Baca يُوحَنَّا 13

يُوحَنَّا13

يَسُوعْ يَغْسِلْ سَاقِينْ تْلَامِذْتُو

¹قْبَلْ عِيدْ الفِصْحْ، يَسُوعْ الِّي كَانْ يَعْرِفْ إِنُّو سَاعْتُو جَاتْ بَاشْ يِمْشِي مِالدِّنْيَا هَاذِي لِلْآبْ، حَبْ الِّي تَابْعِينُو فِي الدِّنْيَا هَاذِي، حَبْهُمْ لْأَقْصَى دَرْجَة.²ووَقْتِلِّي كَانْ يِتْعَشَّى مْعَ تْلَامِذْتُو، إِبْلِيسْ كَانْ حَاطِطْ فِي قَلْبْ يَهُوذَا وِلْدْ سِمْعَانْ الإِسْخَرْيُوطِي إِنُّو يْخُونُو.³ويَسُوعْ كَانْ يَعْرِفْ الِّي الآبْ عْطَاهْ سُلْطَة عْلَى كُلْ شَيْ، وإِنُّو جَاء مِنْ عَنْدْ اللَّهْ وبِشْ يِرْجَعْ لِلَّهْ.⁴وَلَّا قَامْ عَالعْشَاء، ونَحَّى بَرْنُوسُو، وخْذَا مَنْشْفَة واتْحَزِّمْ بِيهَا،⁵وصَبْ مَاء فِي بَانُو، وبْدَا يَغْسِلْ فِي سَاقِينْ التْلَامْذَة ويْنَشِّفْ فِيهُمْ بِالمَنْشْفَة المِتْحَزِّمْ بِيهَا.⁶وَقْتِلِّي وْصُلْ لْسِمْعَانْ بُطْرُسْ، قَالُّو سِمْعَانْ: «يَاسِيدِي، إِنْتِ تَغْسَلِّي سَاقَيَّا؟».⁷جَاوْبُو يَسُوعْ: «إِنْتِ تَوَّا مَاكِشْ فَاهِمْ آشْ قَاعِدْ نَعْمِلْ، آمَا تَوْ تِفْهِمْ مْبَعِّدْ».⁸قَالُّو بُطْرُسْ: «مُسْتَحِيلْ تَغْسِلِّي سَاقَيَّا». جَاوْبُو يَسُوعْ: «إِذَا مَا نَغْسِلِّكْشْ سَاقِيكْ مُشْ بِشْ تْكُونْ فَمَّة حَاجَة تُرْبْطِكْ بِيَّا».⁹يَاخِي قَالُّو سِمْعَانْ بُطْرُسْ: «مَالَا يَا سِيدِي، مُشْ كَانْ سَاقَيَّا بَرْكْ، آمَا يْدَيَّا ورَاسِي زَادَا».¹⁰قَالُّو يَسُوعْ: «الِّي يَغْسِلْ بَدْنُو يْوَلِّي الكُلُّو طَاهِرْ، ومَا يِسْتْحَقْ كَانْ لِغْسِيلْ سَاقِيهْ. إِنْتُومَا طَاهْرِينْ، آمَا مُشْ الكُلْكُمْ».¹¹ويَسُوعْ كَانْ يَعْرِفْ شْكُونْ الِّي بِشْ يْخُونُو. هَاذَاكَا عْلَاشْ قَالْ: «مَاكُمْشْ الكُلْكُمْ طَاهْرِينْ».

