɔsa ma.23Ɔwi wɔmɔ ame ne, ɔri siare to ɔ̃awe ita i Egipte ikpa Asiria. Ma Asiriase aasɛ Egipte fiɛ ma Egiptese aasɛ Asiria. Ma Egiptese gu ma Asiriase aasɔrɛ Bosate masakanya.24Ɔwi wɔmɔ ame ne, Israel loaɖe karɔ̃ tɛare kabua i Egipte gu Asiria iso gɔ ma itɛɔ aaɖe kusɛkusɛ matã kayiiso.25Bosate Ɔlesate aafere ma kusɛkusɛ ɔɣɛ sɔ, "Kusɛkusɛ itã wũ maturi ma Egiptese, kusɛkusɛ itã ma Asiriase ma lobara ala wũ arɔĩ, kusɛkusɛ itã Israel ma nɖe wũ kaɖekɔ̃."The Seed Company