2 SAMUEL11
David Gu Batseba Iso Itɔ̃me
1I kukpɛ ame ɔwi wɔ ame i magara sɛ makɛlɛ kakpã ne, David ɔsese Yoab gu igara makpakpɛ̃dze gu Israel makpakpɛ̃dze ɔɖuɖu. Mawɔra ma Amonse fiɛ maki malɔ Raba ɔmagɛ̃. Ɣɛɛ David ɔwe i Yerusalem.2Iɣɛ̃kɛlɛ iwɛ̃ ne, David ɔta i ɔ̃ karɛkɔ̃ iso sɔ si ɔnene kɛkɛĩ i igaraiyo isã. Gɔ ɔsɛ i mmɔ ne, ɔnya ɔrɔ̃go ɔwɛ̃ wɔ nto ɔpie ndu, ɔrɔ̃go ɔre situri gbaã.3Ne David ɔpia masɛ maakarɛ sɔ nna ɔɖe ne. Ɔrɛrɛ̃ ɔɣere David sɔ, "Eliam ɔbibirɔ̃gomi Batseba wɔ nɖe Uria, Xitise ɔre ɔɖe."4Ne David ɔpia makpabo ɔsɛ maakɔ wũ mabɔ. Gɔ ɔba i ɔ̃ kɔrɛ ne, ɔrɛgu wũ. (Ɔ̃ɔsekelera so i ɔ̃ kayomiya ame ɔro.) Ne ɔrɔ̃go ɔkpese ɔkɛlɛ iyo ne.5Ɔrɔ̃go ɔla kayiri ne ɔsese David kanya sɔ, "Ka loto kayiri."6Ne David ɔpia sɔ maɣere Yoab sɔ, "Sese me Uria, Xitise." Ne Yoab ɔsese Uria David kɔrɛ.7Ɔwi wɔ i Uria ɔba ne, David ɔkarɛ wũ kumɛgɔ i Yoab gu makpakpɛ̃dze ɔse gu kumɛgɔ i kakpã to kakɛlɛ.8Ne David ɔɣere Uria sɔ, "Kɛlɛ fɔ iyo si asɛ aafere ngba." Ne ɔso Uria ɔrui i igaraiyo fiɛ igara ɔsese wũ karatã.9Ɣɛɛ Uria ɔrɛ i igaraiyo kabɔrɛnya ku ɔ̃ ɔkɔse maɖabo ɔɖuɖu fiɛ ɔ̃ikɛlɛ ɔ̃ iyo.10Maɣere David sɔ, "Uria iikɛlɛ iyo." Ne ɔso ɔkarɛ Uria sɔ, "Iiɖe kiniɔ ame abɔrɛ i kadzorokɔ̃ aba ɣɛɛ? Be ɔso aikɛlɛ iyo?"11Ne Uria ɔɣere David sɔ, "Ndamu aɖaka gu Israel gu Yuda makpakpɛ̃dze si i akpayo ame fiɛ Yoab, kpakpɛ̃dzekpakpa gu wũ ɔkɔse makpakpɛ̃dze pia i aputu ame. Nda loakɛlɛ iyo loaɖe ara lonɛ ndã, lorɛ i wũ ɔre kɔrɛ? Lokã-ɔ sɔ loibabara ngbɔ!"12Ne David ɔɣere wũ sɔ, "Rɛ i ngbe nɔme ana si kɔrãkaɖe ne, loaɖi-ɔ ɔri." Ne ɔso Uria ɔrɛ i Yerusalem iyi nɛmɔ gu kaɖesɛã.13David ɔkpedza wũ ɔba ɔ̃aɖegu wũ aɖera ɔnɛ ndã fiɛ David ɔmidza wũ ndã, ɣɛɛ kutsuɛ ne, Uria ɔrɛ i ɔkala iso i ɔ̃ ɔkɔse maɖabo ndɛ̃, ɔ̃ikɛlɛ ɔ̃ iyo.14Kaya ne, David ɔtsɛrɛ ɔko ɔtã Uria sɔ ɔsu ɔkɛlɛgu Yoab.15Ɔtsɛrɛ i ɔko ame sɔ, "Su Uria sese ngbegɔ i kakpã ba ɔle. Iyɔ ne mikpese wũ i kama si tsirise si ɔɖoe wũ."16Ne ɔso gɔ Yoab ɔtã maki malɔ ɔmagɛ̃siare ne, ɔsu Uria ɔɣedza i ngbegɔ i matsirise ma mba ɔle ɔwe.17Gɔ makpakpɛ̃dze ɔbɔrɛ i ɔmagɛ̃siare ame maba maakpɛ̃gu Yoab ne, David makpakpɛ̃dze mawɛ̃ ɔrɔ̃, fiɛ Uria, Xitise ana ɔrɔ̃ kakpã.18Yoab ɔpia sɔ masɛ maabɔ David kakpã amaniɛ.19Ɔɣere kpabo wɔ ɔpia sɔ, "Si ɔɔbɔ igara kakpã amaniɛ wagbe aro ne,20sianyɔ sikpã to siamɔɛ̃ wũ ɔkarɛ-ɔ sɔ, 'Be ɔso mibore mibo ɔmagɛ̃siare misɛ miakpɛ̃ ngbɔ? Miiɣe sɔ mato maapɛ mirɛ̃ mabɔrɛgu i ibere iso ɣɛɛ?21Nna loɖoe Abimelex, Yerub-Besef ɔbibirɛrɛĩ? Iiɖe ɔrɔ̃go lokpasera kukɔtɛ i ibere iso ɔwuĩ wũ iti i Tebez fiɛ ɔkpi ɣɛɛ? Be ɔso mibore mibo ibere kumɛɔ?' Si ɔkarɛ-ɔ ngbɔ ne, ɣere wũ sɔ, 'Ana ne fɔ ɔɖabo Uria, Xitise ɔkpi.' "22Kpabo ɔɣo ɔri, ne gɔ ɔba ɔ̃abo i David kɔrɛ ne, ɔɣere wũ irabiara nɛ i Yoab ɔɣere wũ sɔ ɔɣɛ.23Ne kpabo ɔɣere David sɔ, "Makpakpɛ̃dze ɔwe ɔle i bo iso mabɔrɛ maba maakpɛ̃ bo i karɔ̃ ndɛ̃, ɣɛɛ bosa ma bokpesegu bokɛlɛgu ɔmagɛ̃ kayogodɔ̃ kabɔrɛnya.24Ne gɔ mapɛ fɔ maɖabo mirɛ̃ mabɔrɛgu i ibere iso ne, igara makpakpɛ̃dze mawɛ̃ ɔrɔ̃ kakpã. Ana ne, fɔ ɔɖabo Uria, Xitise ɔkpi."25Ne David ɔɣere kpabo sɔ, "Sɛ aaɣere Yoab sɔ, 'Nnɛgbe si idaaɖa-ɔ, ipɛmi sɛ iɖoe ɔbiara. Mipia kubɛ si miwɔra ɔmagɛ̃siare.' Tã Yoab katetere ku atɔ̃me wagbe."26Ɔwi wɔ i Uria ɔre ɔnɔ sɔ ɔ̃ ɔrã ɔɔkpi ne, ɔbiɛ wũ.27Gɔ ɔ̃ɔkisi ɔ̃ ɔrã ɔro ne, David ɔtã makɔ Batseba mabɔ i ɔ̃ iyo ne ɔkpese ɔ̃ ɔre ɔɣe ɔbibirɛrɛĩ ɔtã wũ ne. Ɣɛɛ nnɛ i David ɔbara iiwe Bosate ɔmɛrɛ̃.The Seed Company