¹²وبَعْدْمَا غْسَلِّلْهُمْ سَاقِيهُمْ، لْبِسْ بَرْنُوسُو ورْجَعْ لِبْلَاصْتُو، وقَالِلْهُمْ: «يَاخِي فَاهْمِينْ الِّي عْمَلْتْهُولْكُمْ؟¹³إِنْتُومَا تْنَادِيوْلِي يَا مُعَلِّمْ ويَا سِيدِي، وعَنْدْكُمْ الحَقْ عْلَى خَاطِرْنِي آنَا مُعَلِّمْ وسَيِّدْ.¹⁴إِذَا كَانْ آنَا المُعَلِّمْ والسَيِّدْ غْسَلْتِلْكُمْ سَاقِيكُمْ، مَالَا إِنْتُومَا زَادَا يِلْزِمْكُمْ تَغْسْلُوا سَاقِينْ بْعَضْكُمْ.¹⁵وهَانِي كُنْتِلْكُمْ مِثَالْ بَاشْ اتَّبْعُوهْ، وتَعْمْلُوا إِنْتُومَا زَادَا كِيمَا عْمَلْتِلْكُمْ.¹⁶الحَقْ الحَقْ نْقُولِلْكُمْ: العَبْدْ مُشْ أَعْظِمْ مِنْ سِيدُو، ولَا المَرْسُولْ أَعْظِمْ مِلِّي بَعْثُو.¹⁷مَادَامْكُمْ عْرَفْتُوا هَاذَا، صَحَّة لِيكُمْ كَانْ اطَّبْقُوهْ.

¹⁸«آنَا مَانِيشْ نَحْكِي عْلِيكُمْ الكُلْ، آنَا نَعْرِفْ الِّي اخْتَرْتْهُمْ. آمَا لَازِمْ يْتِمْ الِّي قَالِتُّو الكْتُبْ المُقَدْسَة: "الِّي كْلَا خُبْزِي، دَارْ عْلِيَّا".

¹⁹«نْقُولِلْكُمْ هَاذَا تَوَّا قْبَلْ مَا يْصِيرْ، بَاشْ وَقْتِلِّي يْصِيرْ تَمْنُوا الِّي آنَا هُوَّ.²⁰الحَقْ الحَقْ نْقُولِلْكُمْ: الِّي يِقْبِلْ الِّي نَبْعْثُو يِقْبِلْنِي، ولِّي يِقْبِلْنِي، يِقْبِلْ الِّي بْعَثْنِي».

يَسُوعْ يِتْنَبَّأْ الِّي يَهُوذَا بِشْ يْخُونُو

²¹وبَعْدْمَا قَالْ يَسُوعْ الكْلَامْ هَاذَا، تْقَلِّقْ وقَالْ: «الحَقْ الحَقْ نْقُولِلْكُمْ: وَاحِدْ مِنْكُمْ بِشْ يْخُونِّي».

²²يَاخِي خَزْرُوا التْلَامْذَة لِبْعَضْهُمْ وهُومَا حَايْرِينْ مُشْ عَارْفِينْ فِي شْكُونْ كَانْ يُقْصُدْ بِكْلَامُو.²³ووَاحِدْ مِالتْلَامْذَة، الِّي يَسُوعْ يْحِبُّو، كَانْ مِتَّكِّي بْجَنْبُو.²⁴هْمِزْلُو سِمْعَانْ بُطْرُسْ بَاشْ يِسْأْلُو فِي شْكُونْ كَانْ يُقْصُدْ.²⁵ومَالْ التِّلْمِيذْ عْلَى صْدِرْ يَسُوعْ وسِأْلُو: «شْكُونُو هُوَّ، يَا سِيدِي؟»²⁶جَاوِبْ يَسُوعْ: «هُوَّ الِّي نْغَطِّسْلُو اللُّقْمَة ونَعْطِيهَالُو!» وغَطِّسْ يَسُوعْ ڨِدْمِةْ الخُبْزْ وعْطَاهَا لْيَهُوذَا وِلْدْ سِمْعَانْ الإِسْخَرْيُوطِي.²⁷وبَعْدْمَا كْلَاهَا دْخَلْ فِيهْ الشِّيطَانْ. يَاخِي قَالُّو يَسُوعْ: «الِّي نَاوِي تَعْمْلُو، أَعْمْلُو فِيسَعْ».²⁸ومَا فْهِمْ حَتَّى وَاحِدْ مِلِّي يِتْعَشَّاوْ مْعَاهْ عْلَاشْ قَالُّو الكْلَامْ هَاذَاكَا.²⁹وعْلَى خَاطِرْ يَهُوذَا كَانْ مَسْؤُولْ عْلَى صَنْدُوقْ الفْلُوسْ، مْشَى فِي بَالْهُمْ الِّي يَسُوعْ وَصَّاهْ بَاشْ يِشْرِي الِّي يِسْتْحَقُّوهْ لِلْعِيدْ، وَلَّا بَاشْ يَعْطِي حَاجَة لِلْفْقَارَى.³⁰وكْلَا يَهُوذَا الڨِدْمَة وخْرَجْ بِالوَقْتْ. وكَانِتْ الدِّنْيَا لِيلْ.

