1 SAMUEL3
Bosate Ɔɖi So Ɔte Samuel
1Kaporoporoi Samuel ɔwe i Eli kayirinɔ ɔla ɔ̃asumu Bosate. Ɔwi wɔmɔ ame ne, Bosate iisɛ ɔɖegu maturi ika malamala fiɛ kaɖikate ana iisi.2Kasɛ̃ kawɛ̃ ne Eli, nwɔ anɔmi ka nto aba karɔ̃ fiɛ ɔ̃isito ɔwo ara ɔnya, ɔrɛ i ngbegɔ ɔsɛ ɔrɛ.3Ɣaa ɔkaniɛ iinyi , Samuel ɔrɛ i Bosate Isɔrɛyo ame, ngbegɔ i Ɣaa Ndamu Aɖaka ɔse.4Ne Bosate ɔkpere Samuel. Ne Samuel ɔtã mmuai sɔ, "Nya mme."5Ne ɔtere ɔkɛlɛ Eli kɔrɛ ɔɣere wũ sɔ, "Nya mme; ala akpere me."Ɣɛɛ Eli ɔtã wũ mmuai sɔ, "Loikpere-ɔ; kpese sɛ aarɛ." Ne ɔso ɔrui ɔkɛlɛ ɔsɛ ɔ̃arɛ.6Bosate ɔledza ikpere sɔ, "Samuel!" Ne Samuel ɔta ɔkɛlɛ Eli kɔrɛ ɔɣɛ sɔ, "Nya mme; ala akpere me."
Eli ɔɣɛ sɔ, "Wũ ɔbi, loikpere-ɔ; kpese sɛ aarɛ."7Kiniɔ ne, Samuel iitsue Bosate tɔtɔ, fiɛ maiɖi Bosate itɔ̃me mate wũ manya ana.8Bosate ɔledza Samuel ikpere ɔkpɛ tɛare. Ɔta ɔkɛlɛ Eli kɔrɛ ɔsɛ ɔ̃aɣere wũ sɔ, "Nya mme; ala akpere me."
Kere ne Eli ɔtsue sɔ Bosate ɔɖe nto ɔkpere ɔbi.9Ne ɔso Eli ɔɣere Samuel sɔ, "Kɛlɛ aarɛ. Si ɔledza-ɔ ikpere ne, ɣere wũ sɔ, 'Ɖe ika alasɔ fɔ ɔɖabo to ɔkã atsue.' " Ne ɔso Samuel ɔkɛlɛ ɔsɛ ɔ̃arɛ i ɔ̃ karɛkɔ̃.10Bosate ɔledza iba ɔ̃aya i mmɔ ɔkpere lɛ saa awe sɔ, "Samuel! Samuel!"
Ne Samuel ɔtã mmuai sɔ, "Ɖe ika, alasɔ fɔ ɔɖabo to ɔkã atsue."11Ne Bosate ɔɣere Samuel sɔ, "Nyɔ, nto loba loabara ira iwɛ̃ i Israel kaɖe ame. Ɔturi biara wɔ loanɔ ne, ɔyu aamɔɛ̃ somina.12Ɔwi wɔmɔ ame ne loatã atɔ̃me ɔɖuɖu wa loɣɛ i Eli gu ɔ̃ kakpa iso aaba i kame ita i karɔ̃kasɛkɔ̃ isɛ iabo kawirikɔ̃.13Loɣere wũ lofegu sɔ loakpadzɛ̃ ɔ̃ iyomaturi kutsue ɔwi ɖaa. Alasɔ ɔɣe ira ɔsegu i ɔ̃ mabi ikpi gu imusuora nɛ mabara i Ɣaa iso, ɣɛɛ ɔlo i ne iso ɔ̃isɛ̃ ɔtã ma.14Ne ɔso lokã ndamu lotã Eli iyo sɔ, "Eli iyo iɣɛrɛ ne, maibasu isɔrɛ ɣee karatã mabara ikpikusoisɔrɛ i ikpi iti kuiyikuiyi.' "15Samuel ɔkpese ɔrɛ gbɔgbɔɔgbɔ kaɖe ɔsɛ̃. Ɔta ne ɔbusi Bosate iyo akui ne. Ɔnigã kaɖikate ga ɔnya iɣere Eli.16Ɣɛɛ Eli ɔkpere wũ ne ɔɣɛ sɔ, "Wũ ɔbi, Samuel!"
Samuel ɔtã mmuai sɔ, "Nya mme."17Eli ɔkarɛ wũ sɔ, "Be itɔ̃me i Ɣaa ɔɣere-ɔ? Daasu ne akɔla me. Ɣaa si ɔkpadzɛ̃-ɔ kutsue, ɔledza-ɔ ikpadzɛ̃ si aiɣere me nwa ɔɖuɖu ɔɣere-ɔ."18Ne ɔso Samuel ɔɣere wũ irabiara ɔ̃ikɔla kuiwɛ̃. Ne Eli ɔɣɛ sɔ, "Ɔ̃ nɖe Bosate, ɔbara nnɛ nlɛ i ɔ̃ anɔ."19Samuel ɔba ɔ̃amɔ. Bosate ɔwegu wũ fiɛ ɔtã sɔ ɔ̃ itɔ̃me biara nɛ Samuel ɔɣɛ ɔba i kame.20Israel kaɖe ɔɖuɖu ita i Dan i kato isɛ iabo Beer-Seba i kala, ɔba maatsue sɔ maɔsɛra Samuel lɛ Bosate kanyaɖidze awe.21Bosate ɔla ɔ̃aɖi so ɔ̃ɔte i Silo fiɛ mmɔ ɔɖi so ɔte Samuel iki i itɔ̃me nɛ ɔɣere wũ ame.
The Seed Company