2 SAMUEL6
1David ɔledza makpakpɛ̃dze sɛɛ i Israel kanya isira, ma ɔɖuɖu ɔɖe marɛrɛ̃ kukpi sitɛ.2Ne David gu ɔ̃ makpakpɛ̃dze ɔɖuɖu ɔkɛlɛ Baala i Yuda sɔ maasu Ɣaa Ndamu aɖaka wa masɛ makpere ala Iyere , Bosate Ɔlesate Iyere, nwɔ nsi i ɔ̃ sigaraiyara iso i Makerubi ndɛ̃ i ndamu aɖaka iso.3Masu Ɣaa aɖaka masia i ibuɛ ɣɛtɛ nɛ i manantsuĩ to makpadzɛ̃ fiɛ mabɔrɛgu wã i Abinadab iyo nɛ nɣɛ i kabemi iso. Uza gu Axio ma nɖe Abinadab mabibirɛrɛĩ nto makɔ ibuɛ ɣɛtɛ nɛgbe.4Ɣaa ndamu aɖaka ɔsia iso fiɛ Axio ɔsɛ ɔɖe ne katɔ̃.5David gu Israel kaɖe ɔɖuɖu to maɖe iyi gu ma ɔle ɔɖuɖu i Bosate anɔ ku aka, akasa, siwɛ̃ masango, masango, sipiridon gu kumomoi.6Gɔ mabo Nakon imɔtu ne, manantsuĩ ma nto makpadzɛ̃ ibuɛ ɔwɛ̃ ɔtura, ne ɔso Uza ɔɖi kɔrɔ̃ ɔmɔɛ̃ Ɣaa ndamu aɖaka.7Bosate ɔnagu Uza sikpã teteree ala nnɛ ɔbara ne ɔ̃iwarɛ wũ, ne ɔso Ɣaa ɔwuĩ wũ ɔɖe i karɔ̃ ɔɖoe wũ i Ɣaa ndamu aɖaka kɔrɛ i mmɔ.8Ne sikpã ɔmɔɛ̃ David i Bosate sikpã dzɛ ɔɖi i Uza iso ngbe ne. Ne ɔso ipɛ i nɔme ne, masɛ marɔ mmɔ sɔ Perez Uza ipɛ ɔwi wɔ matsɛrɛ ara wagbe.9David ɔnigã Bosate ku iyi nɛmɔ ne ɔɣɛ sɔ, "Nda i Bosate ndamu aɖaka aaba aase i wũ kɔrɛ?"10Ɔ̃ibie sɔ ɔ̃asu Bosate ndamu aɖaka ɔkɛlɛgu i ɔ̃ kɔrɛ i David Ɔmagɛ̃siare ame, ɣɛɛ ɔkidza wã ɔsɛ ɔ̃asɛ i Obed-Edom wɔ lobɔrɛ i Gatse iyo.11Ndamu aɖaka ɔse i Obed-Edom Gatse iyo awa atɛ fiɛ Bosate ɔfere ma gu ɔ̃ iyo ɔɖuɖu kusɛkusɛ.12Kiniɔ ne maɣere Igara David sɔ, "Bosate ɔɔfere Obed-Edom iyo gu irabiara nɛ ɔba kusɛkusɛ ala Ɣaa ndamu aɖaka ɔso." Ne ɔso David ɔkɛlɛ ɔsɛ ɔ̃asu Ɣaa ndamu aɖaka ɔbɔrɛgu i Obed-Edom iyo ɔbɔ David Ɔmagɛ̃siare ame ku isoɣɔ.13Gɔ mma nsore Bosate ndamu aɖaka ɔɔɖi ngba mikuɔ ne, David ɔsɔrɛ nantsuĩrɛrɛ̃ gu inantsuĩbi nɛ mba iɖa ɔtã Bosate.14David mɔmɔ ɔpia ɖɔti ɖɔbɔrɔa ɔmearapia fiɛ ɔto ɔtɔ i Bosate anɔ gu ɔ̃ ɔle ɔɖuɖu,15fiɛ David gu Israel ɔɖuɖu ɔsu Bosate ndamu aɖaka mabɔ ku kulu gu kudadã ifɛ̃.16Ɔwi wɔ masore Bosate ndamu aɖaka mato mabogu i David Ɔmagɛ̃siare ame ne, Mixal, Saul ɔbirɔ̃gomi to ɔnyɔ ara ɔkigu i fesere ame. Ne gɔ ɔnya kumɛgɔ i Igara David to ɔpɛ ikpamule, ɔtɔ i Bosate anɔ ne, ɔnyɔ wũ pupurii i ɔ̃ ɔtu ame.17Masu Bosate ndamu aɖaka maba maasɛ i ikpayo nɛ i David ɔpɛ ɔtã ne ame fiɛ ɔbara araifɛ̃ gu isobuɛ asɔrɛ ɔtã Bosate.18Gɔ ɔfɛ̃ araifɛ̃ gu isobuɛ asɔrɛ ɔtã Bosate ɔro ne, ɔfere maturi kusɛkusɛ i Bosate Ɔlesate iyere ame.19Ne David ka ɔtã ɔturi biara i Israel, marɛrɛ̃ gu marɔ̃go boɖoboɖo kaboi gu siɖɔabi, wainabikorea abo marɛrɛ̃ i marɔ̃go pelepele fiɛ ɔbiara ɔkɛlɛ ɔ̃ iyo ne.20Gɔ i David ɔsɛ ɔ̃abo iyo si ɔfere ɔ̃ iyomaturi kusɛkusɛ ne, Mixal, Saul ɔbibirɔ̃gomi ɔbɔrɛ ɔba ɔ̃asarɛgu wũ ɔɣɛ sɔ, "Ne nda i Israel Igara ka ɔbua ɔsopara so nɔme ngbɔ ni, ɔɖi isɔ̃ kakukaku i ɔ̃ maɖabo masanderɔ̃go anɔmi ame lɛ katurisasoi biara aabara!"21David ɔɣere Mixal sɔ, "Bosate wɔ lonyɔ me sɔ lokɔlɛ loɖo fɔ ɔse gu ɔ̃ iyomaturi ɔɖuɖu fiɛ ɔsɛra me sigara i Bosate Israel kaɖe iso anɔ iɖe loto lotɔ. Ne ɔso nto loɖe iyi i Bosate anɔ.22Loasopa loɖo ngbɔ, fiɛ loabɔsokarɔ̃ i wũ mɔmɔ anɔ loɖo kumɛgɔgbe, ɣɛɛ loawe kuwarɛ i masanderɔ̃go ma itɔ̃me aɣɛ anɔmi ame."23Ne ɔso Mixal, Saul ɔbibirɔ̃gomi iiɣe ɔbi gbɔgbɔɔgbɔ ɔkpi.
The Seed Company