1Garam Farisai mangan binganggan Nikodimus, garam Yuda garam gudzunggan mangan.2Da idziang mangan da arangan iba da Yisu da ini binaꞌ, “Rabai,aga sruꞌ gin i Anutu itangin agu iba ibi kidungwaga. I bida Anutu mamida i ruta garam mangan, da garam arigi wasangꞌ i nanga nam maran mangan bida agu nangan igi u.”3Yisu ini arangan nifunggan mungaꞌ ibiani, “Dzi nani nan nidzun bingan da agu, manga wasangꞌ tsanganda Anutu nanggan mpada tayangꞌ gan garaman bida mamida i tipa apingꞌa arangan suda faꞌ.”4Nikodimus itip igutin ini binaꞌ, “Amaꞌ! Nabutip napingꞌ garam fufidan nasu faꞌ nabianungꞌ? Isangꞌ aranga tipa atangꞌa rinan wangun wasaꞌ da tipa apingꞌa arangan, ma?”5Yisu itip ini da arangan ibiani, “Dzi nani nan nidzun bingan da agu, manga wasangꞌ atangꞌa Anutu nanggan mpada tayangꞌ gan garaman bida mamida apingꞌa arangan suda faꞌ i mpui da Marapayam Mararam.6Nam riniuriats riman da nigi riniuriats. Da nam Marapayam Mararam riman da nigi marapayam rima maran taꞌan.7Anungꞌ runta fafun i nan dzi nidan da agu bida, ‘Agam natip nasu faꞌ nabi mamaꞌ narun rinan apingꞌan.’8Manis irunt isangꞌ gan fadagin da u ringant i gan ririringgan angu, da bitsintaꞌ u wasruꞌ i gan badagin ma gan fadagin u. Da iwaꞌ ibinigi angu i rib Marapayam Mararam rima suda faꞌ.”9Da Nikodimus igutin ini binaꞌ, “Nigi nabuwaꞌ nabianungꞌ?”10Yisu ini i gan nifunggan mungaꞌ ibiani, “Agu garam Israil kidungwaga gan mangan, da ibianungꞌ da agu anungꞌ isruꞌ i nam bida ani?11Dzi nani nan nidzun bingan da agu, aga fis i nam aga tsangandan da sruꞌa gin da aga ni wasi da agam, da bitsintaꞌ agam wau nan aga nida wasi igi iyab u.12Dzi ragi nan da agam i nam intap, da bitsintaꞌ agam wamuaruts u. Da agam bungꞌ abumuaruts dzi nabianungꞌ bida dzi fisa i nam gunungun wasi da agam?13Garam mangan anungꞌ iwarip iyab gunungun u; imaꞌ, Garam Narunggan runtaꞌ angu aru mingꞌa gunungun ruꞌa ba.14Moses iraꞌ i mur maraganun tipa i ain bras iyab gai imingꞌ nam manaꞌ dadauntan, da nabinigi da naraꞌ i Garam Narunggan,15i rib santan aru muarutsa Arangan da bungꞌ awaꞌ da nam mpada ratar ntingan angu.16“I Anutu maran yari i garam intap i sanab bida ani: itangin Narun yampi bitsintaꞌ iba, i rib santan aru muarutsa Arangan da wasangꞌ i rima runggan rai u, da bitsintaꞌ bungꞌ awaꞌ da nam mpada ratar ntingan angu.17Anutu itangin Narunggan igi iba intap i anungꞌ raruda garam intap u, imaꞌ. Itangin iba i rima garam intap sib.18Nugu muarutsa Arangan da anungꞌ imunti nan rarudan wasaꞌ u, da nugu mamida i muarutsa Arangan da impa nam rarudan wasaꞌ sib, i arangan anungꞌ imuaruts Anutu Narun yampi bitsintaꞌ igi u.19Nan rarudan sanaban ibiani, Anutu nanggan puatsadan iba sib intap, da bitsintaꞌ garam intap maran yari i nam mimindan iyus nam puatsadan, i nanggan maisan nangan isu gudzu-fugun i ribarangan.20Garam musa nanga nam maisan ibugin nam puatsadan da wabasu uts rutin u, i arangan irat i nam puatsadan makupis i nanggan maisan wasi.21Da bitsintaꞌ garam atangꞌa warangꞌ i Anutu nanggan nidzun iba mpa nam puatsadan wasaꞌ, i garam santan tsanganda bida arangan inang nam i Anutu nampanggan.”
Yowanis Ruruba Garam Itip Ini Yisu Wasi
22Gubuꞌ fain ifa sib da Yisu irut riban atsungꞌa gin itangin gamp tsiraꞌ Yerusalem rai da ifa intap Yudia gampan isiꞌ fain. Da irut ribarangan impai igi da irurub ampan.23Yowanis ibinigi irurub garam imingꞌ gamp Ainon mingꞌa uts da gamp Salim, i mpui tsiraꞌ imingꞌ nigi. Da ampan ampi bingan imus iba rutin i arangan ruruba ribarangan.24I gubuꞌ arigi da Herot anungꞌ iwarip irim Yowanis i karabus u.25Da nan udzungꞌan da ruan iwaꞌ wasaꞌ i Yowanis riban atsungꞌa gin da garam Yuda bits iyab i sanab adzuꞌa ruan i nanga wangun sapan mingꞌa Anutu maranggan.26Da tuasarangan iba da Yowanis da ini rutin ibiani, “Rabai, garam u ruta mpruꞌa ruam mingꞌa mpui Yordan marafain, da u nida nan wasi gin ugu, aitsangan, arangan irurub garam da aruani, da rib ampi bingan ifan da arangan.”27Yowanis ini tuasarangan nifunggan mungaꞌ ibiani, “Bida Anutu mpada gunungun mamida i rima nam mangan da garam mangan, da arangan wasangꞌ nanga nam igi u.28Agam runggam iringantin sib i nan dzi nida bida ani, ‘Dzi Kristus wayu, da bitsintaꞌ Anutu itangin dzi imungꞌ iba i Arangan.’29Bida garam mangan uda finin, da sagat igi su garam igi fininggan rururungan; anungꞌ garam mangan gan u. Da garam bintsudan igi rinunggan imunti da iringant i arangan nifunggan da nugun itsiaꞌ nidzun angu i arangan. I wain arigi da dzi nugungꞌ itsiaꞌ iyus da aruani.30Arangan binganggan nayab da dzi binganggangꞌ naruꞌ.”31Garam mingꞌa wagungꞌ badan ugu iyus garam gar sib angu. Garam gar intap ani yatsungꞌ sanab intap da ini nan intap ani angu gan. Da bitsintaꞌ garam mingꞌa gunungun badan ugu iyus ampan sib angu.32Arangan ikupis nam Arangan tsangandan da ringanta gin wasi, da bitsintaꞌ manga wau nan kupisan igi iyab u.33Da bida manga uda Arangan nanggan igi yaban da muarutsan, da isantingꞌ ibi Anutu nanggan igi nan nidzun.34I garam aru Anutu tanginda badan ugu ini Anutu nanggan wasi da garam, i Anutu itangin Marapayam Mararam ifungꞌ isisungꞌ Arangan sib.35Da Raman maran yari nidzun angu i Narun igi da irim nam sib angu i Arangan banginggan.36Manga muarutsa Narun igi da bungꞌ awaꞌ da nam mpada ratar ntingan. Da manga mamida i atangꞌa warangꞌ i Narun igi nanggan wasangꞌ waꞌan da nam mpada maran taꞌan u, da bitsintaꞌ Anutu nugu tsakia gan rubungꞌ amingꞌ da arangan.