Ogalatiya5
1Okrasi a wanzu ma mu rinye ingyi ɛrama imbwaluma te ka la ki gba ki kwu enye mba ɛrama fo. Kwuwo kwɔngu la lu rima kpakiri, la lu gba lu shi ɛyi la rinye ingyi ɛrama imbwaluma fo.2Yese! Lalu ngbɛ alu ka lu pwa iso mi, Ɔpɔlu. Gba lu nyama ɔ zɛ yi ɛsɔ ma, i zɔ te lukwu undu Ɔzhizɔsi e kpo kwuwo yi le, akwu shaa.3Imi la mi so yi kpɔ te, onzu uwu a nyama o zɛ wu ɛsɔ ma, mɛga a nyɔlɔ ɛrama iyi bɔkɔ i shi mo awu lɛɛbi.4Onzu uwunawuna uwu bɔkɔ e to te ɛsɔ izɛma gba i shi Ukpo a na wu le, de ba le yitu te a ka ɛnwu ma mbala Okrasi-e. Lu lafya la esheshi iyi Ukpo o.5Kinzu ba mu ekpasu iyi Kwundu uwu Ukpo, ki yi idu fafa ki rigbo la ototo uwu Ukpo e so e shi mɛzhi te ee shi nzu ɔnuwu kwɔnyi kwɔlɛ.6Kinzu wa mbwalu Ɔzhizɔsi Okrasi, la ɛsɔ izɛma, la kworiyo akwu kiya kinyinyi meka nzu mo. Kiya ingyi o gyi gba akwu ikwu idu lu fulo mu Ɔzhizɔsi Okrasi iyi bɔkɔ i shi ki pwu idɛnyi iyi esu le.7Lu yi mu Ɔzhizɔsi imbwaluma marimari. Uwe bɔkɔ e kyoro yi mo bɔkɔ lu lafya la ɔgwuzɛ ongbulolo imbwaluma ŋa?8Enzu umba bɔkɔ o gwu yi ekwu ɛlɛ te awu, i ngyi mba Ukpo uwu bɔkɔ a ya yi ma awu mo.9Lalu lolo te gba o kyo <<Otutu owua bwɛɛ mu umbwu oweyina, oweyina awu e yi mo mbwɔrubwɔru.>>10Imi mi shi egbo te Ukpo a mbwa yi ma ka la lu mbwalu iso ɛwa mo. Onzu uwunawuna uwu bɔkɔ e ye yi mu egbo iwo gɛrɛgɛrɛ awu ba, a ma kwuwo ungwu Ukpo.11Ɛmɛnɛ mi, gba anu iyi mi yi mu itama le akwiyi te lo zɛ ɛsɔ ma le, ba kimbe ki shi bɔkɔ Azhu o ye mi mu inyashi ilomo? Gba li yi tayi, ifate anu itama iyi lukwu ndu Okrasi mu kwuwɛyi ka la sa enzu ma lakwu ɛrama ifomo fo lo.12Mi lɛ Ukpo te enzu umba bɔkɔ o ye yi mu egbo ifomo ele, lo zɛ mba ɛsɔ ma akwɛyi lo kyo lo lu api mba ma tete!13Ɛmɛnɛ mi wa mbwalu Ɔzhizɔsi, Ukpo a ya yi ma te ka la lu yi ɔsɛkɛnɛ. Lunyi ba la lu ra la ɔsɛkɛnɛ uwu Ukpo e shi yi ele, ka lu wo apula iyira mo. Lalu gyi esu, la lu mbwa la esu mo.14Ɛrama lɛɛbi o ngbɛyi lesu akwu ikpɛnyi te: << Pwu idɛnyi iyi onzu u nɔ a kpa ŋa kyamate ŋɔ pwu iyi ɛŋɔ tayi.>>15Lunyi ba la lu ngbɛndu kaa lu tutu esu mo mu itumo mbala esu ikyɛma mo.16Iyi mi yi mu isomo gba akwu te, gba lu ra la ɛnwu yi lu shi Kwundu, Ukpo a mbwa yi ma akwɛyi lu wo apula iyira mo.17Kiya ingyi bɔkɔ ɛnwu iyi onzu i gyi, akwu ingyi gba Kwundu uwu Ukpo ba a gyi le mo. Kwundu uwu Ukpo mbala ɛnwu, i to ewa mbala esu iyɔkpɔɔ akwɛyi i shi ŋɔ te wo kiya ingyi bɔkɔ ŋɔ gyi mo.18Gba lu mbwalu iyi Kwundu uwu Ukpo e so yi, lu ŋɔ la ɛrama i yi omosisi fo.19Apula iyira iyi ɛnwu i wo, i zɔ gedegede, iyi gba akwu: iyama, apula iyi kashi iwomo, mbala ɛrara iwomo,20eshi ibyima mbala wɔyɛ, igyi esu mo, ovyo itama, rise, amba umbira, igyi ɛŋɔ, enzu ikama21mbala anya iwomo; atɛ iwomo, mbala ɛrara iyinayina lɛɛbi. Imi mi tu yi mo dɛ-ɛ, tetete mi gba mi so yi kpɔ te, enzu umba bɔkɔ o wo apula ɛlɛ te lɛɛbi, o kyo mu ɛsu irimo iyi Ukpo mo.22Kwundu uwu Ukpo ba ekoko a zɔ: idɛnyi, ɔnyɛ , idu igbomo, idu iyi mo, ari iyeshi, e wo iyeshi, enzu o fulo idu ma wu,23e yi egbo mɛzhi mbala ɛnwu iyimo. Ɛrama iyi bɔkɔ i nyi ma te lo wo apula ɛlɛ mo, i yi mo.24Enzu umba bɔkɔ akwu umba Ɔzhizɔsi Okrasi ba o nyama ka ɛnwu iyi ingbomo ɛlɛ, li to mbo keyi mo.25Kinzu ba kwuwongu Kwundu uwu Ukpo gba e shi nzu kwunyɔ le awu, la ki zɛ luzɛ undu lu she la Kwundu.26La ki zhi esu ma mo, la ki wo rise ingyi esu mo, ba la ki wo ovyo mbala esu mo.
The Word for the World International