Omaki12
Kwɔba Ungwu Asukpo Mu Utu
1Akwɛyi Ɔzhizɔsi e le mbo mu kwoba kwɔlɛ ibama te: <<Onzu uwufo a gba utu uwu ekyikyi-iyɛvyi akwɛyi, a wɛwu ma mu ɔbɛ, a vu kizɛ ingyi bɔkɔ oo tu imuma iyi uwɛyi akwɛyi a la kwɔla ungwu onzu wu igbomo, akwɛyi a ra wu e shi asukpo umbafo akwɛyi a kama iyawu mu luzɛ.2Kwuye ungwu bɔkɔ imuma i do ibɛma-a akwɛyi a lɔ umɛgba wu ukpɛnyi te le so mbaa asukpo mbɔlɛ kaa la na ogbo wu la ka wu.3Asukpo mbɔlɛ ba o yi umɛgba wu ele mo, o kpa wu ɛmwu, akwɛyi o ra wu ma la ewo iyidɔ.4Ada uwu utu awu a gba a lɔ umɛgba uwufo kpɔ, uwu tete o kpa wu apula mu reshi, o lo wu lovya.5Ada uwu utu awu a gba a lɔ umɛgba uwufo kpɔ, ele o ngbɛ wu ma ŋa. Ada uwu utu ele a lɔ enzu ma gyɔɔ, akwɛyi asukpo mbɔlɛ o byi mba ɛmu, o ngbɛ umbafo mba ma.6Ada uwu utu i she wu onzu ukpɛnyi uwu bɔkɔ a lɔ, gba akwu umɛ wu uwu bɔkɔ e pwu idɛnyi wu. Imbwama yi, akwɛyi ada uwu utu ele a lɔ umɛ wu munyi mba. A zɔ te, <Enzu mbɔlɛ o lo umɛ mi ma.>7Kwuye ungwu bɔkɔ umɛ uwu ada uwu utu ele e bomo, akwɛyi asukpo mbɔlɛ o le mesu iso isomo te <Ele gba akwu u ri ogu uwu ada uwu utu le. Bo kaa la ki ngbɛ wu ma kaa utu lu ŋa nzu.8Akwɛyi o yi wu mo, akwɛyi o ngbɛ wu ma akwɛyi o wa la ukpɛzhi wu kwudu mu utu ɔwu.9<<Ɔzhizɔsi e yo mbo te,<< Mu imama yi, ada uwu utu ɔwu ee wo te? Ada uwu utu ele aa gbama akwɛyi a ngbɛ asukpo mbɔlɛ ma, akwɛyi a ra la utu ɔwu ee shi wu enzu mbawa.10Lu du wa yi dɛ mo re mu kwokpo ungwu Ukpo te:<Kwoki ungwu ɔla ungwu bɔkɔ wa mbo ugu o towo ngwu mogba ku gba ku ra la ugu le,11ɛlɛ akwu iwomo iyi Ɔkwu, kinzu ba akwa nzu kenzu iyama.>>>12Akwɛyi ebwoshi umbakɔ mbala wa zɔ ɛrama iyi Omosisi mbala enzu umbakɔ bɔkɔ o pwa kwoba kwɔlɛ, o gagyi ɔgwuzɛ te lo yi wu mo, kwuwongu o dama te iso ɛlɛ e so mbo, iyi ba i wo mbo mo kwuwongu o wiyi iyi riba ingyi enzu, akwɛyi o lu wu afyima o kama iyamba.Kwuyo Meka Iyi Oba Uwɛzhi Ishimo Laa Osiza
13Mizhikembo iyi ɛnyi, enzu umbakɔ umba Azhu o lɔ Afarisi umbafo mbala wa mbwalu Ɛrɔdu ma mba Ɔzhizɔsi. kaa lo kpa wu kwoda mba iso iyi e so.14Akwɛyi o bo munyi wu o zɔ te, <<U zɔ kiya, ki yitu te ŋɔ kwu onzu ongbulolo, enzu o do ŋɔ egbo iŋagama mo, uŋɔ ŋɔ loshi la onzu kwuwongu kwunzu wu mo, uŋɔ ba ŋɔ zɔ ɔgwuzɛ uwu Ukpo mu ongbulolo. Ɛrama nzu i nya nzu ma te la ki shi oba uwɛzhi laa Osiza naa i nya nzu ma mo ŋa? I sheshi te la ki shi naa i sheshi mo ŋa?>>15Ɔzhizɔsi ba e yitu iyi kwukyoro mbo akwɛyi a za mba te, <<Kimbe ki shi bɔkɔ lu gyi te la lu kpa mi kwuda? La lu ka mi la kwokobo kaa la mi ma ngwu.16Akwɛyi o ka wu la kwokobo kwukpɛnyi, akwɛyi e yo mbo te, <<Ureyi ɔlɛ akwu uwu uwe? Ɛnyi ɛlɛ kɔ, akwiyi we?>> Akwɛyi o gba wu opwu te <<Ureyi ɔlɛ mbala ɛnyi ɛlɛ akwiyi Osiza.>>17Akwɛyi Ɔzhizɔsi a za mba te, <<Kiya ngyi Osiza, lo shi ngyi Osiza, ngyi Ukpo ba, lo shi ngyi Ukpo.>> tabɔkɔ o pwa ɛlɛ, izele i yi mbo mo.Kwuyo Mɛka Iyi Iyimo Mu Kwuvɔ
