Read 2 SAMUEL 16

2 SAMUEL16

David Gu Ziba Iso Itɔ̃me

¹Ɔwi wɔ i David ɔɔfe kube itititɛ̃ kɛkɛĩ ne, Ziba wɔ lonyɔ Mefiboset ara iso ɔya ɔsia sɔ ɔ̃asarɛgu wũ. Ɔsɛgu mafirimu gbodzoo ma losore boɖoboɖo akuri alafa anyɔ, wainabikorea akpano kulafa gu aboi akpano kulafa gu ndã kabui.

²Ne igara ɔkarɛ Ziba sɔ, "Be ɔso abɔ ara wagbe?"
Ne Ziba ɔtã mmuai sɔ, "Lobɔ mafirimu sɔ igara iyomaturi si masɛ iso, boɖoboɖo gu adziribi ana ne si makpakpɛ̃dze aaɖe, si misu ndã mitã mma iaɖa i fafuĩ ame si mana ɔle."

³Ne igara ɔkarɛ sɔ, "Ne i ɖe fɔ ɔkɔse ɔwabirɛrɛĩ?"
Ziba ɔtã wũ mmuai sɔ, "Ɔpia i Yerusalem alasɔ ɔbu sɔ, 'Nɔme Israel kaɖe to maakpesera wũ ɔwa sigarakaɖekɔ̃ matã me.' "

⁴Kere ne igara ɔɣere Ziba sɔ, "Nnɛ ɔɖuɖu nɖe Mefiboset ire ɔɔkpese fɔ ɔkpɛ kiniɔ."
Ne Ziba ɔɣɛ sɔ, "Lobɔitikarɔ̃ lotã-ɔ lo, tã wũ ara si abo wũ ɔkɔse igara anɔ."

Simei Ɔgbarĩ David

⁵Gɔ ame i Igara David to ɔbore ɔbo Baxurim ne, ɔrɛrɛ̃ ɔwɛ̃ wɔ lobɔrɛ i Saul kalɛ gu i ɔ̃ iyo ame ɔba ɔ̃atu wũ i mmɔ. Ɔ̃ iyere loɖe Simei, Gera ɔbibirɛrɛĩ ne. Ɔbɔrɛ i ɔmagɛ̃ ame ɔto ɔgbarĩ David mɛrɛ̃.⁶Ɔto ɔpɛ igara gu ɔ̃ makpakpa ata atoasɔ igara makpakpɛ̃dze ɔɖuɖu gu isomadzuɛ̃se igbãɔ ɔsɛgu David i kuɖearɔ̃ gu kubena iso.⁷Gɔ ɔto ɔgbarĩ David ne, Simei ɔɣɛ sɔ, "Bɔrɛ fe, bɔrɛ fe, fɔ turiɖoese gu katuripɛmi!⁸Bosate ɔɔtã-ɔ kuso i Saul iyomaturi ima ɔɖuɖu nɛ afere i karɔ̃ fiɛ ato aɖe sigara i ɔ̃ kanya. Bosate ɔɔsu fɔ sigarakaɖekɔ̃ ɔpia i fɔ ɔbibirɛrɛĩ Absalom nrɔɔ̃ ame. Ɔɔkpase awɔ ala turiɖoese aɖe ɔso!"

⁹Kere ne Abisai, Zeruya ɔbibirɛrɛĩ ɔkarɛ igara sɔ, "Be ɔso i kpɛkpɛkpia wɔgbe aabgarĩ wũ ɔkɔse igara? Tã lokɛlɛ loatu wũ iti."

¹⁰Ɣɛɛ igara ɔɣere wũ sɔ, "Be i nnɛgbe ɔsu mi i mmɔ, Zeruya mabibirɛrɛĩ? Si ɔto ɔgbarĩ alasɔ Bosate ɔɣere wũ sɔ, 'Gbarĩ David ' ne, nna loakarɛ sɔ, 'Be ɔso ato abara ngbɔ?' "

¹¹Ne David ɔɣere Abisai gu ɔ̃ makpakpa ɔɖuɖu sɔ, "Wũ mɔmɔ ɔbi, wũ sina gu ima to ɔbie sɔ ɔɖoe me. Ne iyɔ Benyaminse wɔgbe ɣɛɛ! Minyua wũ; mitã ɔgbarĩ me, ala Bosate lopia wũ sɔ ɔbara kumɛɔ.¹²Siainyɔ Bosate to ɔ̃anyɔ wũ imɔrɛ̃ ɔkpesera me ɔpia i ɔ̃ ndamu kusɛkusɛ ame ala Simei sigbarĩ dzɛgbe nɔme ɔso."

¹³Ne ɔso David gu ɔ̃ maturi ɔsɛ i ɔri iso fiɛ Simei ana ɔsɛ i kabemi isɛ isɛ i ma kanɔsɔ̃ isɛ, ɔto ɔgbarĩ David ne ɔpɛ wũ ata ne ɔsa aku ɔfere wũ i ɔwiri ame.¹⁴Igara gu ɔ̃ maturi ɔɖuɖu ɔsɛ maabo ma kabokɔ̃ ku isotu. Mmɔ ka ɔwe ɔwarã ne.

Axitofel Adzuni Wa Ɔtã Gu Xusai Are

¹⁵Ɔwi wɔmɔ ame ne, Absalom gu Israel marɛrɛ̃ ɔɖuɖu ɔba maabo Yerusalem, ne Axitofel ɔwegu wũ.¹⁶Ne Xusai, Arkise wɔ nɖe David ɔlaa ɔkɛlɛ Absalom kɔrɛ ɔɣere wũ sɔ, "Igara si ɔsɛ ngbã dzoroo! Igara si ɔsɛ ngbã dzoroo!"

¹⁷Ne Absalom ɔkarɛ Xusai sɔ, "Kuɖɔɛ gɔgbe aate fɔ ɔlaa ne? Si fɔ ɔlaa ɔɖe ne, be ɔso fiɛ aisiai wũ?"

¹⁸Ne Xusai ɔɣere Absalom sɔ, "Aɔ, nwɔ i Bosate gu kaɖe ɔɖi, fiɛ Israel marɛrɛ̃ ɔɖuɖu siai ne, ɔ̃ loasiai fiɛ ɔ̃ kɔrɛ loawe ne.¹⁹Ana ne, nna si losumu? Iiɖe ɔbi loasumu ɣɛɛ? Lɛ kumɛgɔ losumu fɔ ɔse ne, ngbɔ loasumu-ɔ ne."

²⁰Ne Absalom ɔkarɛ Axitofel sɔ, "Tã fɔ adzuni, be si bobara?"

²¹Ne Axitofel ɔɣere Absalom sɔ, "Rɛgu fɔ ɔse masɔrɔ̃ ma ɔnyua ɔsɛ sɔ madzuɛ̃ igarayo. Iyɔ Israel ɔɖuɖu aanɔ sɔ mi gu fɔ ɔse ɔɔkɛ ɔkati fiɛ iapia mma ɔɖuɖu mpia i fɔ kɔrɛ ɔle maya teteree."²²Ne ɔso mapɛ ikpayo i iyo isã matã Absalom ne ɔrɛgu ɔ̃ ɔse masɔrɔ̃ i Israel kaɖe ɔɖuɖu anɔ.

²³Kiniɔ ne i ɔwi wɔmɔ ame ne, David gu Absalom sɛ manyɔ Axitofel adzuni wa ɔsɛ ɔtã lɛ kumɛgɔ i ɔturi aakarɛ ira ɔnɔ i Ɣaa kɔrɛ.

The Seed Company

https://app.library.bible/content/86f4bd306e059174