Omaki10
Ɔzhizɔsi A Zɔ Ɛzu Mɛka Iyi Oko Irama Mbaa Ɔnu
1Akwɛyi Ɔzhizɔsi a lafya la riyi ngyɛngyi a ka mu ɛzhi iyi Ozhudiya akwɛyi a sama a ka mu ɛsɛnyi iyi ɔkwu uwu Ɔzhɔda. Akwɛyi enzu riba o gyiri wu ma ma, akwɛyi e le mbo mu ɛzɔ izɔma mate bɔkɔ e koko e wo awu.2Akwɛyi Afarisi umbafo o bo munyi wu te kaa lo pwa wu ma. O yo wu kwuyo te, <<Ɛrama iyi Omosisi i nyama kaa onzu la ra la oko wu mo?>>3<<Akwɛyi Ɔzhizɔsi a gba mba opwu te, <<Kimbe ba Omosisi a ta yi okpa te la lu wo?>>4O gba wu opwu te, <<Omosisi e shi Ɔnu ekpasu te la ka kwupu ungwu ikama mbala oko wu le shi wu akwɛyi a ra wu ma.>>5Ɔzhizɔsi a gba mba opwu te, <<A kwu kwuwongu ipwamo yi gba Omosisi a ka yi ɛrama ɛnyi le.>>6<<Kwuye ungwu bɔkɔ Ukpo e wo kwudu kwɔlɛ awu ba, <E wo ɔnzɔnu mbala okokpayi.>7<Kwuwo ngwɔlɛ, ɔnzɔnu a lafya la ete wu mbala anyi wu , akwɛyi a kpamesu mbala oko wu,8akwɛyi umba wepepo mbo akwu kyamate ɛnwu ikpɛnyi tayi.> Umba akwu wepo fo, akwu kyamate onzu ukpɛnyi tayi ŋa.9Kwuwo ngwɔlɛ, enzu umba bɔkɔ Ukpo a kpamba mesu, onzu la ka mba ma mo.>>10Mizhikembo iyi ɛnyi, o fye mu kwogba ngwufo, akwɛyi Wavɔngɔkiya wu o yo wu kwuyo iyi iso iyi bɔkɔ e so awu.11Akwɛyi a gba mba opwu te, <<Onzu uwunawuna uwu bɔkɔ a ra la oko wu mo akwɛyi e to oko awa, kaya gba e yi mu itomo le ba e ngbomo la oko wu.12Gba oko uwu ɔnu a lafya la ɔnuwu akwɛyi a gba la ɔnu iyama, akwu kaya gba e yi mu itomo le.>>Ɔzhizɔsi E Shi Ɛmɛshɛri Esheshi
13Enzu o yi mu ɛmɛshɛri ibomo mbaa Ɔzhizɔsi ka le fulo mbo ewo mu reshi, Wavɔngɔkiya wu ba o nya mba ma mo.14Tabɔkɔ Ɔzhizɔsi a ma tayi, amba o wo wu mo, akwɛyi a za la Wavɔngɔkiya wu te, <<La lu lafya la ɛmɛshɛri ka lo bo munyi mi, la lu nyi mba ma mo, moo irɛsu iyi Ukpo akwiyi enzu mate ɛmɛshɛri mbɔlɛ te.15Imi mi so yi ongbulolo, onzu uwunawuna uwu bɔkɔ a na irɛsu iyi Ukpo mate umɛshɛri mo, onzu awu e fye mo mba Ukpo mo.>>16Akwɛyi e yi ɛmɛshɛri mbɔlɛ a kpa midu wu akwɛyi e fulo mbo ewo mu reshi akwɛyi e shi mbo esheshi.Ɔnzɔnu U Yi Kiya Ingyi Kuwo
17Tabɔkɔ Ɔzhizɔsi e ye la luzɛ wu, onzu uwufo a rɛnya e ke kwumo mu idu wu. A za wu tee, <<U zɔ kiya uwoshoshi, kimbe bɔkɔ mi wo ka la mi fya kwunyɔ ungwɔkpɔ?>>18Ɔzhizɔsi a gba wu opwu te, <<Kimbe ki shi bɔkɔ ŋɔ ya mi te onzu uwoshoshi, moo Ukpo kɛɛki wu gba akwu onzu uwoshoshi le.19Lunyi lu yitu iyi ɛrama iyi Ukpo lo: <Ki ngbɛ onzu mo, ki to kaya mo, ki wu ɛlɔ mo, ki to izɔgɔ iyi angba mo, ki wo onzu ɔrɔ mo, lomo la ada ŋa mbala ɛnɛ ŋɔ,>20Onzu ele a za la Ɔzhizɔsi te, <<U zɔ kiya, ɛrama ɛlɛ kpɛkpɛyi mi mbwalu yi ndii ngbaa te mi kwu umɛshɛri le.