Read الرُّؤْيَا 3

الرُّؤْيَا3

رِسَالَة لِكْنِيسِةْ سَارْدِسْ

¹«وإِكْتِبْ لْمَلَاكْ الكْنِيسَة الِّي فِي سَارْدِسْ: "هَاذَا شْنُوَّة يْقُولْ الِّي لِيهْ أَرْوَاحْ اللَّهْ السَّبْعَة والنْجُومْ السَّبْعَة: آنَا نَعْرِفْ أَعْمَالِكْ. إِنْتِ حَيْ بِالإِسْمْ آمَا رَاكْ فِي الحْقِيقَة مِيِّتْ.²فِيقْ، وقَوِّي الِّي مَزَّالْ حَيْ فِيكْ، قْبَلْ مَا يْكَمِّلْ يْمُوتْ. عْلَى خَاطِرْ لْقِيتْ أَعْمَالِكْ مَاهِيشْ كَامْلَة قُدَّامْ إِلَاهِي.³تْذَكِّرْ الِّي تْعَلَّمْتُو وسْمَعْتُو مِنْ قْبَلْ، وشِدْ صْحِيحْ فِي الحَاجَاتْ هَاذِي الِّي أَمَّنْتْ بِيهَا وتُوبْ. رَاهُو كَانْ مَا تْكُونِشْ فَايِقْ، نْجِيكْ كِيمَا يْجِي السَّارِقْ، ومَاكِشْ بِشْ تَعْرِفْ السَّاعَة الِّي بِشْ نْجِيكْ فِيهَا.⁴آمَا عَنْدِكْ شْوَيَّة نَاسْ فِي سَارْدِسْ مَا مَسْخُوشْ حْوَايِجْهُمْ، بِشْ يِمْشِيوْ مْعَايَا، لَابْسِينْ حْوَايِجْ بْيُضْ عْلَى خَاطِرْهُمْ يِسْتَاهْلُوا.⁵الِّي يِغْلِبْ، بِشْ يِلْبِسْ لِبْسَة بِيضَة، ومَا نْفَسَّخْلُوشْ إِسْمُو مِنْ كْتَابْ الحَيَاةْ، وبِشْ نَعْتَرِفْ بْإِسْمُو قُدَّامْ بَابَا وقُدَّامْ مْلَايِكْتُو.⁶الِّي عَنْدُو وِذْنِينْ تِسْمَعْ خَلِّيهْ يِسْمَعْ آشْ يْقُولْ الرُّوحْ لِلْكْنَايِسْ".

رِسَالَة لِكْنِيسِةْ فِيلَادِلْفْيَا

⁷«وإِكْتِبْ لْمَلَاكْ الكْنِيسَة فِي فِيلَادِلْفْيَا: "هَاذَا شْنُوَّة يْقُولْ القُدُّوسْ، الحَقْ، الِّي عَنْدُو مِفْتَاحْ دَاوِدْ، الِّي كِي يْحِلْ مَا يْنَجِّمْ حَدْ يْسَكِّرْ، وكِي يْسَكِّرْ مَا يْنَجِّمْ حَدْ يْحِلْ:⁸آنَا نَعْرِفْ أَعْمَالِكْ. ورَغْمِلِّي مَا عَنْدِكْشْ بَرْشَة قُوَّة، سْمَعْتْ كْلَامِي ومَا نْكَرْتِشْ فِي إِسْمِي. هَاذَاكَا عَلَاشْ حَلِّيتْلِكْ بَابْ مَا يْنَجِّمْ حَدْ يْسَكْرُو.⁹آمَا الِّي هُومَا مِنْ مَجْمَعْ إِبْلِيسْ، ومْسَمِّينْ رْوَاحْهُمْ يْهُودْ وهُومَا يِكْذْبُوا، بِشْ نْخَلِّيهُمْ يْجِيوْ ويِسْجْدُوا قُدَّامْ سَاقِيكْ، ويَعْرْفُوا الِّي آنَا حَبِّيتِكْ.¹⁰وعْلَى خَاطْرِكْ حْفَظْتْ كْلَامِي وصْبَرْتْ، بِشْ نِحْمِيكْ فِي سَاعِةْ المِحْنَة الِّي بِشْ تْجِي عَالعَالِمْ الكُلْ، وتْكُونْ إِمْتِحَانْ لِلنَّاسْ الكُلْ.¹¹هَانِي جَايْ عْلَى قْرِيبْ، شِدْ صْحِيحْ فِلِّي عَنْدِكْ، بَاشْ حَتَّى حَدْ مَا يْفُكْلِكْ تَاجِكْ.¹²الِّي يِغْلِبْ نْرُدُّو عُرْصَة فِي هَيْكِلْ إِلَاهِي، وعُمْرُو مَا يُخْرُجْ مِنُّو. ونُنْقُشْ عْلِيهْ إِسْمْ إِلَاهِي وإِسْمْ مْدِينِةْ إِلَاهِي، الِّي هِيَّ أُورْشَلِيمْ الجْدِيدَة الِّي إِلَاهِي بِشْ يْهَبَّطْهَا مِالسْمَاء. ولِّي يِغْلِبْ بِشْ نُنْقُشْ عْلِيهْ إِسْمِي الجْدِيدْ زَادَا.¹³الِّي عَنْدُو وِذْنِينْ تِسْمَعْ خَلِّيهْ يِسْمَعْ آشْ يْقُولْ الرُّوحْ لِلْكْنَايِسْ!".

