2 SAMUEL21
David Ɔtã Ma Gibeonse Itikuso
1Ɔwi wɔ i David to ɔɖe sigara ne, kukã ɔbo akɔ atɛ buu i kuɖokpo, ne ɔso David ɔbiɛ kaku ɔpia Bosate. Ne Bosate ɔɣere wũ sɔ, "Kukã ɔbo alasɔ Saul gu ɔ̃ iyo ɔɣɛrɛ alasɔ maɖoe ma Gibeonse."2Igara ɔkpere ma Gibeonse ne ɔɖe ma ika. (Ma Gibeonse iiɖe Israel mabi ɣɛɛ ma Amorise ma lokuti. Israel mabi ɔkã sɔ maatã masɛ ngbã, ɣɛɛ Saul ɔdzini ikpɛ̃ i Israel gu Yuda iti ne ɔbie sɔ si ɔwɔra ma.)3David ɔkarɛ ma Gibeonse sɔ, "Be loabara lotã mi? Nda loabara sɔ lotã iɣɛrɛ nɛ mabara mi kuso si miafere Bosate kaɖekɔ̃ kusɛkusɛ?4Ma Gibeonse ɔtã mmuai sɔ, "Bona ɔri boakarɛ sikãrɛtɛa ɣee sikãfudza bobɔrɛgu i Saul ɣee ɔ̃ iyomaturi kɔrɛ, fiɛ bona ɔri boɖoe ɔturi kuwɛ̃ i Israel."David ɔkarɛ sɔ, "Be mito mibie sɔ lobara lotã mi?5Matã igara mmuai sɔ, "Ɔrɛrɛ̃ wɔ lowɔra bo fiɛ ɔta ɔya i bo iso fiɛ boɔro bosiina kasɛkɔ̃ i Israel ne,6mitã bo mabirɛrɛĩ ikɔdzɛ i ɔ̃ ɔkparɛ ame, si maɖoe ma masɛ i Bosate anɔmi i Gibea ɔmagɛ̃ ame - Saul wɔ Bosate ɔsɔla nnɔĩ aɖe."
Ne ɔso igara ɔɣɛ sɔ, "Loasu ma lotã mi."7Igara ɔnyɔ Mefiboset wɔ nɖe Yonatan ɔbibirɛrɛĩ fiɛ ɔɖe Saul ɔwabirɛrɛĩ nnya ala ndamu mɛ David gu Yonatan Saul ɔbibirɛrɛĩ ɔkã i Bosate anɔ ɔso.8Ɣɛɛ igara ɔsu Armoni gu Mefiboset, ma nɖe Aya ɔbibirɔ̃gomi Rizpa mabi ma ɔɣe ɔtã Saul ɔbua i Saul ɔbibirɔ̃gomi Merab mabibirɛrɛĩ iru iso. Merab ɔɣe mabi magbe ɔtã Adriel wɔ nɖe Barzilia wɔ lobɔrɛ i Mexolat ɔbibirɛrɛĩ.9Ɔsu ma ɔtã ma Gibeonse, ne maɖoe ma masɛ i kabemi iso i Bosate anɔmi ame. Ma ikɔdzɛ ɔɖuɖu ɔkpi ɔluwɛ̃, maɖoe ma i kamɔ ɔruiwi ayi ɖeakatɔ̃ ame, ɔwi wɔ i kamɔ irui ɔsɛ karɔ̃ kere.10Rizpa wɔ nɖe Aya ɔbibirɔ̃gomi ɔsu ipundukoto ɔbara kasɛkɔ̃ ɔtã so i itasiare iso. Ɔwe i mmɔ ita i kamɔ ɔruiwi karɔ̃ isɛ gbɔgbɔɔgbɔ kado ɔpɛ ɔfere i makpise iso. Ɔ̃itã kato kurodzai sɔ kusɛ i makpise iso ku ikpɛnɛ ɣee kuputubɔi si kupɛgu ma ku kasɛ̃.11Ɔwi wɔ maɣere David nnɛ i Rizpa, Saul ɔsɔrɔ̃, Aya ɔbibirɔ̃gomi ɔbara ne,12David ɔsɛ ɔ̃asu Saul gu ɔ̃ ɔbi Yonatan akui i Yabes Gilead maturi kɔrɛ. (Yabes Gilead maturi ɔsu ma i iwɛrɛ ame i Bet San itiri, ngbegɔ i ma Filistise ɔsa ma gɔ maɔɖoe Saul i Gilboa kama.)13David ɔsu Saul gu ɔ̃ ɔbibirɛrɛĩ Yonatan akui i mmɔ isu ibua i mma maɖoe manyua masɛ are ana.14Mabiara Saul gu ɔ̃ ɔbibirɛrɛĩ Yonatan akui i Saul ɔse Kis ikpibiɔ ame, i Zela ɔmagɛ̃ ame i Benyamin karɔ̃ iso. Ne mabara ibiara nɛ i igara ɔɣɛ. Ne kama ne Ɣaa ɔtã kayiikparama mmuai i karɔ̃ iti.
Kakpã I Ma Filistise Iso
15Kakpã ɔba i ma Filistise gu Israel mabi ndɛ̃ ana. David ɔkɛlɛgu ɔ̃ maturi masɛ maakpɛ̃ ma Filistise ne so ɔtu wũ ne.16Ne Isbi-Benob, Rafa ɔkparɛ ɔwɛ̃ wɔ ayiwa ifele iti ɔrɔrã ɔɖe kilo itɛ gu kama fiɛ ɔla itekpe ɣɛtɛ ɔɣɛ sɔ ɔ̃aɖoe David.17Ɣɛɛ Abisai Zeruya ɔbibirɛrɛĩ ɔba ɔ̃abuai David. Ɔwuĩ Filistise i karɔ̃ ne ɔɖoe wũ. Kere ne David maturi ɔkã maɣere wũ sɔ, "Kuiyikuiyi aisibabɔrɛgu bo akɛlɛ kakpã ame si Israel ɔkaniɛ ɔtɔ iibanyi."18Ɔwi kama ne kakpã mama ɔba ku ma Filistise i Gob. Ɔwi wɔmɔ ame ne, Sibekai Xusatse ɔɖoe Saf, wɔ nɖe ɔwɛ̃ i Rafa ɔkparɛ ame.19I kakpã mama ku ma Filistise ame i Gob ne, Elxanan wɔ nɖe Yaare-Oregim ɔbibirɛrɛĩ wɔ lobɔrɛ i Betlehem ɔɖoe Goliat wɔ lobɔrɛ i Gat ɔnyiibi, ɔ̃ ifele ɔdziri ɔse lɛ katiwedze ɔdziri awe.20I kakpã mama ga loba i Gat ana ne, ɔrɛrɛ̃ siare ɔwɛ̃ ɔwe gɔ ɔwe arɔĩ akuɔ i kɔrɔ̃ biara iso, fiɛ akpagirĩ akuɔ i kukpa biara iso - wã ɔɖuɖu ɔɖe sinyɔ-ana. Ɔɖe nwɔ lobɔrɛ i Rafa ɔkparɛ ame.21Gɔ ɔbara Israel aɣiãra ne Yonatan, Simea wɔ nɖe David ɔnyiibi, ɔbibirɛrɛĩ loɖoe wũ.22Maturi ina magbe ɔbɔrɛ i Rafa ɔkparɛ wɔ lobɔrɛ i Gat ame, fiɛ mawɔ i David gu ɔ̃ marɛrɛ̃ nrɔɔ̃ ame.The Seed Company