2 SAMUEL9
David Ɔbara Mefiboset Kayiribielea
1Iyi iwɛ̃ ne David ɔkarɛ sɔ, "Ɔturi ɔwɛ̃ ɔkuti ɔpia ngbã i Saul iyo ame gɔ loawo wũ kayiribielea ɔbara ala Yonatan ɔso?"2Kiniɔ ne ɔɖabo ɔwɛ̃ wɔ lonyɔ Saul iyo iso marɔ sɔ Ziba ɔwe. Makpere wũ sɔ ɔba i David katɔ̃, ne gɔ ɔba ne, igara ɔkarɛ wũ sɔ, "Fɔ marɔ Ziba ne?"Ne ɔtã mmuai sɔ, "Igara, mme loɖe."3Ne igara ɔkarɛ wũ sɔ, "Ɔturi ɔwɛ̃ ɔkuti ɔpia ngbã i Saul iyo ame gɔ loabara wũ Ɣaa kayiribielea?"
Ne Ziba ɔtã mmuai sɔ, "Yonatan ɔbibirɛrɛĩ ɔwɛ̃ wɔ nɖe bafã i ngba me minyɔ ɔɖuɖu ɔkuti ɔpia."4Igara ɔkarɛ wũ sɔ, "Lɛ ɔpia?"
Ziba ɔtã mmuai sɔ, "Ɔpia i Makir, Amiel ɔbibirɛrɛĩ iyo i Lo Debar."5Ne ɔso Igara David ɔtã masɛ maakɔ wũ mabɔrɛgu i Lo Debar i Makir, Amiel ɔbibirɛrɛĩ iyo mabɔ.6Ɔwi wɔ i Mefiboset, Yonatan ɔbibirɛrɛĩ, Saul ɔwabirɛrɛĩ ɔba David kɔrɛ ne, ɔbɔitikarɔ̃ ɔtã wũ i kuwarɛ ame.
David ɔkpere wũ sɔ, "Mefiboset!"
Ne ɔtã mmuai sɔ
"Nya mme, Igara."7David ɔɣere wũ sɔ, "Daanigã, loabara-ɔ kayiribielea ala fɔ ɔse Yonatan ɔso. Loasu nrɔ̃ mɛ ɔɖuɖu loɖe fɔ ɔwa Saul mire lotã-ɔ fiɛ aaɖe ara i wũ ɔpɔrɔ̃ iso ɔwi biara ita i nɔme."8Mefiboset ɔbɔitikarɔ̃ ɔɣɛ sɔ, "Be i fɔ ɔɖabo wɔ loiɖe kuira ɖe i fɔ anɔ fiɛ ato amararã so i wũ iso?"9Ne igara ɔpia makpere Ziba wɔ loɖe Saul ɔɖabo mabɔ, ne ɔɣere wũ sɔ, "Loɔsu irabiara nɛ nɖe mi ɔkɔse Saul gu ɔ̃ iyomaturi ire lotã ɔ̃ ɔwabirɛrɛĩ.10Mi gu fɔ mabi gu fɔ maɖabo si mikpɛ̃ mitã wũ sɔ miasu araɖea minyɔ mi ɔkɔse ɔwabirɛrɛĩ iso. Mefiboset wɔ nɖe mi ɔkɔse ɔwabirɛrɛĩ aaɖe aɖera i wũ ɔpɔrɔ̃ iso ɔwi biara." (Iba sɔ, Ziba ɔwe mabi iweo-iru gu maɖabo sinyɔ.)11Ne Ziba ɔɣere igara sɔ, "Fɔ ɔɖabo aabara irabiara nɛ i wũ ɔkɔse igara ɔɣere ɔ̃ ɔɖabo sɔ ɔbara." Ne ɔso Mefiboset ɔɖe ara i David ɔpɔrɔ̃ iso lɛ igara mabibirɛrɛĩ ndɛ̃ ɔwɛ̃.12Mefiboset ɔwe kabi poroporoi ga marɔ sɔ Mika, fiɛ Ziba gu ɔ̃ iyomaturi ɔɖe Mefiboset maɖabo.13Mefiboset ɔsɛ i Yerusalem alasɔ ɔwi biara ne, ɔla ɔ̃aɖe aɖera i igara ɔpɔrɔ̃ iso, ɔɖe bafã i ɔ̃ ngba minyɔ ɔɖuɖu.
The Seed Company