2 Ɔkɔrɛtiya2

1Kwuwo ngwɔlɛ gba mi ka mu egbo mi te mi gba mi re munyi yi kaa la mi shi yi ubu ugyi fo le.2Moo akwiyi gba mi shi yi ubu ugyi, uwe bɔkɔ e shi mi mi mwɔnyɛ kpɔ? Akwu lunyi gba mi shi yi ubu ugyi le.3Kwuwo Kwɔngwu gba mi kakwupu mi ka yi le, lunyi umba bɔkɔ i fate la lu kwu ɔnyɛ mi le, mi gyi te kaa la mi fya ubugyi mbala yi kwuye mi bo mo. Moo imi mi yitu te gba mi yi ɔnyɛ, lɛɛbi yi lu yi ɔnyɛ tete.4Egbo mi i tutu mo gyɔɔ bɔkɔ mi ye yi mu kwupu kwɔlɛ ikama la ɛnyɛ le, akwu kwuwongu kaa la mi shi yi ubugyi le mo, akwu te kaa la lu yitu te imi mi pwu idɛnyi yi gyɔɔ.

Igba Yi Kpa La Onzu Uwu E Ngbomo

5Akwiyi gba onzu a ka yi la ubugyi, ubugyi uwayi a ka uwa mi ma. Iso iyi mi so yi ele mi kyo yi mo mo.6Inyashi iyi bɔkɔ enzu riba o lo wu awu i kpo wo kya.7Kwuwo kwɔlɛ la lu gba yi kpa wu akwɛyi la lu yi wu lu kpa midu kaa ubu ugyi la ngbɛ wu ma mo.8Mii kpa yi ɛshɛku te la lu wo kaa onzu awu le yitu te lu pwu idɛnyi wu.9Mi ka yi kwupu kwɔngu kaa la mi pwa yi ma le, shi lu mbwalu iso mi naa lu mbwalu mo ŋa.10Akwiyi gba lu gba la ingbomo lu kpa onzu uwunawuna, imi mi gba yi mi kpa wu tete. Akwiyi gba mi gba yi kpa wu kwuwo yi, akwu kwuwongu Ɔzhizɔsi Okrasi,11kwuwongu kaa onzu uwoyi la shiri nzu ma mo. Moo ki yitu iyi ɔrɔ wu.

Aka Itama Iyi Ɔpɔlu Mu Otorowa

12Kwuye ungwu bɔkɔ mi fye mu Oturowa kaa la mi tanu iyi ilɔ iyesheshi iyi Okrasi, akwɛyi mi ma te Ɔkwu nzu a wu mi ɔgwuzɛ ma.13Tabɔkɔ mi ma umɛnɛ mi Ɔtayitɔ mɔmɔ mo awu, idu i gbo mi mo mo akwɛyi mi wo mbo ungbo akwɛyi mi ka mu Omasedoniya.
14Ukpo gba ki gbɛlɛ wu ɛnyi le kwuwongu bɔkɔ e shi nzu kaa la ki kpa mbala Ɔzhizɔsi Okrasi kaa la ki mwɔnyɛ mbala umba bɔkɔ o byi ma mu ewa, akwɛyi e shi iyitu iyawu kaa li zɛ ma nzu kaa li fye munamuna la umbwɔ ferere kyamate oturare tayi.15Ukpo a ra nzu e wo kyamate kiya ingyi umbwɔ ferere ingyi Okrasi la enzu umba bɔkɔ o sa mba ma mbala umba bɔkɔ o yi mu itomo.16Mbaa enzu umba ingbomo, ki yi kyamate kiya ingyi umbwɔ fuu umbu lukwu tayi, mbaa enzu umba bɔkɔ o sa mba ma ba ki yi kyamate kiya ingyi umbwɔ ferere umbu kwunyɔ tayi. Uwe bɔkɔ e do ɛlɛ iwomo?17Kinzu ki tanu iyi iso iyi Ukpo kyamate enzu umba bɔkɔ o gyi kwule awu mo, ki zɛ ilɔ iyi Ukpo mu egbo ikpɛnyi kyamate enzu umba bɔkɔ Okrasi a lɔ mba ma tayi.

The Word for the World International

https://app.library.bible/content/9bdcb02a06f659e3