18Mizhikembo iyi ɛnyi akwɛyi, Asadusi umbafo umba bɔkɔ o zɔ te iyimo mu kwuvɔ i yi mo, o bo mbaa Ɔzhizɔsi la kwuyo.19O zɔ te, <<U zɔ kiya,>> <<Omosisi a ka ɛrama e shi nzu te, gba umanyi uwu onzu e kpomo e shi oko, oko awu ba e yi ɛmɛ mo, umanyi wu e to oko awu ma mɛga kaa le yi ɛdɔ la umanyi wu uwu bɔkɔ e kpomo awu.20Ɛmɛnɛ umbafo werewo o yi mɔmɔ. Uwu kwonze e to oko akwɛyi e kpomo oko ele ba a mba wu umɛ dɛ mo.21Umanyi wu uwopo e to oko awu, e kpomo tete e shi umɛ mo, inyinyi gba i wo umanyi wu uwola le.22Tayi gba i wo ɛmɛnɛ werewo mbɔlɛ le lɛɛbi. Mu imbwama yi, oko ele e kpomo tete.23Ɔnu wu iyimo mu kwuvɔ, uwe mu ɛmɛnɛ werewo mbɔlɛ akwu ɔnu uwu oko ele, moo lɛɛbi mba o to oko ele?>>24Ɔzhizɔsi a gba mba opwu te, <<Luu kyoro ɛyi ma kwuwongu lu yi kwokpo ungwu Ukpo mbala ekpasu wu mo.25Ɔnu wu iyimo mu kwuvɔ, enzu o to eko mo ba o ya anu mo, enzu o yi kyamate alɔgbulɔ umba Ukpo moshi tayi.26Mekeka iyi iso iyi igba la iyimo mu kwuvɔ, lu du wa yi mu kwupu ungwu bɔkɔ Omosisi a ka dɛ mo re, mu ɛza iyi ɛzhi ingbarara ipwumo, bɔkɔ Ukpo a za la Omosisi te, <Imi gba mi kwu Ukpo uwu Aburamu, Ukpo uwu Aziki mbala Ukpo uwu Ɔzhɛkɔbu le> mo re?27Uwu akwu Ukpo uwu ɛkpɛzhi mo, akwu Ukpo uwu enzu mba reyi. Lunyi lu ngbomo gyɔɔ!>>Ɛrama Iyi I Ka Le
28Ukpɛnyi meka iyi enzu wa zɔ ɛrama iyi Omosisi e yi mɔmɔ mu alu ingbɛma mu kaambu unga bɔkɔ Ɔzhizɔsi mbala Asadusi o yi mi rimo. tabɔkɔ a dama te Ɔzhizɔsi a gba mba opwu marimari, akwɛyi e yo Ɔzhizɔsi kwuyo tee: <<U zɔ kiya, ɛrɛma iyina bɔkɔ ika?>>.29Ɔzhizɔsi a gba opwu te, <<Ɛrama iyi ika gba akwu te, <La lu ngbɛ alu lunyi enzu umba Izirɛ, Ukpo Ɔkwu nzu akwu ukpɛnyi.30La lu pwu idɛnyi iyi Ukpo Ɔkwu yi mu akɔ, mbala idu yi lɛɛbi, mbala egbo yi mbala ekpasu yi lɛɛbi.31Ɛrama iyopo iyi ika gba akwu tee, <Pwu idɛnyi iyi onzu u nɔ kpa ŋa mate ɛŋɔ tayi.> Ɛrama iyi i ka epo ɛlɛ ma iyi mo.>>32U zɔ ɛrama awu a gba wu opwu tee, <<U zɔ kiya, ŋɔ gba opwu marimari>> Ŋɔ so ongbulolo bɔkɔ ŋɔ zɔ te Ukpo akwu ukpɛnyi awu, moo Ukpo awa e yi mo.33Idɛnyi ipwumo iyi Ukpo mu idu ŋɔ, la egbo ŋɔ lɛɛbi la ekpasu, ka gba pwu idɛnyi iyi onzu u nɔ kpa ŋa kyamate ɛŋɔ te, ɛrama epo ɛlɛ i ka rɛshi ingyi ipwumo mbala isabɔ iwomo ma.34Tabɔkɔ Ɔzhizɔsi a ma te onzu ele a gba opwu mu ilukwu, akwɛyi a za wu tee, <<Ŋɔ ndama mbala Irɛsu iyi Ukpo fo>>Mizhikembo iyi ɛlɛ onzu uwu e do tee e yo Ɔzhizɔsi kwuyo e yi fo.
