EZEKIEL22
Yerusalem Akpi
1Bosate itɔ̃me ɔba me sɔ,2"Ɔturi awune ɔbi, ato aaɣɛgu ɔmagɛ̃siare itɔ̃me? Ato aaɣɛgu ituriɖue ɔmagɛ̃siare wɔgbe atɔ̃me? Iyɔ ne su ɔ̃ anyanya kubarara ɔɖuɖu sɛ i ɔ̃ anɔ3si aɣɛ sɔ, ' Bosate Wɔ Nsiguso sɔ: O maturiɖuese ɔmagɛ̃siare wɔ nsɛ ɔkpadzɛ̃ kutsueikpadzɛ̃ ɔbɔ so iki i imaiferekarɔ̃ i ɔ̃ ame fiɛ ɔsɛ ɔpukutura so ku arapɔa ibara.4Ɔɔɖe ipɔ ala ima nɛ afere i karɔ̃ fiɛ ɔɔpukutura so ala arapɔa wa abara ɔso. Ɔɔkpadzɛ̃ fɔ ayi abɔ kawirikɔ̃, ne fɔ akɔ kawirikɔ̃ ɔɔba ne. Ne ɔso nto loabara-ɔ aɣiãra ira lotã nɖebi gu simaira lotã nrɔ̃ ɔɖuɖu.5Mma i kakotekɔ̃ gu mma i kadzorokɔ̃ to maabara-ɔ aɣiãra sɔ, O ɔtile ɔmagɛ̃siare, ɔyigu ikpɔkpɔtɔ.6" 'Nyɔ kumɛgɔ i Israel tɔ̃ɖedze biara wɔ i fɔ ame sɛ ɔsu ɔ̃ ɔle ɔfere ima i karɔ̃.7Maturi sɛ manyɔ ma mase gu ma manyi pupurii i fɔ ame. Maɔyika mafɔ mabɔkarɔ̃ fiɛ maɔbara makpisemare gu masekpibi ɔtile i fɔ ame.8Miɔnyɔ wũ ara sekelea pupurii ne mipia wũ Awarãyi ɔgu.9Marɛrɛ̃ ma nsɛ manina maturi mama ayere fiɛ masɛ maɖue maturi pia i fɔ ame. Mma nsɛ maɖe ara i aɣɔka fiɛ masɛ mabara situripɛ̃ ara pia i fɔ ame.10Mma nsɛ marɛgu ma mase mare pia i fɔ ame. Mma nsɛ mapɛgu marɔ̃go ma nɣɛ i kayoma gɔ maisekele i kubarara kanya pia i fɔ ame.11I fɔ ame ne ɔrɛrɛ̃ sɛ ɔbara iɣɛrɛ nyanyariã ku ɔ̃ ɔnyii ɔre. Ɔmama sɛ ɔrɛgu ɔ̃ ɔbire ku kunuarɛ fiɛ ɔmama sɛ ɔpɛgu ɔ̃ mɔmɔ ɔnyiiko wɔ nɖe ɔ̃ ɔse ɔbibirɔ̃gomi.12I fɔ ame ne maturi sɛ mafɔ kawɛrɛra maɖue maturi. Misɛ mifɔ kusia gu kusia ife isi si minyɛ sikã mitã fiɛ misɛ mina kusia gɔ loikote mibɔrɛgu i mi manyii iyu ame. Ne miɔɣara me ne, Bosate Wɔ Nsiguso loɣɛ.13" 'Gbaã ne nto loapɛ arɔ̃kpasa ala kusia gɔ mina kuikote gu ima nɛ mifere i karɔ̃ i fɔ ame iti.14Mi katetere ɣee mi nrɔɔ̃ to miawe ɔle ku iyi nɛ loaɣɛgu mi itɔ̃me? Mme Bosate loɔɣɛ ne fiɛ nto loabara ne.15Nto loasamera mi lopia i nɖebi ndɛ̃ fiɛ losa mi lopia i nrɔ̃ ame. Ne loasu mi idaasekele lobɔ kawirikɔ̃.16Si nɖebi maturi ɔɔpukutura mi ne, mito miatsue sɔ Mme nɖe Bosate.' "Ɣaa Isekelera Ɔferewu
