1 Otimoti1
1Imi Ɔpɔlu mu inyama iyi Ukpo mi kwu uzilɔ uwu Okrasi Ɔzhizɔsi usama nzu uwu bɔkɔ ki fulo eyi nzu mawu awu gba mi yi mu kwupu kwɔlɛ ikama ma le.2Kwupu kwɔlɛ mi ka mi ka ŋa Otimoti umɛ mi ureyi kwuwongu ŋɔ nyama la Ɔzhizɔsi :
Mi lɛ Edego-ala mbala Ɔzhizɔsi Okrasi Ɔkwu nzu te la zɔ ŋɔ esheshi mbala eyembembyi wu kaa le shi ŋɔ egbo iyi oloto.
Mi lɛ Edego-ala mbala Ɔzhizɔsi Okrasi Ɔkwu nzu te la zɔ ŋɔ esheshi mbala eyembembyi wu kaa le shi ŋɔ egbo iyi oloto.
Ngbɛndu Mbaa Wa Zɔ Ɛzu Iyi Angba
3Tabɔkɔ mi so ŋɔ kwuyengwu mi ŋi lu ŋɔ afyima kaa mi so mu ɛzhi iyi Omasedoniya awu tee, ŋɔma mu kwuse ungwu Ɛfɛsɔ kaa enzu umba bɔkɔ o zɔ ɛzu iyi angba awu za mba te lo zɔ ɛzu iyi angba ɛlɛ te fo4naa lo shi egbo mbo mbaa esepo iyi angba mbala ɛza iyi ɛdɔ iyi bɔkɔ i bɔma mo. Ɛlɛ i bo la kaambu irimo akwɛyi ɛduma iyi Ukpo iyi wa mbwalu oo wo i re keyi fo.5Uŋɔ so mbo iso ɛlɛ te kaa enzu lo gyesu la egbo iruwu, mu egbo ikpɛnyi mu ikwu idu fulo ongbulolo.6Umbafo o lafya la ɛlɛ akwɛyi o ba yi eza iyi bɔkɔ i yi kwuyi mo.7Umba o gyi te enzu lo yitu mba te umba akwu wa zɔ ɛrama iyi Omosisi, umba ba o zɔngɔma iyi bɔkɔ o yi mu enzu izɔma le mo naa iyi bɔkɔ umba o yi mu kwushi ibɔma te akwu inyi le mo.8Kinzu ki yitu te ɛrama iyi Ukpo i shoshi gba onzu a mbwalu yi marimari.9Kinzu ki gba ki yitu te Ukpo e bo la ɛrama ɛlɛ akwu kwuwongu enzu umba ototo mo, akwu kwuwongu enzu umba o towo iso iyi Ukpo imbwaluma mbala umba bɔkɔ o towo Ukpo mo mbala enzu umba bɔkɔ o wo kyamate Ukpo e yi mo mbala enzu umba ingbomo, mbala umba akɔ iyira mbala umba bɔkɔ o lomo la Ukpo mo mbala umba bɔkɔ o ngbɛ umba ete mbo mbala umba anyi mba ma mbala wa ngbɛ enzu,10mbala enzu wa to kaya mbala anzɔnu wa nɔ mbala anzɔnu mbala enzu umba bɔkɔ o to enzu o yama mbala wa mulo mbala wa zɔ izɔgɔ iyi angba mbala kiya ingyinangyina ingyi bɔkɔ ki zɛ kya mbala iso iyi Ukpo mo.11Iyi bɔkɔ i zɛ kya mbala ilɔ iyeshi iyi inzumbɛku iyi Edego-ala, iyi bɔkɔ Ukpo a ra yi e lo mi mɔwu awu.Ɔpɔlu A Gbɛlɛ Ukpo Ɛnyi Kwuwongwu Esheshi Wu
12Mi gbɛlɛ Ɔkwu nzu Okrasi Ɔzhizɔsi ɛnyi, uwu e shi mi ekpasu, bɔkɔ a nyama la mi akwɛyi a ŋa mi te la mi wo wu ɛduma.13Mekyi mi kwu onzu uwu mi koko mi so iso iyira iyi Okrasi Ɔzhizɔsi mbala u lo wa mbwalu inyashi mbala onzu u wo ovyo, tetete Ukpo ba a ma eyembembyi mi kwuwongu kwuye kwɔngu mi wo yi mu iyitu mi mo ba mi nyama la Ɔzhizɔsi mo.14Ukpo a zɔ mi esheshi wu gyɔɔ akwɛyi e shi mi mi nyama la wu mbala idɛnyi ipwumo iyi enzu iyi bɔkɔ i yi mu Okrasi Ɔzhizɔsi.15Iso ɛlɛ akwu iso ongbulolo iyi i fa te uwewe la nyama la yi te: Okrasi Ɔzhizɔsi e bo mu kwudu kwɔlɛ kaa la sa enzu umba ingbomo ma, imi ba ingbomo mi i ka iyi uwewe mo.16Akwu kwuwo kwɔlɛ gba Okrasi Ɔzhizɔsi a ma eyembembyi mi le, kaa la ra mi, Imi onzu uwu ingbomo u ka le, la zɔ idu iyimo wu gyɔɔ mbaa enzu umba bɔkɔ o bo mbwalu wu kaa lo fya kwunyɔ ungwɔkpɔ.17Mi lɛ Edego-ala, Ɔsu uwɔkpɔɔ, uwu e yi iyɔkpɔ ba o ma wu mo, Ukpo ukpɛnyi, la fya iduma ma mbala inzumbɛku iyɔkpɔ ba ɔkpɔ. Li yi tayi,18Umɛ mi Otimoti, iso iyi mi so ŋɔ te kaa wo le i zɛ kya mbala iso iyi bɔkɔ anukenzu umba Ukpo o so mu reshi ŋɔ tayi, gba ŋɔ mbwalu yi, ŋɔ to ewa ɔnyɛnyɛ kyamate osozha uweshi,19uŋɔ koko kaa fulo egbo mu Ɔzhizɔsi mbala egbo sɛsɛ. Enzu umbafo o towo ɛlɛ ma akwɛyi i shi ikwu idu fulo mbo i kpɛdɔma.20Mekeka iyi enzu mbɔlɛ te gba akwu Amɛniyɔ mbala Alɛkizanda, enzu mbɔlɛ mi ra mba mi lo onzu uwoyi mɔwu kaa la zɔ mba kaa lo so iso iyira iyi Ukpo fo.The Word for the World International