Read الرُّؤْيَا 21

الرُّؤْيَا21

سْمَاء جْدِيدَة وأَرْضْ جْدِيدَة

¹ومْبَعِّدْ شُفْتْ سْمَاء جْدِيدَة وأَرْضْ جْدِيدَة، عْلَى خَاطِرْ السْمَاء والأَرْضْ الأُوْلَانِينْ تْنَحَّاوْ والبْحَرْ مَا عَادِشْ مَوْجُودْ،²وشُفْتْ المْدِينَة المُقَدْسَة، الِّي هِيَّ أُورْشَلِيمْ الجْدِيدَة، هَابْطَة مِالسْمَاء مِنْ عَنْدْ اللَّهْ، حَاضْرَة كَايِنْهَا عْرُوسَة تْزَيْنِتْ لَعْرِيسْهَا.³وسْمَعْتْ صُوتْ عَالِي جَايْ مِالعَرْشْ يْقُولْ: «أُخْزْرُوا! تَوَّا اللَّهْ بِشْ يُسْكُنْ مْعَ النَّاسْ. هُوَّ بِشْ يُسْكُنْ مْعَاهُمْ وهُومَا بِشْ يْكُونُوا شَعْبُو. واللَّهْ بِيدُو بِشْ يْكُونْ مْعَاهُمْ ويْكُونْ إِلَاهُّمْ،⁴وبِشْ يِمْسَحْ كُلْ دَمْعَة مِنْ عِينِيهُمْ. ولَا عَادْ فَمَّة لَا مُوتْ لَا حُزْنْ لَا بْكَاءْ ولَا وْجِيعَة، عْلَى خَاطِرْ الأُمُورْ القْدِيمَة الكُلْ تْنَحَّاتْ!».

⁵وقَالْ الِّي قَاعِدْ عَالعَرْشْ: «هَانِي بِشْ نَصْنَعْ كُلْ شَيْ جْدِيدْ». وزَادْ قَالِّي: «إِكْتِبْ، عْلَى خَاطِرْ الِّي نْقُولُو هُوَّ الصِّدْقْ والحَقْ».⁶وقَالِّي: «كْمِلْ كُلْ شَيْ! آنَا الأَلِفْ واليَاءْ، البِدَايَة والنِّهَايَة. آنَا نِرْوِي العُطْشَانْ مِنْ مَنْبَعْ مَاء الحَيَاةْ بْلَاشْ.⁷الِّي يِغْلِبْ، يُورِثْ هَاذَا الكُلْ، وآنَا نْكُونْ إِلَاهُو، وهُوَّ يْكُونْ وِلْدِي.⁸آمَا الجُبَنَاءْ ولِّي مُشْ مُؤْمْنِينْ والفُسَّادْ وقَتَّالِينْ الأَرْوَاحْ والفُجَّارْ والسَّحَّارَة ولِّي يِعْبْدُوا فِي الصْنَبْ والكَذَّابِينْ الكُلْ، بِشْ يْكُونْ مَصِيرْهُمْ البُحَيْرَة الشَّاعْلَة بِالنَّارْ والكِبْرِيتْ. وهَاذَا هُوَّ المُوتْ الثَّانِي».

أُورْشَلِيمْ الجْدِيدَة

⁹ومْبَعِّدْ، جَانِي وَاحِدْ مِالمْلَايْكَة السَّبْعَة الِّي عَنْدْهُمْ السَّبْعَة كِيسَانْ المِلْيَانِينْ بِالسَّبْعَة بْلَاوَاتْ الإِخْرَانِينْ، وقَالِّي: «إِيجَا نْوَرِّيكْ العْرُوسَة، الِّي بِشْ تْكُونْ مَرْتْ الخَرُوفْ».¹⁰هَزْنِي فِي الرُّوحْ لِبْعِيدْ، لِجْبَلْ كْبِيرْ وعَالِي ووَرَّانِي أُورْشَلِيمْ المْدِينَة المُقَدْسَة هَابْطَة مِالسْمَاء مِنْ عَنْدْ اللَّهْ،¹¹تِضْوِي بْمَجْدْ اللَّهْ، وتِلْمَعْ كِي الحْجَرْ الكْرِيمْ وتْشَبَّهْ لِلْيَشْبْ الصَّافِي كِي البِلَّارْ،¹²وفِيهَا سُورْ كْبِيرْ وعَالِي فِيهْ أَثْنَاشِنْ بَابْ، والبِيبَانْ يْعِسْ عْلِيهُمْ أَثْنَاشِنْ مَلَاكْ، ومَكْتُوبْ عْلِيهُمْ أَسَامِي عْرُوشَاتْ إِسْرَائِيلْ الأَثْنَاشْ.¹³وكَانْ فَمَّة ثْلَاثَة بِيبَانْ مِالشَّرْقْ، وثْلَاثَة مِالشَّمَالْ، وثْلَاثَة مِالجَنُوبْ، وثْلَاثَة مِالغَرْبْ.¹⁴وسُورْ المْدِينَة فِيهْ أَثْنَاشِنْ سَاسْ، مَكْتُوبْ عْلِيهُمْ أَسَامِي رُسُلْ الخَرُوفْ الأَثْنَاشْ.

