Read 1 SAMUEL 26

1 SAMUEL26

David Ɔtã Saul Ɔwe Ngbã Ana

¹Ma Zifse mawɛ̃ ɔkɛlɛ Saul kɔrɛ i Gibea ne maɣɛ sɔ, "David wɛrɛ i Xakila kabemi iso, nga nto kanyɔ Yesimon."

²Ne ɔso Saul ɔkɛlɛ Zif Fafuĩ ame, ku makpakpɛ̃dze ma nlɛ maɖo kukpi kutɛ ma maɖi i Israel kaɖe ame sɔ maanyɔnyɔ David i mmɔ.³Saul ɔbara kasɛkɔ̃ i ɔri wɔ nsia i Xakila kabemi ga nto kanyɔ Yesimon iso kuruɛ, ɣɛɛ David ɔwe i fafuĩ ame. Ɔwi wɔ ɔnya sɔ Saul ɔɔti wũ kama ɔba i mmɔ ne,⁴ɔsese mavɛlɛdze sɔ si matsue sɔ gbaã Saul ɔɔba ɔ̃abo i mmɔ.

⁵Ne David ɔɣo ɔri ɔkɛlɛ ngbegɔ i Saul ɔbara kasɛkɔ̃ ne. Ɔnya ngbegɔ i Saul gu Abner wɔ nɖe Ner ɔbibirɛrɛĩ wɔ loɖe makpakpɛ̃dzekpakpa, ɔrɛ. Saul ɔrɛ i kasɛkɔ̃ kame, fiɛ makpakpɛ̃dze ɔki malɔ wũ.

⁶Ne David ɔkarɛ Aximelek, Xitise gu Abisai wɔ nɖe Zeruya ɔbibirɛrɛĩ, Yoab ɔnyiibirɛrɛ̃ sɔ, "Nna loasɛ Saul kɔrɛ i kasɛkɔ̃ ku me?"
Ne Abisai ɔtã mmuai sɔ, "Loasɛgu-ɔ."

⁷Ne ɔso David gu Abisai ɔkɛlɛ makpakpɛ̃dze kɔrɛ ku kasɛ̃, Saul rɛ sirɛ ɔsu wũ i kasɛkɔ̃ ame i mmɔ gɔ ifele karã i karɔ̃ ame i ɔ̃ iti kɔrɛ. Abner gu makpakpɛ̃dze ana ɔrɛ maki malɔ wũ.

⁸Abisai ɔɣere David sɔ, "Ɣaa ɔɔsu fɔ tsirise ɔpia-ɔ i nrɔɔ̃ ame nɔme. Kiniɔ ne tã lotsue wũ lomatãra ala wũ ifele, loibatsue wũ ikpɛ inyɔ."

⁹Ɣɛɛ David ɔɣere Abisai sɔ, "Daawɔra wũ! Nna loabara nwɔ i Bosate ɔsɔla nnɔĩ iraboa fiɛ ɔ̃ibafɔ kutsueikpadzɛ̃?¹⁰David ɔɣɛ sɔ, "Ayi kumɛgɔ i Bosate pia ngbã ne, Bosate mɔmɔ to ɔ̃aɖoe Saul, si ɔ̃ ɔwi ɔba ne ɔ̃akpi ɣee ɔ̃akpi si ɔsɛ kakpã.¹¹Ɣɛɛ Bosate daatã me ɔri sɔ loabara nwɔ i Bosate ɔsɔla nnɔĩ iraboa. Kiniɔ ne su ɔ̃ ifele gu ndu ibui wa nse amatã ɔ̃ iti kɔrɛ si borui."

¹²Ne ɔso David ɔsu ifele gu ndu kabui i Saul iti kɔrɛ ne marui ne. Kuwɛ̃ iinya ma ɣee ɔtsue ne, ɣee ɔta i sirɛ. Ma ɔɖuɖu ɔkpi sirɛ, alasɔ Bosate ɔpia ma i sirɛ ame dzoroo.