17Kere ne Bosate itɔ̃me ɔba me sɔ,18"Ɔturi awune ɔbi, i wũ kɔrɛ ne Israel kaɖe ɔkpese lɛ ibɔratini nɛ nsɛ ikuti si mawanɛkɛ̃ra sikãfudza. Ne ɔɖuɖu ɖe ibɔrarɛtɛa, ibɔrabui, ibɔrakpinaa gu sompi wa lokuti i ɔferewu ame. Aɖe ara wa nsɛ akuti si mawanɛkɛ̃ra sikãfudza.19Ne ɔso Bosate Wɔ Nsiguso sɔ, 'Ala mi ɔɖuɖu ɔɔkpese ibɔratini nɛ lokuti si mawanɛkɛ̃ra sikãfudza ɔso ne, loasa mi kanya lopia i Yerusalem.20Lɛ kumɛgɔ maturi sɛ masa sikãfudza, ibɔrarɛtɛa, ibɔrakpinaa, sompi gu ibɔrabui kanya mapia i ɔferewu ame si mawanɛkɛ̃ra ku ɔtɔ siare ne, kumɛɔ nto loasa mi kanya i wũ sikpã gu sikpã teterea ame, losu mi lopia i ɔmagɛ̃siare ame fiɛ loawanɛkɛ̃ra mi ne.21Nto loasa mi kanya fiɛ loafuĩdza wũ sikpã teterea dzɛ nse lɛ ɔtɔ lofere i mi iso, ne mito miawanɛkɛ̃ i ɔmagɛ̃siare ame ne.22Lɛ kumɛgɔ masɛ mawanɛkɛ̃ra sikãfudza i ɔferewu ame ne, kumɛɔ mato maawanɛkɛ̃ra mi i ɔ̃ ame. Iyɔ mito miatsue sɔ Mme Bosate ɔɔfedza ɔ̃ sikpã teterea ɔfere i mi iso.' "Israel Matɔ̃ɖedze Akpi
23Bosate itɔ̃me ɔba me ana sɔ,24"Ɔturi awune ɔbi, ɣere maturi ma i Israel karɔ̃ iso sɔ, 'Aɖe karɔ̃ ga loisɛ ka ɔ̃ɔna kado kuwɛ̃ ɣee kado inyɛnyɛrɛ̃ ku wũ sikpã teterea ɔwi.'25Maɖeisoi sɛ mabara adzuni awɛ̃ i ɔ̃ ame lɛ dzata wɔ nto ɔfafã ɔkɛkɛ ira nɛ ɔmɔɛ̃. Masɛ makɛkɛ maturi masu arakɔlaa gu arafɔkuɣa ku ɔɣiɛ fiɛ masɛ matã makpisemare ɔsi i ɔ̃ ame.26Ɔ̃ masɔrɛdze sɛ matu wũ mmara fiɛ masɛ mapukutura wũ ara sekelea. Maisɛ mapia ikpaki i ira sekelea gu nnɛ loisekele ndɛ̃. Masɛ mate sɔ ikpaki kuiwɛ̃ na i nnɛ losekele gu nnɛ loisekele ndɛ̃. Ne masɛ mama anɔmi masia i wũ Awarãyi imɔɛ̃ ila iso. Ne ɔso masɛ mapia me kunuarɛ i ma ndɛ̃.27Ɔ̃ makpakpa ma i ɔ̃ ame se lɛ magidi nto makɛkɛ nnɛ mamɔɛ̃. Masɛ mafere ima i karɔ̃ fiɛ masɛ maɖue maturi si mana sikã i ɔri wɔ loiya iso.28Ne ɔ̃ kanyamaɖidze sɛ makua ara wagbe ku kasɔla kuɖikute gu mila sibɔipɛ. Masɛ maɣɛ sɔ, ' Bosate Wɔ Nsiguso sɔ' - ku ɔwi wɔ i Bosate iiɖeika.29Maturi ma i karɔ̃ iso sɛ maɖe amumu fiɛ masɛ mayukayu. Masɛ mayika mawɛrɛba gu maɣiãni mabɔkarɔ̃. Ne masɛ mabara mafɔ kako masɛ̃ itɔ̃meɣɛiriso itã ma.30"Lonyɔ ɔri lotã ɔrere wɔ loaledza ibere itara i ma ndɛ̃ fiɛ ɔ̃aya i wũ anɔ i kabiɛkɔ̃ i karɔ̃ anemu, si loibasɛ loawɔra kã, ɣɛɛ loinya kuwɛ̃.31Bosate Wɔ Nsiguso nto ɔɣɛ sɔ, ne ɔso nto loafedza wũ sikpã teterea lofere i ma iso fiɛ loawɔra ma ku sikpã dzɛ nsɛ sitsue lɛ ɔtɔ. Loto loasu nwa ɔɖuɖu maɔbara ikpe losia i ma mɔmɔ ati iso."The Seed Company