Eliseo jakattak pujusa inagnaku chicham etsegkamu
14Eliseo shiig senchi jak tepau asamtai, Israel aents aidaun apuji Joás niina ijagsatatus wejiuwai. Nunik jegajua pagkuk buutak: “¡Apawah! ¡Apawah! ¡Amek Israel aents aidaunmak suntag maanin aidaun nagkaesau ayume!” tiuwai.15Tutai Eliseo niina chichajak: “¡Flecha akentai, flechajai jukita!” tau. Tama nuna apu mai jukiuwai.16Dutikamtai Eliseo niina chichajak: “¡Umintsata flecha akenkamnum!” tiuwai. Tusa tima uminai, Eliseo niina uwejen apu uwejen patainiuwai,17dutika chichajak: “¡Niimtai najanamu etsa minitaiya nuni awa nunú ujaita!” tau. Tima apu ujainiuwai. Dutikamtai Eliseo chichajak. “¡Yamai flecha akenkata!” tau. Tama apu flechan akenkauwai, dutikamtai Eliseo senchi untsumak: “¡Apajuíyai juju flechajai betek ayamkagtin! Nuadui ¡Apajuí yaimpasmatai sirianmaya aents aidau yaakat Afecnum depetkajum ashí ijinattagme!”, tiuwai.18Tuja ataktu chichajak: “¡Ataktushkam flecha jukita!” tiuwai. Tusa tima jukimtai, Eliseo chichajak: “¡Anú flechayai nugka awatta!” tiuwai. Tama apu nunú flechayai kampatuma imania nugkan awatiuwai.19Dutikamtai Apajuí inake Eliseo niina kajejuk chichajak: “Cincoa imania dutikashkumesh seisa imania awatiuwaitkumek, sirianmaya aidau depetkam ashí amumainaitme. Tujash kampatuma awatiu asam dutiksamek kampatuma imania depetkattame”, tiuwai.20Nuna ashí tusa nuadui Eliseo jakauwai, nunikmatai ukusajui. Tuja maki makichik mijantin Moab aents kasa aidau Israel aents aidau nugken utuawag waitkaidau asagmatai,21makichik tsawantai ujumak Israel aents aidau aents jakaun ukustatus nugka tagak batsatu. Nuna tagak batsatu diistakama, kasa aidau minidaun wainkag ishamak pisainak, aents jakau iyashin nagkimawag Eliseo ukusbaunum egkeawag ukukiajui. Dutika ukuinaig nunú aents jakauwa duka Eliseo ukunchin antig aneantui, nunik jiinkiuwai.