¹³Ne David ɔsɛ ɔwara ɔkɛlɛ kasɛ nyɔare ne ɔya i kabemi itititɛ̃ gɔ igu ɔwe, igbado gbodzoo ɔwe i ma ndɛ̃.¹⁴Ne David ɔkpere makpakpɛ̃dze gu Abner wɔ nɖe Ner ɔbibirɛrɛĩ teteree ɔsese sɔ, "Abner, aito aatã me mmuai ɣɛɛ?"
Abner ɔtã mmuai sɔ, "Fɔ nna aɖe, nto ɔkpere igara?"

¹⁵David ɔɣɛ sɔ, "Abner, ɔrɛrɛ̃ aɖe, iiɖe ɔrɛrɛ̃ aɖe ɣɛɛ? Nna nse lɛ fɔ i Israel kaɖe? Be ɔso aidzuɛ̃ fɔ sate igara? Ɔnyiiɔ ɔba si ɔwɔra fɔ sate igara.¹⁶Nnɛ abara iilɛ. Ayi kumɛgɔ i Bosate pia ngbã ne, ikote sɔ mi gu fɔ maturi aakpi alasɔ miidzuɛ̃ mi sate, nwɔ i Bosate ɔsɔla nnɔĩ. Nyɔ fɔ kɔrɛ kilɔ. Lɛ i igara ifele gu ndu ibui wa lose amatã ɔ̃ iti se?"

¹⁷Saul ɔtsue David silɔ ɔɖiite ne ɔɣɛ sɔ, "David wũ ɔbi, fɔ silɔ siɖe?
David ɔtã mmuai sɔ, "Aĩ sɛ̃ siɖe, wũ sate igara."¹⁸Ne ɔkarɛ sɔ, "Be ɔso wũ sate to ɔtere ɔti ɔ̃ ɔɖabo kama? Be lobara fiɛ mme ikpi lobara loɣɛrɛ?¹⁹Kiniɔ ne wũ sate igara si ɔkã ɔ̃ ɔɖabo atɔ̃me atsue. Si Bosate lotã sɔ ta ya me iso ne, iyɔ ne ɔfɔ wũ isɔrɛ. Si maturi kɔrɛ ibɔrɛ ɣɛɛ ne, Bosate si ɔgbarĩ ma! Maɔtã me lorui i wũ kasɛ i Bosate kaɖekɔ̃ ame ne maɣɛ sɔ, 'Kɛlɛ aasumu aɣɔ.'²⁰Kiniɔ ne daatã wũ ima si ifere i karɔ̃ dzoroo i Bosate anɔ kɔrɛ. Israel igara ɔbɔrɛ ɔba ɔto ɔnyɔnyɔ toto - lɛ kumɛgɔ i ɔturi sɛ ɔgbere tsɛru i kube iso."

²¹Ne Saul ɔɣɛ sɔ, "David wũ ɔbi, lobara ikpi, kpese ba. Loisibabara-ɔ iraboa alasɔ asu wũ ngbã sɔ mifɔ kuɣa nɔme. Gbaã ne, loɔbara ara lɛ kadzunisɛĩ fiɛ loɣɛrɛ gbaã."

²²David ɔtã mmuai sɔ, "Nya igara ifele i ngbe, tã fɔ ɔporoporoi ɔwɛ̃ si ɔba ɔ̃afɔ ne.²³Bosate sɛ ɔtã ɔturi biara kuso ala ɔ̃ sibɔlɔlɔ gu ɔnukuareiɖe iti. Bosate ɔsu fɔ ngbã ɔpia i wũ nrɔɔ̃ ame nɔme. Ɣɛɛ loibasia kɔrɔ̃ i nwɔ i Bosate ɔsɔla nnɔĩ iso.²⁴Gbaã ne lɛ kumɛgɔ fɔ ngbã ɔfɔ kuɣa mitã me nɔme ne, kumɛɔ i wũ ngbã si mifɔ kuɣa i Bosate kɔrɛ si ɔɖi me i amɔrɛã ɔɖuɖu ame."

²⁵Ne Saul ɔɣere David sɔ, "Ɣaa si ɔfere-ɔ kusɛkusɛ wũ ɔbi David; ato aabara ara siare fiɛ gbaã ne aaɖeiso."
Ne ɔso David ɔɣo ɔ̃ ɔri, ne Saul ɔkpese ɔkɛlɛ kaa.

The Seed Company

https://app.library.bible/content/86f4bd306e059174