ອ່ານ مَتَّى 6

مَتَّى6

الصَّدْقَة

¹«رُدُّوا بَالْكُمْ تَعْمْلُوا الخِيرْ الِّي اللَّهْ يُطْلْبُو مِنْكُمْ بْنِيِّةْ إِنُّو النَّاسْ تْشُوفْكُمْ، مَا كَانِشْ مُشْ بِشْ يْكُونْ لِيكُمْ أَجْرْ عَنْدْ بُوكُمْ الِّي فِي السْمَاء.²وَقْتِلِّي تَعْطِي صَدْقَة، مَا تِبْدَاشْ ادُّورْ وتَحْكِي عْلِيهَا كِيمَا يَعْمْلُوا المُنَافْقِينْ فِي المْعَابِدْ والشْوَارَعْ بَاشْ النَّاسْ يِمْدْحُوهُمْ. نْقُلْكُمْ الحَقْ: رَاهُمْ هَكَّا خْذَاوْ أَجْرْهُمْ.³آمَا إِنْتِ، كِي تَعْطِي صَدْقَة مَا تْخَلِّيشْ يِدِّكْ اليْسَارْ تَعْرِفْ آشْ عَمْلِتْ يِدِّكْ اليْمِينْ،⁴بَاشْ الصَّدْقَة مْتَاعِكْ تْكُونْ فِي السِّرْ، وبُوكْ الِّي يْرَى الِّي يْصِيرْ فِي السِّرْ يْجَازِيكْ.

الصْلَاةْ

⁵«ووَقْتِلِّي تْصَلِّيوْ، مَا تْكُونُوشْ كِي المُنَافْقِينْ، الِّي يْحِبُّوا يْصَلِّيوْ وَاقْفِينْ فِي المْعَابِدْ وفِي مَفْرَقْ الشْوَارَعْ الكْبِيرَة بَاشْ النَّاسْ تْشُوفْهُمْ. نْقُلْكُمْ الحَقْ: رَاهُمْ هَكَّا خْذَاوْ أَجْرْهُمْ.⁶آمَا إِنْتِ، وَقْتِلِّي تْصَلِّي، أُدْخُلْ لْبِيتِكْ وسَكِّرْ بَابِكْ وصَلِّي لْبُوكْ الِّي مَا يْرَاهْ حَدْ. وبُوكْ الِّي يْرَى آشْ يْصِيرْ فِي السِّرْ يْجَازِيكْ.

⁷«وكِي تْصَلِّيوْ مَا تُقْعْدُوشْ تْعَاوْدُوا فِي الكْلَامْ بِالفَارَغْ كِيمَا الِّي مَاهُمْشْ يْهُودْ، الِّي مَاشِي فِي بَالْهُمْ إِنُّو اللَّهْ يِسْمَعْهُمْ وَقْتِلِّي يْكَثْرُوا مِالكْلَامْ.⁸مَا تْكُونُوشْ كِيفْهُمْ، عْلَى خَاطِرْ بُوكُمْ يَعْرِفْ شْنُوَّة تِحْتَاجُوا قْبَلْ حَتَّى مَا تُطْلْبُوا مِنُّو.

⁹«وهَاوْ كِيفَاشْ يِلْزِمْكُمْ تْصَلِّيوْ:
يَا بُونَا الِّي فِي السْمَاء،خَلِّي إِسْمِكْ يِتْقَدِّسْ.¹⁰خَلِّي مَمْلَكْتِكْ تْجِي،خَلِّي قَصْدِكْ يْصِيرْ عَالأَرْضْ كِيمَا صَايِرْ فِي السْمَاء.¹¹أَعْطِينَا اليُومْ الخُبْزْ الِّي يْكَفِّينَا.¹²إِغْفْرِلْنَا ذْنُوبْنَا،كِيمَا أَحْنَا نِغْفْرُوا لِلِّي يُغْلْطُوا فِينَا.¹³مَا ادَّخَّلْنَاشْ فِي تَجْرْبَة،آمَا نَجِّينَا مِالشِّرِيرْ.عْلَى خَاطِرْ لِيكْ المُلْكْ والقُوَّة والمَجْدْ،لِلْأَبَدْ. آمِينْ.

¹⁴«وكَانْ غْفَرْتُوا لِلنَّاسْ أَغْلَاطْهُمْ، يِغْفْرِلْكُمْ بُوكُمْ الِّي فِي السْمَاء أَغْلَاطْكُمْ زَادَا.¹⁵آمَا كَانْ مَا تِغْفْرُوشْ لِلنَّاسْ أَغْلَاطْهُمْ، مَا يِغْفْرِلْكُمْشْ بُوكُمْ زَادَا أَغْلَاطْكُمْ.

الصُّومْ

¹⁶«ووَقْتِلِّي تْصُومُوا، مَا تْخَلِّيوِشْ وْجُوهْكُمْ تْبَانْ حْزِينَة كِي المُنَافْقِينْ، الِّي يْكَشْبْرُوا وْجُوهْهُمْ بَاشْ يْوَرِّيوْ لِلنَّاسْ الِّي هُومَا صَايْمِينْ. نْقُلْكُمْ الحَقْ: الِّي يَعْمْلُوا هَكَّا خْذَاوْ أَجْرْهُمْ.¹⁷آمَا إِنْتِ، وَقْتِلِّي تْصِيمْ حُطْ عِطْرْ وأَغْسِلْ وِجْهِكْ،¹⁸بَاشْ مَا تْظَهَّرْشْ لِلنَّاسْ الِّي إِنْتِ صْايِمْ، آمَا بُوكْ الِّي مَا يْرَاهْ حَدْ يْرَاكْ، وبُوكْ الِّي يْرَى آشْ يْصِيرْ فِي السِّرْ يْجَازِيكْ.

