2 SAMUEL23
David Atɔ̃me Tsɔra
1David atɔ̃me tsɔra i ngbe ne:"David Yese ɔbibirɛrɛĩ ɔɣɛ ikpakpatɔ̃me,Ɔturi wɔ i Nwɔ Lokɔlɛ Ɔɖo ɔkɔlɛ kato ikpakpatɔ̃me,ɔrɛrɛ̃ wɔ i Yakob Ɣaa ɔsɔla nnɔĩ,ɔturi wɔ lowe ileaka mɛrɛ̃mɛrɛã ɔtã Israel.2"Bosate Siwarã ɔɖeika sikigu i wũ ame;ɔ̃ itɔ̃me ɔsia me i ɔnyagɛmi iso.3Israel Ɣaa ɔɖeika,Israel Itasiare ɔɣere me sɔ,'Si ɔturi ɔɖe maturi iso i sibɔlɔlɔ ame ne,si ɔɖeiso i Ɣaa kunigã ame ne,4ɔsɛ ɔse lɛ kaya kuɣɛ̃ ibɔrɛ ɔtɔku kaya ga adɔdɔ na awe.Ɔsɛ ɔse lɛ kumɛgɔ isɛ ikpa ku kado kamane isɛ itã sikua ɔre i karɔ̃.'5"Wũ iyo se kukaakɔ ku Ɣaa.Ɔbaragu me ndamu daaro,mɛ nɣɛ kukaakɔ i ɔri biara iso.Ɔto ɔ̃atã me iɖi lɛ isaruɛfiɛ ɔ̃atã wũ kubie ɔɖuɖu ɔba ne ame.6Ɣɛɛ maturi nyanyariã ɔɖuɖu ne maasu ma mapɛyu lɛ miyumɛ maisɛ masu nrɔɔ̃ mabodza awe.7Ɔturi ɔrere wɔ nsɛ ɔpɛgu miyusɛ ɔsu ibɔraira ɣɛɛ ifele ɔdziri;masɛ matsuedza mɛ i ngbegɔ mise."David Makpãrɛrɛĩ Ma Lofɔ Iyere
8David makpãrɛrɛĩ ayere ngbe ne:Yoseb-Basebet wɔ loɖe Takemonse, loɖe ma Itɛ ɔkpakpa. Ɔsu ifele ɔɖoe maturi alafa fafarana fiɛ ɔɖoe ma i kakpã kawɛ̃ ame.9Nwɔ i ɔ̃ kama loɖe Eleazar Dodai ɔbibirɛrɛĩ, ɔbɔrɛ i Axo ɔkparɛ ame. Lɛ makpãrɛrɛĩ itɛ ɔwɛ̃ ne, ɔwegu David fiɛ mabara ma Filistise ma losakanya i Pas Dammim matã kakpã aɣiãra. Ne kere Israel maturi ɔkpese kama,10ɣɛɛ Eleazar ɔya i ɔ̃ kayakɔ̃ ɔwuĩ ma Filistise i karɔ̃ gbɔgbɔɔgbɔ so ɔtu ɔ̃ kɔrɔ̃ ɔɖo wũ kaɖoma gɔ ɔma ipɛmi ɔla. Bosate ɔtã iɖeiso siare ku iyi nɛmɔ. Kama ne makpakpɛ̃dze ɔkpese maba Eleazar kɔrɛ, ɣɛɛ ne maɖi akpakpɛ̃ra gu ara mama i makpise iso.11I ɔ̃ kama Samma Agee ɔbibirɛrɛĩ Xararse ɔsiai. Ɔwi wɔ i ma Filistise ɔsikanya i Lexi fiɛ mata kakpã i Israel mabi iso i ngbegɔ karɔ̃ ɔyigu ayiforobi awɛĩ ne, Israel makpakpɛ̃dze ɔrui matere i ma Filistise kɔrɛ.12Ɣɛɛ Samma ɔya i ɔ̃ kayakɔ̃ i kakpɛkɔ̃ ndɛndɛ̃. Ɔkpɛ̃ i kã iti ne ɔwuĩ ma Filistise i karɔ̃, ne Bosate ɔtã iɖeiso siare.13Ɔraɖui ɔsɔrɛ̃wi ne, makpãrɛrɛĩ itɛ i makpakpa sitɛ ndɛ̃ ɔba David kɔrɛ i ɔkpolo ame i Adulam. Ɔwi wɔgbe ne ma Filistise makpakpɛ̃dze mawɛ̃ ɔbara kasɛkɔ̃ i Refaim Kagbolomi ame.14Ɔwi wɔmɔ ame ne David ɔwe i ɔlekasɛkɔ̃, fiɛ ma Filistise makpakpɛ̃dze ɔbara kasɛkɔ̃ i Betlehem.15Ɔme ɔkore David gbaã ne ɔɣɛ sɔ, "Loaɖɔɛ si ɔrere aabɔ me ndu mɛ i ibiɔ ame i Betlehem kayogodɔ̃ kɔrɛ lonɛ kere!"16Ne ɔso makpãrɛrɛĩ itɛ mamɔ ɔkpɛ̃ maki i ma Filistise kasɛkɔ̃, maka ndu mabɔrɛgu i ibiɔ ame i Betlehem kayogodɔ̃ kɔrɛ masore mabɔ David. Ɣɛɛ ɔsɛ̃ ɔ̃inɛ me, ne ɔsu me ɔfere i Bosate anɔ i ne kanya.17Ɔɣɛ sɔ, "O Bosate, kuiyikuiyi sɔ loabara ne igbã! Ito iase kere lɛ lonɛ marɛrɛ̃ ma lomɔrɛ̃dza ma ngbã ima." Ne ɔso David iinɛ ndu.Kumɛgɔgbe loɖe makpãrɛrɛĩ itɛ magbe kubarara ne.18Abisai wɔ nɖe Yoab Zeruya ɔbibirɛrɛĩ, ɔnyiibi loɖe ma Sitɛ tɔ̃ɖedze. Ɔsu ɔ̃ ifele ɔɖoe maturi alafa atɛ, ne ɔso ɔfɔ iyere lɛ ma Itɛ.19Matã wũ kuwarɛ maɖo ma Itɛ. Ɔkpese ma ɔkpakpa pelepele, atoasɔ maisu wũ mapia i ma ndɛ̃.20Benaya Yexoyada ɔbibirɛrɛĩ ɔɖe kpãrɛrɛĩ wɔ lowe kagbegbe gbaã ɔbɔrɛ i Kabzeel, ɔbara ara siare. Ɔwuĩ ma Moabse makpãrɛrɛĩ inyɔ ma nlɛ maɖo i karɔ̃. Ɔso ɔbo i iwo ame ku iyi nɛ kado ku atumagirĩ to ɔpɛ fiɛ ise kpɔlɔkpɔlɔ ɔsɛ ɔ̃aɖoe dzata.21Ɔwuĩ Egiptese siare ɔwɛ̃ i karɔ̃ atoasɔ ɔla ifele ne, Benaya ɔsu ikpo ɔkpɛ̃gu wũ. Ne ɔtsuɛ ifele ɔfɔ i Egiptese kɔrɔ̃ ame ne ɔsu ne ɔɖoe wũ.22Kumɛgɔgbe loɖe Benaya Yexoyada ɔbibirɛrɛĩ kubarara ne. Ɔ̃ wũ ɔfɔ iyere lɛ makpãrɛrɛĩ itɛ ma losɛ maaka ndu.23Ɔfɔ kuwarɛ gbaã ɔɖo ɔrere i maturi Sitɛ ndɛ̃, ɣɛɛ maipia wũ i maturi Itɛ ndɛ̃. David ɔsu wũ ɔsɛra i ɔ̃ isomadzuɛ̃se kanya.24Mmagbe lowe i maturi Sitɛ ndɛ̃ ne: Asaxel Yoab ɔnyiibi, Elxanan Dodo ɔbibirɛrɛĩ wɔ lobɔrɛ i Betlehem,25Samma wɔ lobɔrɛ i Xarod, Elika wɔ lobɔrɛ i Xarod,26Xelez wɔ lobɔrɛ i Palti, Ira Ikes ɔbibirɛrɛĩ wɔ lobɔrɛ i Tekoa,27Abiezer wɔ lobɔrɛ i Anatot, Mebunai Xusatse,28Zalmon wɔ lobɔrɛ Axo, Maxarai Netofatse,29Xeled, Baana ɔbibirɛrɛĩ wɔ nɖe Netofatse, Itai Ribai ɔbibirɛrɛĩ wɔ lobɔrɛ Gibea i Benyamin karɔ̃ ame.30Benaya Piratonse, Xiddai wɔ lobɔrɛ i Gaas kuwɛlagbolomi ame.31Abi-Albon Arbatse, Azmavet Barxumse,32Eliaba Saalbonse, Yasen mabibirɛrɛĩ, Yonatan33Samma ɔbibirɛrɛĩ wɔ lobɔrɛ Xarar, Axiam, Sarar ɔbibirɛrɛĩ wɔ lobɔrɛ i Xarar,34Elifelet Axasbai ɔbibirɛrɛĩ Maakatse Eliam Axitofel ɔbibirɛrɛĩ Gilonse35Xezro wɔ lobɔrɛ i Karmel, Paarai wɔ lobɔrɛ i Arbi,36Igal, Natan ɔbibirɛrɛĩ wɔ lobɔrɛ i Zoba, Xagri ɔbibirɛrɛĩ,37Zelek Amonse Naxarai Beerotse, wɔ loɖe Yoab Zeruya ɔbibirɛrɛĩ akpirasarãdze,38Ira Itrise Gareb Itrise39gu Uria Xitise. Ma ɔɖuɖu ɔɖe maturi sitɛ-ikɔdzɛ.
The Seed Company