>>21Ɔzhizɔsi a yese wu mu iyi idɛnyi akwɛyi a za wu te, <<Kiya kikpɛnyi ki sheŋɔmo. So ka ya kiya ingyi ŋɔ yi ngyi lɛɛbi ma ka ka ngyi la ayirewa, akwɛyi ŋɔɔ fya rigbɛ moshi. Mizhikembo iyi ŋɔ wo ɛlɛ, de ba bo ka mbwalu mi.>>22tabɔkɔ onzu ele a pwa iso ɛlɛ, akwɛyi e tutu eyi mo. Akwɛyi a kama iyawu la ubugyi, kwuwongu e yi kwuwo gyɔɔ.23Akwɛyi Ɔzhizɔsi e yese Wavɔngɔkiya wu akwɛyi a za mba te, <<Ikɔma kaa enzu umba bɔkɔ o yi kiya ingyi kwuwo lo fye mu kwogba ungwu Ukpo!>>24Iso wu ɛlɛ i shi Wavɔngɔkiya wu kenzu iyama. Ɔzhizɔsi a gba e so mbo iso kpɔ te, <<Ɛmɛshɛri, ikɔma kaa enzu lo fye mu kwogba ungwu Ukpo!25I yi fulele i ka le kaa Onyakurumi le fyemo mu ɔtu uwu keyi la ifyemo iyi onzu uwu e yi kiya ingyi kwuwo mu kwogba ungwu Ukpo.>>26Tabɔkɔ Wavɔngɔkiya wu o pwa iso ɛlɛ kenzu iyama mba ka ka le ŋa, akwɛyi o za lesu te, <<Uwe bɔkɔ e do te a fya isama kpɔ?>>27Akwɛyi Ɔzhizɔsi e yese mbo akwɛyi a za mba te, <<Mbaa onzu ɛlɛ te i kɔ ma, mbaa Ukpo ba i yi tayi mo; moo Ukpo e do ingyinangyina iwomo.>>28Opita a za wu te, <<Kinzu ki lafya la kiya ingyinangyina akwɛyi ki mbwalu ŋɔ!>>29<<Ɔzhizɔsi a gba mba opwu te, <<Ongbulolo gba mi so yi le, onzu uwunawuna uwu bɔkɔ a lafya la kwogba wu naa ɛmanyi wu anzɔnu, naa, ɛmanyi wu ekokpayi naa anyi wu naa ete wu naa ɛmɛ wu mbala utu wu kwuwo mi mbala kwuwongu rɛnu ngyi Ukpo,30bɔkɔ a fɔma la rigbɛ inama ingyi ki ka ingyi bɔkɔ o fya ngyi mu ɔyi ɔlɛ izhi oderi mo. A fya agba mbala ɛmɛnɛ anzɔnu mbala ɛmɛnɛ ekokpayi mbala umba ada mbala umba ɛnɛ mbala itu-a ma inyashi kuwo mi tete; akwɛyi a fya kwunyɔ ungwɔkpɔ mu ɔyi uwu u bwu nyɔ awu.31Enzu riba umba bɔkɔ o to keyi kekelele oo mbwa kembo, akwɛyi umba bɔkɔ o yi mu kembo ba o yi mu keyi.>>Ɔzhizɔsi A Gba E So Iso Ungwɔla Mɛka Iyi Lukwu Wu Kpɔ
32Tabɔkɔ Ɔzhizɔsi mbala Wavɔngɔkiya wu o le mu luzɛ o sheye mu Ɔzhɛrusalɛ, akwɛyi Ɔzhizɔsi e to keyi, Wavɔngɔkiya wu o ya kenzu, enzu umba bɔkɔ o mbwalu mba iyi i wo mbo mo. Akwɛyi Ɔzhizɔsi e to Wavɔngɔkiya wu kpɔ a ka mba mɛmba akwɛyi a so mbo kiya ingyi ki bi du wu.33A za mba te, <<Kinzu ki sheye mu Ɔzhɛrusalɛ, Umɛ uwu Onzu o ra wu o shi ebwoshi umbakɔ mbala wa zɔ ɛrama iyi Ukpo. Oo fu ombu uwu lukwu o lo wu akwɛyi o ra wu o shi enzu umba bɔkɔ akwu Azhu mo,34oo wo wu ɛnɛ, oo kpo wu ɔtɛ, o kpa wu ikpa akwɛyi o ngbɛ wu ma. Ɔnuwu kwɔfyi ungwola ba, aa gba la iyimo mu kwuvɔ.>>Ozhemisi Mbala Ɔzhɔnu O Nda Kwoya
