IBURU8
Ɔzhizɔsi Akwu Oboshi Nzu Uwakɔ
1Iso lɛɛbi iyi bɔkɔ ki yi mu isomo gba akwu tee ki yi Oboshi Uwakɔ, uwu bɔkɔ a ŋɔma mu kwuwo ungwungyi ungwu ukpa uwɛsu uwu Ukpo moshi.2Ee wo ɛduma iyi Oboshi uwakɔ mu riyi ingyi ki ka kɛrikɛri le, mu kwunu shɛ ungwu bɔkɔ Ɔkwu gba a la le, moo akwu onzu gba a la le mo.3Oboshi uwakɔ uwunawuna o ŋa wu kaa le shi rɛshi mbala isabɔ iyi izɔfyi la Ukpo, kwuwo kwɔlɛ akwu mega te Oboshi uwakɔ nzu le yi kiya ingyi bɔkɔ ee shi tete.4Gba le degbo mu kwudu kwɔlɛ, la ba kwu obwoshi mo ndii, kwuwongu ebwoshi o yi mbaa bɔkɔ oo wo rɛshi mate bɔkɔ ɛrama iyi Azhu i zɔ te lo wo awu.5Ɛduma iyi bɔkɔ umba o wo akwu u wɔ mbala kwundu ungwu apula iyi bɔkɔ i yi moshi tayi. I yi mate bɔkɔ Ukpo e so Omosisi tayi. Kwuye ungwu bɔkɔ a gyi te le mbo Kwunu ungwu Ukpo awu, Ukpo a za wu tee, <<Wo ekpasu ŋɔ kaa wo ingyinangyina ka mbwalu iyi bɔkɔ mi zɔ ŋɔ mu lɔwa awu.>>6Kekelele ba, Ukpo e shi Ɔzhizɔsi ɛduma iyi ebwoshi iyi bɔkɔ i ka iya mba ma, mate bɔkɔ kenzu igyirima unga bɔkɔ e wo mɔgɔ uwu Ukpo mbala enzu awu ka shiri le, kwuwongu o bɔ nga mu iso i shi mɛzhi iyi apula iyi bɔkɔ ishi ka le.7Moo gba kenzu igyirima unga ekyi la ke yi ɔnyɛnyɛ byi, ba la ki byi yi ugɔ uwu unga epo kɛlɛ fo.8Ukpo ba a ma ikpa mɛzhi mba kwuyengwu bɔkɔ a zɔ tee: <<Ɔkwu a zɔ tee,afyi i yi mu inyɔma,iyi bɔkɔ mii gyiri kenzu ma unga epo mbala enzu umba Izirɛ ikyo mbala enzu umba Ozhuda.9Kenzu igyirima kɛlɛ ka ŋe yi mate unga bɔkɔ mi wo mbala umba asɔkwu mba awu mokwuyengwu bɔkɔ mi wa mba ma mu ɛzhi iyi Izhipiti awu.Kwuwongwu o mbwalu kenzu igyirima unga bɔkɔ Mi wo mbala mba kyoriri mo awu,akwɛyi Imi ba mi shi kwɔlu mbaa mba fo.10Ɔkwu a zɔ tee,afyi iyi i byi nyɔ awu,kɛlɛ gba akwu kenzu igyirima unga mii wo mbala enzu umba Izurɛ le tee:Imi mii shi ɛrama mi mu egbo mboakwɛyi mi ka yi ma mu akɔ mba.Imi mii kwu Ukpo mbo,umba ba ɔɔ kwu enzu mi.11Akwu mega tee onzu a zɔ onzu uwu kwuse wunaa umanyi wu tee,<Yitu iyi Ɔkwu> fo.Moo enzu lɛɛbi o yitu mi,ina mu ɛmɛshɛrinzhii ba mu enzu umbakɔ.12Moo Imi mii gba la ingbomo mbo mii kpambami gba mi lolo ingbomo mbo fo.>>13Tabɔkɔ e siso meka iyi kenzu igyirima ungepo, Ukpo e shi unga kwonze kanga akwu ungekyi; akwɛyi kiya ingyinangyina ingyi bɔkɔ akwu ingyekyi ba ki sɛma akwɛyi kii tomo.The Word for the World International