إِكْنْزُوا كْنُوزْ فِي السْمَاء

¹⁹«مَا تِكْنْزُوشْ لِرْوَاحْكُمْ كْنُوزْ فِي الأَرْضْ وِينْ يْنَجِّمْ يْفَسَّدْهَا السُّوسْ والصْدِيدْ، ووِينْ يْنَجْمُوا يَحْفْرُوا عْلِيهَا السُّرَّاقْ ويِسْرْقُوهَا.²⁰آمَا إِكْنْزُوا لِرْوَاحْكُمْ كْنُوزْ فِي السْمَاء، وِينْ لَا يْنَجِّمْ يْفَسَّدْهَا لَا السُّوسْ ولَا الصْدِيدْ، ولَا يْنَجْمُوا يَحْفْرُوا عْلِيهَا السُّرَّاقْ ويِسْرْقُوهَا.²¹عْلَى خَاطِرْ وِينْ يْكُونْ كَنْزِكْ يْكُونْ قَلْبِكْ.

²²«العِينْ هِيَّ فْنَارْ البْدَنْ. كَانْ عِينِكْ لَابَاسْ، بَدْنِكْ الكُلْ بِشْ يْكُونْ مْنَوِّرْ.²³آمَا إِذَا كَانْ عِينِكْ شِرِّيرَة، بَدْنِكْ الكُلْ بِشْ يْكُونْ مْظَلِّمْ. إِذَا كَانْ النُّورْ الِّي فِيكْ ظْلَامْ، مَالَا قَدَّاشْ قْوِيْ الظْلَامْ الِّي فِيكْ!

²⁴«حَتَّى وَاحِدْ مَا يْنَجِّمْ يِخْدِمْ زُوزْ أَسْيَادْ، يَا إِمَّا بِشْ يِكْرَهْ وَاحِدْ ويْحِبْ الآخِرْ، وَلَّا بِشْ يْتَبَّعْ وَاحِدْ ويَحْقِرْ الآخِرْ. مَا تْنَجْمُوشْ تِخْدْمُوا اللَّهْ والفْلُوسْ مْعَ بْعَضْهُمْ.

أَسْعَاوْ لْمَمْلَكْةْ اللَّهْ وصَلَاحُو

²⁵«هَاذَاكَا عْلَاشْ نْقُولِلْكُمْ: مَا تْعِيشُوشْ وإِنْتُومَا تْخَمُّوا كَانْ فِي شْنُوَّة بِشْ تَاكْلُوا وشْنُوَّة بِشْ تُشْرْبُوا، ولَا فِي شْنُوَّة بِشْ تِلْبْسُوا. يَاخِي هِيَّ الحَيَاةْ لِلْمَاكْلَة أَكَهَوْ، والبْدَنْ لِلِّبْسَة أَكَهَوْ؟²⁶شُوفُوا العْصَافِرْ كِيفَاشْ لَا تَزْرَعْ ولَا تَحْصِدْ ولَا تْحُطْ فِي مْخَازِنْ، وبُوكُمْ الِّي فِي السْمَاء يُرْزُقْهَا. يَاخِي مُشْ إِنْتُومَا أَهَمْ مِنْهَا إِبَّرْشَة؟²⁷وشْكُونْ فِيكُمْ الِّي كِي يْخَمِّمْ بْزَايِدْ يْنَجِّمْ يْزِيدْ فِي عُمْرُو حَتَّى سَاعَة وَحْدَة؟²⁸وعْلَاشْ تْخَمُّوا بْزَايِدْ فِي اللِّبْسَة؟ ثَبْتُوا فِي نَوَّارْ بُوڨَرْعُونْ كِيفَاشْ يِكْبِرْ، وهُوَّ لَا يِتْعِبْ ولَا يَغْزِلْ.²⁹آمَا آنَا نْقُولِلْكُمْ: حَتَّى المَلِكْ سُلَيْمَانْ فِي عِزُّو مَا لْبِسْشْ كِيفْ وَحْدَة مِنْهُمْ!³⁰إِذَا كَانْ الحْشِيشْ الِّي يِنْبِتْ اليُومْ وغُدْوَة يِتْرْمَى فِي النَّارْ اللَّهْ يْلَبْسُو كِيمَا هَكَّا، مُشْ إِنْتُومَا أَوْلَى إِنُّو يْلَبَّسْكُمْ يَلِّي إِيمَانْكُمْ ضْعِيفْ!³¹هَاذَاكَا عْلَاشْ مَا تُقْعْدُوشْ تْخَمُّوا وتْقُولُوا: "شْنُوَّة بِشْ نَاكْلُوا؟" وَلَّا "شْنُوَّة بِشْ نُشْرْبُوا؟" وَلَّا "شْنُوَّة بِشْ نِلْبْسُوا؟".³²الحَاجَاتْ هَاذِي الكُلْ يِجْرِيوْ وْرَاهَا الِّي مَاهُمْشْ يْهُودْ، آمَا بُوكُمْ الِّي فِي السْمَاء يَعْرِفْ الِّي إِنْتُومَا تَحْتَاجُولْهَا.³³مَالَا أَسْعَاوْ فِي الأُوِّلْ لْمَمْلَكْةْ اللَّهْ وصَلَاحُو، والحَاجَاتْ هَاذِي الكُلْ تَوْ تِتْزَادِلْكُمْ.³⁴مَا تُقْعْدُوشْ تْخَمُّوا فِي غُدْوَة، خَلِّيوْ غُدْوَة كِيفْ يْجِي يْخَمِّمْ عْلَى رُوحُو. كُلْ نْهَارْ يِكْفِيهْ الشَّرْ الِّي فِيهْ.