35Akwɛyi Ozhemisi mbala Ɔzhɔnu ɛmɛ umba Ozebedi, o bo munyi wu o za wu te, <<U zɔ kiya, shɔɔkɔ wo nzu kiya ingyinangyina ingyi bɔkɔ ki nda ŋa.>>36Ɔzhizɔsi e yo mbo te, <<Kimbe bɔkɔ lu gyi te la mi wo yi?>>37O gba wu opwu te, <<Shɔɔkɔ shi kaa ukpɛnyi nzu la ŋɔ mu kwuwo ungwu ungyi ŋɔ, uwufo ba la ŋɔ mu kwuwo ungwu ɔzu ŋɔ ɔnuwu ŋɔ bi ŋɔ mu kagyi unga inzumbɛku ŋɔ.>>38Ɔzhizɔsi ba za mba te, <<Lunyi lu yitu kiya ingyi bɔkɔ lu yi mu indama le mo. Lunyi lu do inyashi imama mbala mi? kyamate lu wo embyi kyaa mbala mi mu kagɔ kakpɛnyi nana lu do idu iyimo mu inyashi imama mbala mi, kyamate o wo nzu obatisima mu inyashi tayi?>>39Umba ba o gba opwu te, <<Ki do yi iwomo.>>Ɔzhizɔsi a za mba te, <<Lu wo embi mu ago ikpɛnyi mbala mi kego,o wo yi obatisima kyamate oo wo mi obatisma awu.40iŋɔma mu kwuwo ungwungyi mi mbala ungwɔzu mi ba, mi shi le mo. Riyi ngyɛlɛ akwu ingyi bɔkɔ Ukpo a nɔngɔ la enzu umba bɔkɔ a ŋa mba le.>>41Tabɔkɔ Wavɔngɔkiya umba Ɔzhizɔsi wewo umba o shimo awu o pwa iso ɛlɛ, o wo amba mbala Ozhemisi mbala Ɔzhɔnu.42Akwɛyi Ɔzhizɔsi a ya mba ma lɛɛbi, akwɛyi a za mba te, <<Lu yitu te asu umba enzu umba bɔkɔ akwu umba Azhu mo, o zɔ mba idomo, akwɛyi enzu umbakwu mba ba o so mbo iyi bɔkɔ umba lo wo.>>43Li yi tayi meka yi mo. Onzu uwu a gyi te lakwu onzu uwakwu mekeka yi de lakwu umɛgba yi,44onzu uwu a gyi te lakwu uwu kwonze meka yi ba, mɛga aakwu unye yi lɛɛbi.45Moo Umɛ uwu Onzu e bo te lo gbo wu rinye mo, uwu gba e bo te le gbo rinye la enzu le kaa le shi kwunyɔ wu lakwu sa enzu gyɔɔ ma le.>>
Ɔzhizɔsi E Bo Obatimiyɔ Upeyi Ofya Ma
46Mizhikembo iyi ɛnyi, Ɔzhizɔsi mbala Wavɔngɔkiya wu o ka mu Ozheriko. Kwuye ungwu bɔkɔ Ɔzhizɔsi mbala Wavɔngɔkiya wu mbala enzu riba riba o ŋɔ lafya la kwuse kwɔngu, akwɛyi upeyi uwufo uwu o ya wu te Obatimiyɔ (iluma iyi ɛnyi wu gba akwu, Umɛ uwu Ɔtimiyɔ) awu, a ŋɔma mu kenzu unga ɔgwuzɛ aa nda kwoya.47tabɔkɔ a pwa te Ɔzhizɔsi uwu Ɔnazarɛti gba e yi mu ikakama le, akwɛyi e le wo mu opwu itarama te, <<Ɔzhizɔsi, Umɛ uwu Odevidi, ma eyembembyi mi!>>48Enzu gyɔɔ o kpa wu ɛyi te la kpala kenzu wu mo! Upeyi ele ba a kpakpɛɛ mu opwu itarama bi te, <<Umɛ uwu Odevidi, ma eyembembyi mi!>>49Akwɛyi Ɔzhizɔsi a rima akwɛyi a zɔ te, <<La lu za la onzu awu te le bo.>>Akwɛyi o ka o ko ya upeyi ele ma, o za wu te, <<Ki wiyi mo! Yimo ka rima! Ɔzhizɔsi e ye ŋɔ mu iyama.>>50Akwɛyi upeyi ele e to origa wu pyo, akwɛyi e yimo efyefya, akwɛyi a ka mba Ɔzhizɔsi.51Akwɛyi Ɔzhizɔsi e yo wu te, <<Kimbe bɔkɔ ŋɔ gyi te la mi wo ŋɔ?>>
Akwɛyi upeyi ele a gba opwu te, <<U zɔ kiya, mi gyi te la mi ma ɛbɛ.>>52Akwɛyi Ɔzhizɔsi a za wu te, <<Sheyimo, moo ofya ŋa u bomo-o kwuwongu ŋɔ kwu idu fulo.>> Kɛlɛlɛ akwɛyi upeyi ele e le mu ɛbɛ imama , ba e le mu Ɔzhizɔsi imbwaluma mu ɔguzɛ.
The Word for the World International