1 John4
Kwundu Ungwoshi Mbala Kwundu Ungwura
1Ɛmɛza mi, la lu nyama byi la iso iyi onzu uwunawuna uwu bɔkɔ a zɔ te e yi Kwundu uwu Ukpo mo, lunyi ba la lu mondo ɛzɔ wu ma dɛ kaa lu ma shi i wɔ mbaa Ukpo, moo anukenzu gyɔɔ umba angba o yi munamuna mu ɛzu izɔma iyi imulo.2Ɔgwuzɛ uwu lu zɔngɔma onzu ma te e yi Kwundu uwu Ukpo gba akwu te: Onzu uwunawuna uwu bɔkɔ a zɔ te Ɔzhizɔsi Okrasi e bo mu kwudu kwɔlɛ mu ɛnwu iyi onzu, onzu awu e yi Kwundu uwu Ukpo.3Onzu uwu ba a zɔ te Ɔzhizɔsi Okrasi e bo mu kwudu kwɔlɛ mu ɛnwu iyi onzu mo, onzu awu e yi Kwundu uwu Ukpo mawu mo. Onzu awu e yi kwundu ungwu ogewa uwu Ɔzhizɔsi Okrasi uwu bɔkɔ lu pwa te e yi mu inyɔma awu, kekelele te e bo-o ba e yi munɛ-ɛ.4Lunyi ɛmɛ mi, ba lu kwu ɛmɛ umba Ukpo, ɛzɔ iyi imulo iyi enzu mbɔlɛ lu towo yi mo kpɛkpɛyi, kwuwongu ekpasu iyi Kwundu uwu Ukpo uwu e yi ma yi awu, i ka ekpasu la iyi onzu uwoyi uwu bɔkɔ e yi mu kwudu kwɔlɛ awu.5Enzu mbamba o kwu enzu umba kwudu kwɔlɛ, kwuwo kwɔngu ɛzɔ mba akwu ɛzɔ iyi enzu umba kwudu kwɔlɛ, enzu umba kwudu kwɔlɛ ba o nyama la ɛzɔ mba.6Kinzu wa zɛ ilɔ ba, ki kwu enzu umba Ukpo, kwuwo kwɔlɛ onzu uwu bɔkɔ e yitu iyi Ukpo ba a nyama la ɛzɔ nzu. Onzu uwu bɔkɔ e kyo mbala enzu umba Ukpo mo ba a nyama la ɛzɔ nzu mo. Ɔlɛ gba akwu ɔgwuzɛ uwu ki zɔngɔma Kwundu ungwu ongbulolo mbala ungwu imulo ma le.Ukpo Akwu Idɛnyi
7Ɛmɛza umba idu mi, la ki pwu idɛnyi iyi esu, kwuwongu idɛnyi i ngyi mbaa Ukpo. Kwuwo kwɔlɛ, gba onzu e pwu idɛnyi iyi enzu, onzu awu akwu umɛ uwu Ukpo, onzu awu e yitu iyi Ukpo.8Onzu uwu bɔkɔ ee pwu idɛnyi mo, e yi Ukpo mo ndii, kwuwongu Ukpo gba akwu idɛnyi le.9Ɔlɛ gba akwu ɔgwuzɛ uwu u zɔ te Ukpo e pwu idɛnyi nzu le: A lɔ Umɛ wu ɛnyi te le bo mu kwudu kwɔlɛ, kaa la ki fya kwunyɔ ungwɔkpɔ munyi wu.10Ɛlɛ gba akwu idɛnyi ireyi le tee: akwu te kinzu gba ki pwu idɛnyi iyi Ukpo le mo, akwu Ukpo gba e pwu idɛnyi nzu le akwɛyi a lɔ umɛ wu kaa le kpomo kwuwongu ingbomo nzu.11Ɛmɛza umba idu mi, ta bɔkɔ Ukpo e pwu idɛnyi nzu gyɔɔ te le, ishoshi te kinzu la ki pwu idɛnyi iyi esu tete.12Onzu uwu bɔkɔ a ma Ukpo dɛ-ɛ e yi mo; gba ki pwu idɛnyi iyi esu, Ukpo ba e yi mbala nzu, i zɔ te idɛnyi i yi mu ɛduma iwomo mate bɔkɔ i fa te li wo mekeka nzu awu.13Kinzu ki yitu te, ki lo mesu kya mbala Ukpo, uwu tete e lo mesu kya mbala nzu kwuwongu e shi nzu Kwundu wu .14Kinzu ki ma, ki gba ki za la enzu tee tegba i yi le, Ukpo a lɔ Umɛ wu ka la sa kwudu kwɔlɛ ma.15Akwiyi gba onzu a nyama te Ɔzhizɔsi akwu Umɛ uwu Ukpo, onzu awu e kyo mbala Ukpo, Ukpo tete e kyo mbala wu.16Kinzu ki yitu, ki gba ki shi egbo te Ukpo e pwu idɛnyi nzu.Ukpo akwu idɛnyi, onzu uwu bɔkɔ e pwu idɛnyi iyi enzu mbala Ukpo, onzu awu e kyo mbala Ukpo, Ukpo tete e kyo mbala wu.17Mu ɛlɛ te gba ki yitu te idɛnyi i wo kiya ingyinangyina ma ma nzu le, kaa la ki wiyi iyi isomo mu idu iyi Ukpo ɔnuwu ombu izɔma mo, kwuwongu kinzu ki yi mate uwu tayi mu kwudu kwɔlɛ.18Idɛnyi i yi iyi mo; idɛnyi iyi Ukpo ba i ra la iyi ma lɛɛbi. Kwuwo kwɔngu, onzu u wiyi ba e yi idɛnyi ireyi mo, moo enzu oo wiyi iyi Ukpo kwuwongu o yitu tee a zɔ mba rɛnu.19Kinzu ki pwu idɛnyi kwuwongu Ukpo e pwu idɛnyi nzu keyi dɛ.20Akwiyi gba onzu a zɔ tee, e yi idɛnyi iyi Ukpo, munɛ ba a gyi rɛnu ingyi umanyi wu u mbwalu mo, onzu awu akwu u mulo. Moo onzu uwu bɔkɔ e pwu idɛnyi iyi umanyi wu u mbwalu mo, onzu awu e do te e pwu idɛnyi iyi Ukpo uwu bɔkɔ a da ma wu dɛ mo.21Ɔkpa uwu bɔkɔ Ukpo e shi nzu le akwu te: Onzu uwu bɔkɔ e pwu idɛnyi iyi Ukpo, akwu mega te le pwu idɛnyi iyi umanyi wu tete.
The Word for the World International