رِسَالَة لِكْنِيسِةْ لَاوْدُكِيَّة

¹⁴«وإِكْتِبْ لْمَلَاكْ الكْنِيسَة فِي لَاوْدُكِيَّة: "هَاذَا شْنُوَّة يْقُولْ الآمِينْ، الشَّاهِدْ الأَمِينْ الصَّادِقْ، الِّي مِنُّو جَاء الِّي خَلْقُو اللَّهْ الكُلْ:¹⁵آنَا نَعْرِفْ أَعْمَالِكْ، ونَعْرِفْ الِّي إِنْتِ لَاكْ بَارِدْ ولَاكْ سْخُونْ، ويَا لِيتِكْ جِيتْ بَارِدْ وَلَّا سْخُونْ!¹⁶وعْلَى خَاطْرِكْ لَاكْ بَارِدْ ولَاكْ سْخُونْ، بِشْ نِتْقَيَّاكْ مِنْ فُمِّي.¹⁷إِنْتِ تْقُولْ: آنَا غْنِي ولَابَاسْ عْلِيَّا ومَا نِحْتَاجْ لْشَيْ. ومَاكْشْ عَارِفْ الِّي إِنْتِ تَعِيسْ ومِسْكِينْ وفْقِيرْ وأَعْمَى وعِرْيَانْ.¹⁸هَاذَاكَا عْلَاشْ نَنْصْحِكْ تِشْرِي مِنْ عِنْدِي ذْهَبْ مْصَفِّي بِالنَّارْ بَاشْ تِسْتَغْنَى بِالحَقْ، ولِبْسَة بِيضَة تِلْبِسْهَا تُسْتُرْ عْرَاكْ الِّي يْحَشِّمْ، وكْحُلْ تْكَحِّلْ بِيهْ عِينِيكْ بَاشْ تْوَلِّي تْشُوفْ.

¹⁹«"رَانِي الِّي نْحِبُّو نْلُومْ عْلِيهْ ونْأَدْبُو، مَالَا كُونْ مِتْحَمِّسْ وتُوبْ.²⁰هَانِي وَاقِفْ قُدَّامْ البَابْ ونْدُقْ، إِذَا كَانْ وَاحِدْ سْمَعْ صُوتِي وحَلْ البَابْ، نُدْخُلْ بَحْذَاهْ ونِتْعَشَّى مْعَاهْ وهُوَّ يِتْعَشَّى مْعَايَا.²¹الِّي يِغْلِبْ بِشْ نْقَعْدُو مْعَايَا عْلَى عَرْشِي، كِيمَا غْلِبْتْ آنَا وقْعَدْتْ مْعَ بَابَا عْلَى عَرْشُو.²²الِّي عَنْدُو وِذْنِينْ تِسْمَعْ خَلِّيهْ يِسْمَعْ آشْ يْقُولْ الرُّوحْ لِلْكْنَايِسْ"».