EZEKIEL35
Kanyaiɖi Ita Iya i Edom Iso
1Bosate itɔ̃me ɔba me sɔ,2"Ɔturi awune ɔbi, su fɔ anɔ sɔ̃ i Seir Kube iso si aɖikanya i kɔ̃ iso3aɣɛ sɔ, ' Bosate Wɔ Nsiguso sɔ: Lota loɣɛ-ɔ iso, Seir Kube, nto loanabarã wũ kɔrɔ̃ lota loya-ɔ iso fiɛ loabara-ɔ aɖe ikpakpi gu fafuĩ.4Nto loabara fɔ simagɛ̃ ɔkpese ikpakpi fiɛ aakpese fufuĩ ame. Iyɔ mito miatsue sɔ Mme nɖe Bosate.5" 'Ala mitsiri Israel ɔwi biara ɔso ne, misu ma mipia i ipɛmi kanya ku ɔwi wɔ kukpakpi ɔba i ma iso, ku ɔwi wɔ mapia i kutsueikpadzɛ̃ ɔwi tsɔra ame,6Bosate Wɔ Nsiguso sɔ ne ɔso ayi kumɛgɔ lopia ngbã ne, nto loasu-ɔ lopia i ituriɖue nrɔɔ̃ ame fiɛ ito iasiai-ɔ. Gɔ aisɛ̃ ituriɖue ne, ituriɖue to iatere isiai-ɔ.7Nto loabara Seir kube ɔkpese ikpakpi gu fafuĩ ame fiɛ loawɔra maturi ɔɖuɖu ma nsɛ maba fiɛ masɛ makpese i kɔ̃ iso.8Nto loayira fɔ abe ku makpise, mma maɖue ku ipɛmi to marɔ̃ i fɔ abemi iso gu i fɔ kugbolomi gu i siwore ɔɖuɖu kɔrɛ.9Nto loabara-ɔ aɖe ikpakpi gu fafuĩ ɔwi daaro. Maturi iisibasɛ i fɔ simagɛ̃ ame. Iyɔ ato aatsue sɔ Mme nɖe Bosate.10" 'Ala ɔɔɣɛ sɔ, "Nɖebi minyɔ mɛgbe gu nrɔ̃ to miaɖe bo mire fiɛ boto boafɔ me," atoasɔ Mme Bosate loɔwe i mmɔ.11Bosate Wɔ Nsiguso sɔ: Ne ɔso ayi kumɛgɔ lopia ngbã ne, nto loabara-ɔ i sikpã gu sirerɛ dzɛ aɖikayi i fɔ itsiri nɛ aba atã ma ame kanya. Ne nto loatã Israel ɔtsue me i ma ndɛ̃ si lokpadzɛ̃-ɔ kutsue.12Iyɔ ato aatsue sɔ Mme Bosate lonɔ sitia ara ɔɖuɖu wa aɣɛ ata aya i Israel abe iso. Aɣɛ sɔ, "Maɔbara ma makpese ikpakpi fiɛ maɔsu ma mapia i bo nrɔɔ̃ ame sɔ bokɛkɛ."13Aɖe ndamu i wũ iso ne aɖeika ata aya me iso gɔ aipia ɔnyagɛmi i irɛkpo, ne lonɔ ne.14Bosate Wɔ Nsiguso sɔ: Nto loabara-ɔ akpese ikpakpi iyɔ kayiiso maturi ɔɖuɖu to mana isoɣɔ.15Ala ana isoɣɔ ku ɔwi wɔ i Israel kaɖe kaɖekɔ̃ ɔkpese ikpakpi ɔso ne, kumɛɔ ame nto loabara-ɔ ne. Ato aakpese ikpakpi lo, Seir Kube, mi gu Edom karɔ̃ ɔɖuɖu. Iyɔ mato maatsue sɔ Mme nɖe Bosate.' "The Seed Company