2 SAMUEL1
David Ɔnɔ Saul Kukpi
1I Saul kukpi kama ne, David ɔbɔrɛ i kakpã ga ame ɔɖe ma Amalekse iso ɔkpese ɔkɛlɛ Ziklag, ngbegɔ ɔwe ayi anyɔ.2Ikpɛnɛ tɛare iso ne, ɔrɛrɛ̃ ɔwɛ̃ ɔtere ɔbɔrɛ i Saul kasɛkɔ̃, ɔ̃ awu ɔkɛkɛ fiɛ ɔsebu ɔwe wũ i iti. Gɔ ɔba ɔ̃abo David kɔrɛ ne, ɔkɛlɛ ɔrɛ i karɔ̃ i kuwarɛ ame.3Ne David ɔkarɛ wũ sɔ, "Lɛ abɔrɛ?"Ne ɔtã mmuai sɔ, "Lotere lobɔrɛ i Israel mabi kasɛkɔ̃."4David ɔkarɛ wũ sɔ, "Ɣere me, be lobɔrɛ?"
Ne ɔtã mmuai sɔ, "Marɛrɛ̃ ɔtere i kakpã katɔ̃. Maturi gbodzoo ɔrɔ̃ kakpã. Ana ne Saul gu ɔ̃ ɔbi Yonatan ɔkpi."5Ne David ɔkarɛ ɔporoporoi wɔ loba ɔ̃aɣere wũ itɔ̃me sɔ, "Nda abara atsue sɔ Saul gu ɔ̃ ɔbibirɛrɛĩ Yonatan ɔkpi?"6Ne ɔporoporoi ɔtã mmuai sɔ, "Iba sɔ lowe i Gilboa kube iso fiɛ lonya Saul kumɛgɔ i ɔpiɛtɛ i ɔ̃ ifele iso, makpakpɛ̃dze ma nsi i abuɛ wa i apɔngɔ sɛ akpadzɛ̃ iso ɔɔro ɔki malɔ wũ.7Gɔ ɔfiriki fiɛ ɔnya me ne, ɔkpere me, ne lokarɛ wũ sɔ, 'Lotã-ɔ iti be si lobara lotã-ɔ?'8"Ɔkarɛ me sɔ, 'Fɔ nɖe nna?'
Lotã wũ mmuai sɔ, " 'Amalekse loɖe.'9"Ɔɣere me sɔ, 'Ba ya i wũ kɔrɛ i ngbe si aɖoe me! Lopia i kukpi ibo teteree ame ɣɛɛ lopia ngbã.'10"Ne ɔso lobore lobo wũ loɖoe wũ alasɔ lotsue sɔ gɔ ɔ̃ɔrɔ̃ ne, ɔ̃isibana ngbã. Losisi ɔ̃ sigaraikoto nɛ nsia wũ i iti gu kagɔrɔĩ ga mpia wũ i kɔrɔ̃ lobɔ-ɔ i ngbe, wũ sate."11Kere ne David gu marɛrɛ̃ ma ɔɖuɖu mpia wũ i kɔrɛ ɔmɔɛ̃ ma awu makɛkɛ ne.12Mabara kaku, mabiɛ fiɛ manyikanya isɛ iabo kutsuɛ matã Saul gu ɔ̃ ɔbi Yonatan, gu Bosate makpakpɛ̃dze gu Israel iyo alasɔ marɔ̃ kakpã i ipɛmi kanya.13Ne David ɔkarɛ ɔporoporoi wɔ losu itɔ̃me ɔbɔ wũ sɔ, "Lɛ abɔrɛ?"
Ne ɔtã mmuai sɔ, "Ɔfɔ loɖe, ɔ Amalekse loɖe."14Ne David ɔkarɛ wũ sɔ, "Be ɔso ainigã sɔ aakɔlɛ fɔ kɔrɔ̃ aɖoe nwɔ i Bosate ɔsɔla nnɔĩ?"15Ne David ɔkpere ɔ̃ kpãrɛrɛĩ ɔwɛ̃ ɔɣere wũ sɔ, "Kɛlɛ aatsue wũ ira aɖoe!" Ne ɔtsue wũ ira fiɛ ɔkpi ne.16Ala David ɔɔɣere wũ sɔ, "Fɔ kɔrɔ̃ ame ɔdziri lotsue-ɔ, Fɔ mɔmɔ losu fɔ kanya aɣɛ sɔ, 'Loɖoe nwɔ i Bosate ɔsɔla nnɔĩ.' "
David Ɔbiɛ Saul Gu Yonatan
17Ne David ɔpia ɔnɔ wɔgbe i Saul gu ɔ̃ ɔbibirɛrɛĩ Yonatan iso,18ɔɣɛ sɔ mate Yuda marɛrɛ̃ kuta isomanɔ wɔgbe, (matsɛrɛ wũ mapia i Yasar Ɔko ame) sɔ:19"Fɔ kulɛ, O Israel maɖoe marara i abe atititɛ̃.Nda i makpãrɛrɛĩ ɔrɔ̃ kakpã ngbɔ!20"Midaaɣɛ ne i Gat,midaapɛ ne imomo i Askelon,si iiɖe ngbɔ so to siaɣɔ ma Filistise mabibirɔ̃gomi,si iiɖe ngbɔ mma loitu sirɛrɛ̃ mabibirɔ̃gomi to maana isoɣɔ.21"O Gilboa abe,midaarɔ̃ ima, fiɛ kado si ɔdaapɛ ɔfere mi iso,ɣee midaawe karɔ̃ ga iso i geɖebu ɔraɖui aalɛ.Alasɔ mmɔ manina makpãrɛrɛĩ akpirafɔra ne,Saul akpiraifɔra, maisisɔla ne nnɔĩ.22Ibɔrɛ i mma maɖoe ima ame,makpãrɛrɛĩ siturina ame,Yonatan kuta iisikpese kama,Saul itekpe iikpese kama iimi.23"Saul gu Yonatan -i ngbã ame ne, maɖɔɛ ma fiɛ i ngbã ame ne mapia maturi isoɣɔ,maisame i kukpi ame kɔraa.Masɛ mapɛsiwa maɖo kukpekpeyu,mawe ɔle maɖo madzata.24"O Israel mabibirɔ̃gomi,mibiɛ Saul,wɔ lopia mi ɔkati rɛtɛa ɖɔbɔrɔa gu arapia sɛɛ,nwɔ losu sikãrɛtɛa ara ɔkɛrɛ mi i mi arapia iso.25"Nyɔ kumɛgɔ i makpãrɛrɛĩ ɔrɔ̃ kakpã!Yonatan ɔrɔ̃ kakpã i fɔ kube iso.26Loto lobiɛ-ɔ, wũ ɔnyiibi Yonatan;loisɛ lopia-ɔ kuɣɛ.Fɔ kuɖɔɛ gɔ aba atã me ɔwodoro,kuwodoro kuɖo marɔ̃go kuɖɔɛ.27"Nyɔ kumɛgɔ i makpãrɛrɛĩ ɔrɔ̃ kakpã!Kakpã akpɛ̃ra ɔwɔ!"The Seed Company