2 Opita1

1Imi Ɔsamɔ Opita, mi kwu umɛgba mbala uzilɔ uwu Ɔzhizɔsi Okrasi.
Kwupu kwɔlɛ mi ka mi ka yi lunyi umba bɔkɔ Ukpo e shi yi ikwu idu lu fulo iyeshi kyamate iyanzu kwuwongu ototo uwu Ɔkwu nzu Ɔzhizɔsi Okrasi.
2Kuwongwu bɔkɔ lu yitu iyi Ukpo mbala Ɔkwu nzu Ɔzhizɔsi }Okrasi awu, Ukpo le shi yi esheshi mbala idigbomo duduu.

Iyama Mbala Iŋama Iyi Ukpo

3Ukpo e shi nzu iyinayina iyi bɔkɔ ki gyi kaa la ki wo iyi bɔkɔ i she wu. Ɛlɛ i womo tayi kwuwongu bɔkɔ ki yitu wu, uwu bɔkɔ a ya nzu ma kaa la ki kyo mu inzumbɛku mbala egbo iyeshi wu.4Kwuwongwu apula ɛlɛ, e shi nzu apula iyɛku iyeshi iyi bɔkɔ e siso e shi mɛzhi te ee wo nzu, kaa li wa nzu ma mu apula iyira iyi kwudu kwɔlɛ, akwɛyi luu yi ari kyamate iyi Ukpo tayi.
5Kwuwo ngwɔlɛ la lu kpapyi mu ikwu idu lu fulo yi la lu kyo luzɛ undesheshi, luzɛ undesheshi la lu kyo iyitu;6mu iyitu la lu kyo iyɛyi ma, mu iyɛyi ma la lu kyo idu iyimo; mu idu iyimo la lu kyo iyi iyi Ukpo; 7mu iyi iyi Ukpo la lu kyo igyi esu iyi imɛnɛ; mu igyi esu iyi imɛnɛ la lu kyo idɛnyi ireyi.8Moo gba ɛlɛ te i yi mu ikyomo ma yi, iyitu yi iyi Ɔkwu nzu Ɔzhizɔsi ikɔma akwɛyi ii wa la apula iyeshi kwudu.9Ishi gba onzu uwunawuna uwu bɔkɔ e yi ɛlɛ mo a ma ɛbɛ marimari mo ba e yi mate upeyi tayi, ba a kalakwuleyi te Ɔzhizɔsi a gba la ingbomo wu iyekyi a kpa wu-o.10Kwuwo ngwɔlɛ ɛmɛnɛ mi, la lu gyakpɔ mu ɛlɛ iwomo kaa li zɔ tee Ukpo gba a ŋa yi le. Gba lu wo ɛlɛ, lu kpa mɛzhi gbee mo,11akwɛyi Ukpo aa na yi marimari mbaa bɔkɔ Ɔzhizɔsi Okrasi Ɔkwu nzu e rɛsu wu iyɔkpɔɔ awu.
12Lunyi lu yitu iyi apula ɛlɛ-ɛ ba lu rima agiri mu ɛzɔ iyi ongbulolo iyi bɔkɔ o zɔ yi awu, tetete Imi mi koko mi lolo yi.13Mi mate i fate la mi koko la mi lolo yi ta bɔkɔ mi degbo la reyi bɛnɛ le kaa la lu kalakwuleyi mo,14moo Ɔkwu nzu Ɔzhizɔsi Okrasi a zɔ mi gedegede te mi nda la ikpomo fo.15Kwuwo ngwɔlɛ, mi yi mu ibɔkpɔ te la mi zɔ yi ɛlɛ, ka la gba mi kpomo la lu koko la lu lolo yi lɛɛbi.

Enzu Umba Bɔkɔ O Ma inzumbɛku Iyi Okrasi

16Iso iyi bɔkɔ ki so yi te Ɔzhizɔsi Okrasi Ɔkwu nzu aa gbama la ekpasu wu awu akwu kwoso mo, kinzu ba ki ma inzumbɛku wu meyi nzu.17Moo kwuyengwu bɔkɔ Ukpo Ada e shi wu umwɔ mbala inzumbɛku awu, kinzu ki yi mɔmɔ, opwu uwɔkwuu u wɔ mbaa Ukpo u ka le u zɔ tee,<<Ele akwu Umɛ mi, uwu mi pwu idɛnyi wu; Imi mi mwɔnyɛ wu gyɔɔ.>>18Kinzu umba bɔkɔ ki yi mbala Ɔzhizɔsi Okrasi ki pwa opwu ɔlɛ mafyi nzu, uwu bɔkɔ u wɔ mu lɔwa lɔkɛrikɛri ndɔndu kwuyengwu bɔkɔ Ukpo e siso.
19Kekelele gba ki yitu tee iso iyi bɔkɔ anukenzu o so awu akwu kego ŋa le, lunyi ba la lu ngbɛ alu ɔnyɛnyɛ mu iso ɛlɛ nzhii ba igbama iyi Ɔkwu nzu Ɔzhizɔsi Okrasi. Igbama wu i nya la ɛbɛ kyamate utu uwu eyifumo tayi akwɛyi e yi mate kwulovyo ungwu eyi i lama tayi. Kwuye kwɔngu, ɔyi wu u zɔ yi ɛbɛ mu egbo yi kaa li zɔ yi Ukpo marimari.20Iyi bɔkɔ i ka le gba i yi tee, la lu lolo te, onzu uwunawuna e do te a lu iso iyi Ukpo mu ubwu wu byi mo.21Moo iso iyi bɔkɔ anukenzu o ka, ii ngyi mu kiya ingyi bɔkɔ onzu a gyi byi mo, akwu enzu umba bɔkɔ Kwundu uwu Ukpo e shi mbo ekpasu le gba o ka iso iyi bɔkɔ i ngyi mbaa Ukpo le.

The Word for the World International

https://app.library.bible/content/9bdcb02a06f659e3