¹⁵والمَلَاكْ الِّي كَلَّمْنِي كَانْ عَنْدُو عْصَا ذْهَبْ، بَاشْ يْقِيسْ بِيهَا المْدِينَة وبِيبَانْهَا وسُورْهَا.¹⁶وكَانِتْ المْدِينَة مْرَبْعَة، كِي طُولْهَا كِي عُرْضْهَا. يَاخِي قَاسْهَا بِالعْصَا ولْقَاهَا قَدْ طُولْهَا قَدْ عُرْضْهَا وقَدْ عِلْوْهَا: 12 000 وِحْدَةْ قْيَاسْ (2 200 كِيلُومَاتِرْ عْلَى حَسْبْ التَّقْرِيبْ)،¹⁷ومْبَعِّدْ قَاسْ السُّورْ مْتَاعْهَا، لْقَاهْ 144 ذْرَاعْ، عْلَى خَاطِرْ المَلَاكْ إِسْتَعْمِلْ مِقْيَاسْ بْطُولْ ذْرَاعْ الإِنْسَانْ.

¹⁸المْدِينَة كَانِتْ مِبْنِيَّة بِالذْهَبْ الخَالِصْ كَايِنُّو بِلَّارْ صَافِي، وسُورْهَا كَانْ مِاليَشْبْ.¹⁹وسَاسَاتْ السُّورْ مْزَيْنِينْ بْأَنْوَاعْ الحْجَرْ الكْرِيمْ الكُلْ: السَّاسْ الأُوِّلْ يَشْبْ، والثَّانِي يَاقُوتْ أَزْرَقْ، والثَّالِثْ عْقِيقْ أَبْيِضْ، والرَّابَعْ زْمُرُّدْ،²⁰والخَامِسْ عْقِيقْ غَامَقْ، والسَّادِسْ عْقِيقْ أَحْمِرْ، والسَّابَعْ زْبَرْجِدْ، والثَّامِنْ جْزَعْ، والتَّاسَعْ يَاقُوتْ أَصْفِرْ، والعَاشِرْ عْقِيقْ أَخْضِرْ، والحْدَاشْ فَيْرُوزْ، والأَثْنَاشْ جَمَشْتْ.

²¹والأَثْنَاشِنْ بَابْ كَانُوا أَثْنَاشِنْ كَعْبَة لُولِي، كُلْ بَابْ مَصْنُوعْ مِنْ كَعْبَة وَحْدَة. وسَاحِةْ المْدِينَة ذْهَبْ صَافِي كِيمَا البِلَّارْ الشَّفَّافْ.

²²ومَا شُفْتِشْ هَيْكِلْ فِي المْدِينَة، عْلَى خَاطِرْ الرَّبْ الإِلَاهْ القَادِرْ عْلَى كُلْ شَيْ والخَرُوفْ هُومَا هَيْكِلْهَا.²³والمْدِينَة مَاهِيشْ مِحْتَاجَة لَا لْضَوْ الشَمْسْ ولَا الڨَمْرَة، عْلَى خَاطِرْ مَجْدْ اللَّهْ يْنَوِّرْهَا، والخَرُوفْ هُوَّ فْنَارِتْهَا.²⁴الأُمَمْ بِشْ يِمْشِيوْ فِي نُورْهَا، ومْلُوكْ الأَرْضْ بِشْ يْجِيبُولْهَا كْنُوزْهُمْ.²⁵وبِيبَانْهَا مَا تِتْسَكَّرْشْ نْهَارْ كَامِلْ، عْلَى خَاطِرْ اللِّيلْ مَا يْجِيهَاشْ!²⁶ويْجِيبُولْهَا كْنُوزْ الأُمَمْ وعِزْهُمْ.²⁷ومَا يُدْخْلِلْهَا حَتَّى شَيْ مَنْجُوسْ، ولَا الِّي يْعِيشُوا فِي النْجَاسَة وَلَا الِّي يِكْذْبُوا، مَا يُدْخْلُولْهَا كَانْ الِّي أَسَامِيهُمْ مَكْتُوبَة فِي كْتَابْ الحَيَاةْ، كْتَابْ الخَرُوفْ.