Habacuc
3
/
agr_wbt
Habacuc Apajuí segamu
1
Profeta Habacuc Apajuín juna aatus segauwai:
2
Tuke Pujuuwah,
ame ashí dutikaum nunak shiig dekajai,
nuadui amina ishamakun kujajai.
Wait aneasam iina apachji aidau yaigkuitam
dutiksamek yaijatkata,
kajegkagtukam idaikagtusu akumesh, wait anenkagtugta.
3
Apajuík Temán nugkanmaya minawai,
Apajuí pegkegma nunú muja Parágnumia jiinki minawai,
Apajuín imanjiya duka ashí nayaimpin jajutua awai,
tuja ashí nugkanum Apajuí emematku kantamtain kantamainawai.
4
Winchamtinnum egkemak minawai,
niina uwejenia chaajip keeka jiinui,
nuniak niina senchiji uumak aunash iwainawai.
5
Nii minitaik kuashat aents aidau
jata ishamainun achiimakag jinuinawai.
Tuja niina ukuujin tsuwemu ishamain minawai.
6
Apajuí minau jasa wajataik, nugka uujui,
tuja ashí aents aidaun diitaik,
aents aidauk ishamainak kujainawai,
muja aidauk tsainak megkagainawai,
muja yaunchuk nagkamas aajaku aidaush yumpunainawai.
Tujash Apajuín jintiya duka yumpunagkesh megkaekashtinun tuke atinai.
7
Nuigtushkam Cusagnumia aents aidau
initak makichkish jiinmainchaunum egkema
waitmaina imanik senchi waituidaun wainkabiajai.
Tuja Madián nugkanmaya aidaushkam
senchi ishamainak jiintsuk ayatak kaemag
aakchinmag batsatun wainkabiajai.
8
Tuke Pujuuwah, aents caballonum entsatkau
minimaina imanika minakum,
aents maaniamunum depetmak carro maanitainum egkemag wegama
numamtuk wajam dusha ¿wagka imanikmesh umintsaume?
¿Namak aidau, nayants aidau, wainka apajuímtai aina nunú kajegkamek imanikmesh umintsaum?
9
Akentaiyai aketka iju ichimaina imatikabiume nugkak,
amina senchigmin imatikamua nunú
namak najaneakmayi.
10
Muja aidauk amina waipainak, ishamjamak sunatuinawai.
Tuja nayaimpinmaya yumi senchi yutawai,
imanitai nayants kuna senchi tsukatu asa
kedegtak ishamain wajawai.
11
Ame chaajip ishamain winchamtin nagkijai betek
ekemaka akupkaamin,
etsak nantujai uumak megkaekaje.
12
Ame kajekam nugka tenteame,
dutikakum ame kajekbaugmin
aents nugka muunnumia aidauk dajaja tsaika
ajapmaina imatikame.
13
Amina aentsjum aina duka ame apu etegkauwaitam nujai yayaakum miname.
Untsu aents pegkegchau aina nuna apujig mantuam,
inabaujiya duka ashí tsaigkam emegkatkaume.
Dutikamu asa ditak shiig wainak juwakaje.
14
Caballonum maanitan yacha aidau ememasag
dase senchi dasentujai betek jetepaidau asag,
amupaktag tiagmayi.
Imatijamainakui ayamjumamainchau dekapmaiji,
tujash ame dita apujig niina flechajinig depetkabiume.
15
Amek amina caballogmin entsamkam
nayants ishamain wajamunum wekaeme.
16
Nuna antakun senchi ishamkabiajai.
Nuniai mina wenujuk sunatmayi,
imaniakun wajaschamin, ashí mina iyashjuig
kakaumainchau dekapmaijai,
nuniakun anentaijui tetegtimiajai.
Tujash wika imaniaknush,
waugtutsuk iina waitkagbau aina nuna Apajuí waitkastin tsawan jegatna nuna dakastatjai.
17
Tuja higuera ajakbau nejeachkuish,
uva nejeachkuish, olivo aceitunan nejeachkuish,
ajanmaya aidaush, ikamia aidaukesh nejenachkuish,
tuja baka aidaush, uwig aidaush ashí jinutjamamtaish,
minak Tuke Pujuu uwemtijuju asamtai,
wika shiig aneasan niina ememattatjai.
19
Wagki Tuke Pujuu minak senchimtijawai,
dutijak japa senchi tupikaina iman awajtus
muja aidaunum iwajuk tikichish maumainchau kuitamjawai.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter