Elías nayaimpinum webau
1Apajuí dasen wainchijai betek ajuag Elíasan jukitin tsawan jegau ai, Elías Eliseojai yaakat Guilgal batsatu juwakiag shiyakajui.2Nunik wesag Elías Eliseon chichajak: “Amek juwi pujumata, Tuke Pujuu minak Betelnum awetawai”, tau. Tama Eliseo ayaak: “Tuke Pujuu antai tuja ameshkam antamin tajai. Wika ima nigki weti tusanuk idaisashtatjame”, tiuwai. Tusa timatai mai juwakiag Betel jegawajui.3Nunikagmatai profeta aidau Betelnum batsatu Eliseon igkugtatus jiintujajui. Nunik igkug chichajuinak: “¿Amesh amina jintinjamnun Tuke Pujuu jujutjamkitta dusha dekamek?” tuidau. Tusa iniam nii ayaak: “Ehe, dekajai, tujash atumek duka tiigpa”, tiuwai.4Tuja ajuma duwi Elías Eliseon chichajak: “Amek juwi pujumata, minak Tuke Pujuu Jericó awetawai”, tau. Tama Eliseo ayaak: “Tuke Pujuu antai tuja amesh antamin tajai. Wika ima nigki weti tusanuk idaisashtatjame”, tiuwai. Tusa timatai mai juwakiag Jericó jegawajui.5Nunikagmatai profeta aidau Jericó batsatu Eliseon igkugtatus jintujajui. Nunik igkug chichajuinak: “¿Amesh amina jintinjamnun Tuke Pujuu jujutjamkitta dusha dekamek?” tuidau. Tama nii ayaak: “Ehe, dekajai, tujash atumek duka tiigpa”, tiuwai.6Tuja ajuma duwi Elías Eliseon chichajak: “Amek juwi pujumata, Tuke Pujuu minak Jordán awetine”, tau. Tama Eliseo ayaak: “Tuke Pujuu antai tuja ameshkam antamin tajame. Wika ima nigki weti tusanuk idaisashtatjame”, tiuwai. Tusa timatai mai juwakiag Jordán jegawajui.7Nunik wegagtai cincuenta profeta aidau Jericó batsatu pataetukajui. Nunik pataetukag Elías Eliseojai ijunun nuna ukujin ikaa ijuntsajui. Nunik ijunai Elíasak Eliseojai namaka jegawajui.8Nunik jegawag Elías jáanch nii dukumataijin juki pempeag yumin awatiuwai. Dutika awatim namakak jimaituk kanaka buku wajasui. Nunikmatai nugka bukunum katimaina imatikas mai katiajajui.9Nunik katiajag Elías Eliseon chichajak: “Eke amejai kanaatsug nuaduik, ame wajina sujusti tame nunú segatta”, tiuwai. Tama Eliseo ayaak: “Tuke Pujuun senchiji aminí awa nuna aan nagkaemas sujusti tajame”, tiuwai.10Tusa tama Elías ayaak: “Amek shiig kuashat sumame. Tuja mina Apajuí jujuktata nunú waitkum ame segatam duka jukittame. Untsu mina Apajuí jujamu waitchakmek jukishtatme”, tiuwai.11Nuna aatus chichakiag shimuinai pachiachbau makichik carro kegau, tuja caballo dushakam kegau wantinkauwai. Nuniak tsanig wajaun akankauwai. Dutikam Elíasak dase wainchijai betek ishamain wajaunum pachiinak nayaimpinum weuwai.12Nunikmatai Eliseo wainak senchi buutak: “¡Apawah! ¡Apawah! ¡Amek Israel aents aidaunmak suntag maanin aidaun nagkaesau ayume!” waja wajas buutu. Tujash ataktu awagkig Elíasnak wainkachui. Elías wematai wake besemag dekapeak niina jáanchjin japiki ichigkui.Elías wemataiEliseo nagkama takasbau
13Elías wegak jáanch nii dukumataijin ajuag ukukbaun Eliseo jukiuwai. Nunik wakitki namak Jordágnum jegauwai.14Nunik nuna jáanchin pempeag duwi namakan awati untsumak: “¿Tuke Pujuu Apajuí Elíasan ememattaish tuwi pujawa?” tau. Dutikamuik namakak jimaituk kanaka buku wajasui. Nunikmatai Eliseo katigkui.15Tuja profeta aidau nuwi ijunas dii ijunuk, Eliseo dutikaun wainak chichainak: “¡Apajuí Wakani Elíasai pujumia nunú yamai Eliseowai pujawai!” tusag niina igkugtatus wejiajui. Nunik jegantag,16tsuntsuma ijunas chichajuinak: “Antukta nijah, ii ame inakem ainag juwiya cincuenta aents wajiu aina nunú amina jintinjamin Elías megkaeka nuna egaktinme. Namputchawame Tuke Pujuu Wakani yaki takui juki tikich mujanum, dutikachkush segaunmakesh ajuag ukukchaintash”, tuidau. Tusa tiagtai nii chichaak: “Atsa, makichik aentskesh egaktinme tusagmek awemaigpajum”, tiuwai.17Tusa tamaitak intimki imatiagtai, ayu cincuenta aents ishiaktajum tusa tiuwai. Tusa timatai ishiakam kampatum tsawan yujagsag egainakush wainkachajui.18Nunik wainkacha waketug Jericó kaunamtai, Eliseo ditan chichajak: “Wika anna aneasan wegpajum timajime”, tiuwai.Eliseo Jericónmayan entsa pukuni pegkegchau jiinun pegkeg awajsamu
19Tuja Jericónmaya aents aidau Eliseon chichajuinak: “Iina yaaktajiya juka pegkejai. Duka ameshkam wainme. Tujash yumi pegkegchau umumaitsui, nugkashkam ajakmamash tsapatsui”, tuidau.20Tiagtai Eliseo ditan chichajak: “Tazón yamajam weejai jukijum itagtuatajum”, tau. Tusa tima juki ejentuntajui.21Nuna Eliseo juki yumi pukuni jiinbaunum jeganta nagkimak: “Juna aatus Tuke Pujuu chichaak: ‘Juju yumia junak wi pegkeg awagsajai. Nuadui makichik aentskesh juna umauk jakashtatui. Tuja nugkashkam ajak tsapamainchauk achattawai’ tawai”, tiuwai.22Duwi nagkamas Eliseo tibaunak imanisag, yumi pegkeg wajasui.23Nuna dutika ukuak Eliseok Betel weuwai. Nunik wegaun uchi betelnumia datsa aidau jiintujag dushikinak: “¡Nampiaju ameshkam nayaimpinum wetá! ¡Nampiaju ameshkam nayaimpinum wetá!” awajuidau.24Tusa imatjam Eliseo ayampatua Apajuín adayas ditan yumigkig ukukiuwai. Dutika ukuaig jimag chayú ikamia jiintuki cuarenta y dos uchi datsa aidaun ichiag ijinauwai.25Nuwi juwaki Eliseo weuwai muja Carmelonum. Tuja nuwiya juwaki wakitkiuwai yaakat Samaria nugkanum.