Read تِيطُسْ 3

تِيطُسْ3

أَعْمْلُوا الصَّالَحْ

¹ذَكِّرْ المُؤْمْنِينْ بَاشْ يِخْضْعُوا لِلْحُكَّامْ والنَّاسْ الِّي فِي السُّلْطَة ويْطِيعُوهُمْ، ويْكُونُوا مُسْتْعَدِّينْ بَاشْ يَعْمْلُوا كُلْ مَاهُو صَالَحْ،²ومَا يْسِبُّوا حَتَّى حَدْ ومَا يِتْعَارْكُوا مْعَ حَتَّى حَدْ، آمَا يْكُونُوا طَيْبِينْ يِتْصَرْفُوا مْعَ النَّاسْ الكُلْ بِسْيَاسَة.

³وأَحْنَا زَادَا قْبَلْ كُنَّا بْلَاشْ عْقَلْ، عَاصِينْ، ضَالِّينْ، عَبِيدْ لِشْهَاوِينَا ولْشِيخَاتْنَا، عَايْشِينْ فِي الخُبْثْ والحُسْدْ، مَكْرُوهِينْ ونَكْرْهُوا بْعَضْنَا.⁴آمَا وَقْتِلِّي ظْهُرْ لُطْفْ اللَّهْ الِّي يْنَجِّينَا ومْحَبْتُو لِلْبَشَرْ،⁵نَجَّانَا، مُشْ عْلَى خَاطِرْ حَاجَاتْ بَاهْيَة عْمَلْنَاهَا، آمَا عْلَى خَاطِرْ رَحْمْتُو. نَجَّانَا كِي غْسَلْنَا بِالوِلَادَة الثَّانْيَة وجَدِّدْنَا بِالرُّوحْ القُدُسْ.⁶اللَّهْ حَطْ فِينَا الرُّوحْ القُدُسْ وخَلَّاهْ يْفِيضْ، بْيَسُوعْ المَسِيحْ الِّي يْنَجِّينَا،⁷بَاشْ يِعْتَبِرْنَا صَالْحِينْ بْنِعْمْتُو، ونُورْثُوا الحَيَاةْ الأَبَدِيَّة حَسْبْ الرْجَى الِّي عَنْدْنَا.⁸الكْلَامْ هَاذَا حَقْ، ونْحِبِّكْ تْأَكِّدْ عْلِيهْ، بَاشْ المُؤْمْنِينْ يِجْتَهْدُوا فِي الأَعْمَالْ الصَّالْحَة. وهَاذَا بَاهِي وفِيهْ فَايْدَة لِلنَّاسْ الكُلْ.

⁹آمَا الحْدِيثْ الفَارَغْ، وحْكَايَاتْ النْسَبْ، والعَرْكْ، والنِّقَاشْ عَالشَّرِيعَة أَخْطَاكْ مِنْهَا عْلَى خَاطِرْهَا تْضُرْ ومَا تَنْفَعْشْ.¹⁰ولِّي يِتْسَبِّبْ فِي تَفْرِيقْ النَّاسْ، أَقْطَعْ عَلَاقْتِكْ بِيهْ بَعْدْمَا تْنَبَّهْ عْلِيهْ مَرَّة ومَرْتِينْ،¹¹وكِيمَا تَعْرِفْ، وَاحِدْ كِيمَا هَاذَا ضَايِعْ ومُذْنِبْ وحْكُمْ عْلَى رُوحُو بْرُوحُو.

وْصَايَا لْتِيطُسْ

¹²ووَقْتِلِّي نِبْعَثْلِكْ أَرْتِيمَاسْ وَلَّا تِيخِيكُسْ، أَعْمِلْ مَجْهُودِكْ بَاشْ تْجِينِي لْنِيكُوبُولِيسْ عْلَى خَاطِرْنِي قَرِّرْتْ بِشْ نْعَدِّي الشْتَاء غَادِي.¹³عَاوِنْ زِينَاسْ المُحَامِي وأَبُلُّوسْ عْلَى قَدْ مَا تَقْدِرْ بَاشْ يْحَضْرُوا رْوَاحْهُمْ لِلسْفَرْ ومَا يُنْقُصْهُمْ حَتَّى شَيْ.¹⁴وجْمَاعِتْنَا المُؤْمْنِينْ يِلْزِمْهُمْ يِتْعَلْمُوا كِيفَاشْ يِجْتَهْدُوا فِي أَعْمَالْ صَالْحَة بَاشْ يْوَفْرُوا الحَاجَاتْ الضَّرُورِيَّة، وهَكَّا مَا تْكُونِشْ حْيَاتْهُمْ بْلَا مَنْفْعَة.

¹⁵يْسَلْمُوا عْلِيكْ الِّي مْعَايَا الكُلْ. سَلِّمْ عْلَى احْبَابْنَا فِي الإِيمَانْ. والنِّعْمَة تْكُونْ مْعَاكُمْ الكُلْ.