Read مَتَّى 16

مَتَّى16

الفِرِّيسِيِّينْ والصَّدُّوقِيِّينْ يْجَرْبُوا يَسُوعْ

¹وجَاوَهْ الفِرِّيسِيِّينْ والصَّدُّوقِيِّينْ بَاشْ يْجَرْبُوهْ، وطَلْبُوا مِنُّو بَاشْ يْوَرِّيهُمْ مُعْجْزَة مِالسْمَاء.²يَاخِي جَاوِبْهُمْ يَسُوعْ: «كِي تَبْدَى السْمَاء حَمْرَاء وَقْتْ المُغْرُبْ، تْقُولُوا: "غُدْوَة الطَّقْسْ بِشْ يْجِي بَاهِي".³وكَانْ صَبْحِتْ السْمَاء حَمْرَاء ومْغَيْمَة، تْقُولُوا: "اليُومْ المْطَرْ بِشْ تْصُبْ!". إِنْتُومَا تَعْرْفُوا كِيفَاشْ تْفَسْرُوا مَنْظِرْ السْمَاء، آمَا عَلَامَاتْ الزْمَانْ مَا تَعْرْفُوشْ تْفَسْرُوهَا!⁴جِيلْ شِرِّيرْ وفَاسَقْ يُطْلُبْ فِي مُعْجْزَة، آمَا مَاهِيشْ بِشْ تِتْعْطَالُو كَانْ مُعْجْزِةْ يُونَانْ». وخَلَّاهُمْ ومْشَى.

خْمِيرِةْ الفِرِّيسِيِّينْ والصَّدُّوقِيِّينْ

⁵وكِي وُصْلُوا التْلَامْذَة لِلشَّطْ المْقَابِلْ، ظُهْرُوا نْسَاوْ بَاشْ يْهِزُّوا مْعَاهُمْ خُبْزْ.⁶قَالِلْهُمْ يَسُوعْ: «فِيقُوا، ورُدُّوا بَالْكُمْ مِنْ خْمِيرِةْ الفِرِّيسِيِّينْ والصَّدُّوقِيِّينْ».⁷يَاخِي بْدَاوْ يِتْنَاقْشُوا بِينْ بْعَضْهُمْ ويْقُولُوا: «هَاذَا عْلَى خَاطِرْ مَا عَنْدْنَاشْ خُبْزْ».⁸وعْرَفْ يَسُوعْ فَاشْ يَحْكِيوْ يَاخِي قَالِلْهُمْ: «يَلِّي إِيمَانْكُمْ ضْعِيفْ، عْلَاشْ تِتْنَاقْشُوا وتْقُولُوا: مَا عَنْدْنَاشْ خُبْزْ؟⁹يَاخِي لْتَوَّا لَا فْهِمْتُوا؟ نْسِيتُوا الخَمْسَة خُبْزَاتْ الِّي شَبْعُوا الـ5 000 وقَدَّاشْ مِنْ قُفَّة هَزِّيتُوا مِلِّي فْضُلْ؟¹⁰وَلَّا السَّبْعَة خُبْزَاتْ الِّي شَبّْعِتْ الـ4 000 وقَدَّاشْ مِنْ قُفَّة مْعَبْيَة هَزِّيتُوا؟¹¹كِيفَاشْ مَا فْهِمْتُوشْ الِّي آنَا مَانِيشْ نَحْكِي عَالخُبْزْ كِي قُلْتِلْكُمْ: رُدُّوا بَالْكُمْ مِنْ خْمِيرِةْ الفِرِّيسِيِّينْ والصَّدُّوقِيِّينْ؟».¹²وَقْتْهَا فِهْمُوا التْلَامْذَة الِّي هُوَّ قَالِلْهُمْ رُدُّوا بَالْكُمْ مِنْ تَعْلِيمْ الفِرِّيسِيِّينْ والصَّدُّوقِيِّينْ مُشْ مِنْ خْمِيرِةْ الخُبْزْ.