Kwuyo Mɛka Iyi Okrasi
35Kwuye ungwu bɔkɔ Ɔzhizɔsi e yi mu enzu ɛzu izɔma mu odida uwu ɔtɛpu, akwɛyi e yo kwuyo te, <<I wo te bɔkɔ wa zɔ ɛrama o zɔ te Okrasi akwu umɛ uwu Odevidi?36Odevidi mafyi wu e siso mu ekpasu iyi Kwundu Ɔkɛrikɛri a zɔ te,<Ɔkwu a za la Ɔkwu mi te:<<Ŋɔma mu kwuwo ungwungyi mikaa la mi shi ŋɔkaa ri agewa ŋa ma lɛɛbi dɛ.> >>37Odevidi mafyiwu lala a ya wu tee <Ɔkwu;> i wo te ba Okrasi akwu umɛ uwu Odevidi?>> Ɔzhizɔsi E Yi Enzu Mu Alu Mɛka Iyi Wazɔ Ɛrama Iyi Omosisi (Omatiyu 23.1-36; Oluku 20.45-47)Riba ingyi enzu umba bɔkɔ o pwa iso iyi Ɔzhizɔsi ɛlɛ ɔ mwɔnyɛ gyɔɔ.38Mu ɛzu izɔma wu, Ɔzhizɔsi a za mba tee, <<La lu wo bɛtɛ mbala enzu wa zɔ ɛrama. O gyi ifulama la ɛriga iyɛku, o gyi te enzu lo gbɛlɛ mba ɛnyi mu rishi.39o gyi kizɛ ingyi iŋɔma ingyeshi mu idaba iyi ɛlu ikpala iyi Azhu, mbala riyi ingyi inzumbɛku mbaa odumudumu iwomo.40O na eko wakpanuma apula mbala agba mba ma, o to kwuye gbulɔlɔ mu Ukpo ilɛma kaa enzu lo ma mba. Enzu mbɔlɛ o ma wɔnu oo ka uwewe ma.>>
Oko Ukpɔnuma E Wo Rɛshi Laa Ukpo
41Ɔzhizɔsi a ŋɔma e sheyi mba kakyɔ unga bɔkɔ o ta rɛshi la Ukpo, akwɛyi a ma enzu te o yi mu eduwo itama mu kakyɔ unga ɔtɛpu. Enzu gyɔɔ umba bɔkɔ o yi kwuwo o ta eduwo iyɛku mu kakyɔ.42Akwɛyi oko ukpɔnuma ɔyirewa awu ba e bo a ta ekobo epo.43Akwɛyi Ɔzhizɔsi a za la Wavɔngɔkiya wu te lo bo kɛlɛ, akwɛyi a za mba te, <<Ongbulolo gba mi so yi le, oko ukpɔnuma ɔyirewa ele a ta kiya ingyi ki ka ingyi uwewe mo mu kakyɔ.44Kwuwongwu enzu mbɔlɛ lɛɛbi o to mu meka iyi kiya mba kɛ gyɔɔ gba o shi le; oko ele ba e to meka iyi kiya wu lɛɛbi gba e shi ngyi le ndii, ikyo mbala eduwo iyi i fa te la ya ewiri ma yi.>>The Word for the World International