حِبُّوا بْعَضْكُمْ كِيفْ مَا آنَا حَبِّيتْكُمْ

³¹ووَقْتِلِّي خْرَجْ يَهُوذَا قَالْ يَسُوعْ: «تَوَّا تْمَجِّدْ إِبْنْ الإِنْسَانْ، وتْمَجِّدْ اللَّهْ فِيهْ.³²ومَادَامْ اللَّهْ تْمَجِّدْ فِيهْ، رَاهُو اللَّهْ بِيدُو بِشْ يْمَجِّدْ إِبْنْ الإِنْسَانْ زَادَا، وبِشْ يْمَجْدُو عْلَى قْرِيبْ.³³يَا وْلَادِي، آنَا بِشْ نْزِيدْ نَبْقَى مْعَاكُمْ مُدَّة قْصِيرَة. بِشْ تْلَوْجُوا عْلِيَّا، آمَا الِّي قُلْتُو لِلْيْهُودْ نْقُولْهُولْكُمْ إِنْتُومَا تَوَّا: "رَاكُمْ مَا تْنَجْمُوشْ تْجِيوْ لِلْبْلَاصَة الِّي آنَا مَاشِيلْهَا".³⁴نْوَصِّيكُمْ وْصِيَّة جْدِيدَة: حِبُّوا بْعَضْكُمْ. كِيفْ مَا آنَا حَبِّيتْكُمْ إِنْتُومَا زَادَا حِبُّوا بْعَضْكُمْ.³⁵إِذَا كَانْ عَنْدْكُمْ مْحَبَّة لِبْعَضْكُمْ، النَّاسْ الكُلْ بِشْ يَعْرْفُوا الِّي إِنْتُومَا تْلَامِذْتِي».

يَسُوعْ يِتْنَبَّأْ الِّي بُطْرُسْ بِشْ يُنْكْرُو

³⁶قَالُّو سِمْعَانْ بُطْرُسْ: «يَا سِيدِي، إِنْتِ وِينْ مَاشِي؟». جَاوْبُو يَسُوعْ: « تَوَّا مَا تْنَجِّمْشْ اتَّبَّعْنِي لِلْبْلَاصَة الِّي مَاشِيلْهَا، آمَا يْجِيكْ نْهَارْ واتَّبَّعْنِي».³⁷يَاخِي قَالُّو بُطْرُسْ: «يَا سِيدِي، عْلَاشْ مَا انَّجَّمْشْ نْتَبْعِكْ تَوَّا؟ آنَا مُسْتْعَدْ نْمُوتْ عْلَى خَاطْرِكْ».³⁸جَاوْبُو يَسُوعْ: « إِنْتِ مُسْتْعَدْ بَاشْ تْمُوتْ عْلَى خَاطْرِي؟ الحَقْ الحَقْ نْقُلِّكْ: مَا يْصِيحْ السَّرْدُوكْ كَانْ مَا تْكُونْ نْكَرْتْنِي ثْلَاثَة مَرَّاتْ».