بُطْرُسْ يِشْهِدْ الِّي يَسُوعْ هُوَّ المَسِيحْ إِبْنْ اللَّهْ الحَيْ

¹³وَقْتِلِّي وْصُلْ يَسُوعْ لْمَنْطَقْةْ قَيْصَرِيِّةْ فِيلِۑُّسْ، سْإِلْ تْلَامِذْتُو: «حَسْبْ رَايْ النَّاسْ شْكُونِي آنَا إِبْنْ الإِنْسَانْ؟».¹⁴جَاوْبُوهْ: «فِيهُمْ شْكُونْ يْقُولْ الِّي إِنْتِ يُوحَنَّا الِّي يْعَمِّدْ، وأُخْرِينْ يْقُولُوا الِّي إِنْتِ إِيلِيَّا، وغِيرْهُمْ يْقُولْ الِّي إِنْتِ إِرْمِيَا وَلَّا وَاحِدْ مِالأَنْبِيَاءْ».¹⁵سْإِلْهُمْ: «وحَسْبْ رَايْكُمْ إِنْتُومَا آنَا شْكُونْ؟».¹⁶جَاوِبْ سِمْعَانْ بُطْرُسْ: «إِنْتِ المَسِيحْ إِبْنْ اللَّهْ الحَيْ».¹⁷قَالُّو يَسُوعْ: «صَحَّة لِيكْ، يَا سِمْعَانْ وِلْدْ يُونَا. الِّي كْشِفْلِكْ الحْقِيقَة هَاذِي مُشْ بَشَرْ، آمَا بَابَا الِّي فِي السْمَاء.¹⁸وآنَا نْقُلِّكْ: إِنْتِ بُطْرُسْ، وعَالحَجْرَة هَاذِي نِبْنِي كْنِيسْتِي، وبِيبَانْ الهَاوْيَة مُشْ بِشْ تَقْوَى عْلِيهَا.¹⁹بِشْ نَعْطِيكْ مْفَاتَحْ مَمْلَكْةْ السْمَاوَاتْ، وكُلْ الِّي تُرْبْطُو فِي الأَرْضْ يْكُونْ مَرْبُوطْ فِي السْمَاء، ولِّي تْحِلُّو فِي الأَرْضْ يْكُونْ مَحْلُولْ فِي السْمَاء».²⁰وبَعْدْهَا نَبَّهْ عْلَى تْلَامِذْتُو بَاشْ مَا يْقُولُوا لْحَدْ الِّي هُوَّ المَسِيحْ.

يَسُوعْ يِتْنَبَّأْ بْمُوتُو وقْيَامْتُو

²¹ومِنْ وَقْتْهَا بْدَا يَسُوعْ يْفَهَّمْ فِي تْلَامِذْتُو الِّي هُوَّ يِلْزْمُو يِمْشِي لْأُورْشَلِيمْ، ويِتْعَذَّبْ عْلَى يْدِينْ الشْيُوخْ وكْبَارْ الكَهَنَة وعُلَمَاءْ الشَّرِيعَة، ويِتْقْتَلْ، وفِي النْهَارْ الثَّالِثْ يْقُومْ.²²وجِبْدُو بُطْرُسْ عْلَى جْنَبْ وبْدَا يْلُومْ عْلِيهْ وقَالُّو: «حَاشَاكْ يَا سِيدِي! هَاذَا مُشْ بِشْ يْصِيرْلِكْ!».²³آمَا يَسُوعْ تْلَفِّتْ لْبُطْرُسْ وقَالُّو: «إِبْعِدْ عْلِيَّا يَا إِبْلِيسْ! إِنْتِ تْعَطِّلْ فِيَّا، عْلَى خَاطْرِكْ تْفَكِّرْ كِيفْ النَّاسْ مُشْ كِيفْ اللَّهْ!».

²⁴وبَعْدْهَا قَالْ يَسُوعْ لِتْلَامِذْتُو: «الِّي يْحِبْ يْتَبَّعْنِي، يِلْزْمُو يُنْكُرْ رُوحُو ويْشَارِكْنِي فِي العْذَابْ والمُوتْ،²⁵عْلَى خَاطِرْ الِّي يْحِبْ يْمَنَّعْ حْيَاتُو يَخْسَرْهَا، ولِّي يَخْسَرْ حْيَاتُو عْلَى خَاطْرِي يَلْقَاهَا.²⁶شْنِيَّة الفَايْدَة كَانْ الإِنْسَانْ يِرْبَحْ العَالِمْ الكُلْ ويَخْسَرْ رُوحُو؟ وشْنِيَّة يْنَجِّمْ يَعْطِي الإِنْسَانْ بَاشْ يِفْدِي رُوحُو؟²⁷عْلَى خَاطِرْ إِبْنْ الإِنْسَانْ بِشْ يْجِي مْعَ مْلَايِكْتُو فِي مَجْدْ بُوهْ، ووَقْتْهَا يْجَازِي كُلْ وَاحِدْ عْلَى حَسْبْ أَعْمَالُو.²⁸نْقُلْكُمْ الحَقْ: فَمَّة شْكُونْ مِالوَاقْفِينْ هْنَا مَاهُمْشْ بِشْ يْذُوقُوا المُوتْ، إِلَّا بَعْدْمَا يْشُوفُوا إِبْنْ الإِنْسَانْ جَايْ فِي مَمْلَكْتُو».