Kpo Jemi19
Asafo ɔ nyaa ngɛ hiɔwe
1Enɛ ɔ se ɔ, i nu nihi babauu a ngmlaa kpami he ngɛ hiɔwe ke, “Haleluya! Nyɛ je Nutsɔ ɔ yi! Yi wami hemi maa je wa Mawu ɔ ngɔ. E nɔ́ ji anunyami kɛ he wami.2Ejakaa e kojomi ɔmɛ da nɛ a ji anɔkuale. E gbla yo ajuama kpanaku ɔ nɛ puɛ zugba a nɔ kɛ ajuama bɔmi ɔ tue, nɛ e wo e tsɔli ɔmɛ nɛ a gbe ɔ he hiɔ.”3A ngɛ ngmlaa a kpae be fɛɛ be ke, “Nyɛ je Nutsɔ ɔ yi! Yo ɔ nɛ ngla a la su ku ɔ maa kuɔ kɛ ya hiɔwe daa kɛ daa!”4Kɛkɛ nɛ nikɔtɔmahi nyingmi enyɔ kɛ eywiɛ ɔ kɛ hɛ kali eywiɛ ɔmɛ kpla si nɛ a ja Mawu, nɔ nɛ hii si ngɛ matsɛ sɛ ɔ nɔ ɔ, nɛ a de ke, “Amen! Haleluya! Nyɛ je Mawu yi!”5Nɛ gbi ko je matsɛ sɛ ɔ mi de ke, “Nyɛ je wa Mawu ɔ yi, nyɛ e sɔmɔli ɔmɛ kulaa, nyɛ nimli guhi kɛ nimli nguahi tsuo nɛ yee lɛ gbeye ɔ.”6Jehanɛ ɔ, i nu nɔ́ ko he ekohu kaa nimli babauu nɛ ngɛ ngmlaa kpae, loo wohi lafa a oslɔkehi nɛ ba ngɛ kue ngɛ wo dɔ mi, loo kaa hiɔwe simi ngua ko ke, “Nyɛ je Nutsɔ ɔ yi! Ejakaa Nutsɔ wa Mawu Ope ɔ ngɛ matsɛ yee.7Nyɛ ha nɛ wa bua nɛ jɔ nɛ wa nya nɛ waa wo e hɛ mi nyami. Ejakaa Tobi ɔ yo kpeemi be ɔ su, nɛ e ayɛflo ɔ dla e he gbe nya.8A ha lɛ he blɔ nɛ e wo tade futa nɛ he tsɔ, nɛ e ji bo kpakpa tade.” Bo kpakpa a daa si kɛ ha Mawu nimli ɔmɛ a ni kpakpa peemi ɔmɛ.9Nɛ bɔfo ɔ de mi ke, “Ngmaa munyu nɛ ɔ; A jɔɔ nihi nɛ a kpee mɛ kɛ ba Tobi ɔ yo kpeemi okplɔɔ ɔ he ɔ!” Nɛ e tsa nɔ nɛ e de ke, “Mawu nitsɛ nɛ e tu munyu nɛ ɔ nɛ.”10Kɛkɛ nɛ i kpla si ngɛ e nane nya nɛ ma ja lɛ. Se e de mi ke, “Dabi! Mo ko pee! Ejakaa Mawu sɔmɔlɔ ji mi kaa bɔ nɛ o ngɛ ɔ, kɛ bɔ nɛ o nyɛmimɛ Kristo se nyɛɛli ɔmɛ ngɛ ɔ, nihi nɛ ye a hemi kɛ yemi ngɛ Yesu mi ɔ he odase ɔ. Nɛ gbami ɔmɛ kulaa kɛ níhi kulaa nɛ i je ngɔ tsɔɔ mo nɛ ɔ, Yesu he munyu nɛ a ngɛ tue.”Matsɛmɛ a Matsɛ
11Jehanɛ ɔ, i na nɛ a bli hiɔwe nya, nɛ i na okpɔngɔ futa ko nɛ daa si ngɛ lejɛ ɔ. Nɔ nɛ hii si ngɛ okpɔngɔ ɔ nɔ ɔ biɛ ji “Anɔkualetsɛ kɛ Dalɔ.” Lɛ ji nɔ nɛ kojoɔ ngɛ dami nya nɛ e jeɔ ta.12E hɛ ngmɛhi tsuɔ kaa la, nɛ e bu matsɛ pɛɛhi babauu. A ngma biɛ ko ngɛ e hɛ nya, nɛ lɛ pɛ ji nɔ nɛ le e sisi.13E wo tade nɛ a kɛ wo muɔ mi, nɛ e biɛ ji “Mawu Munyu ɔ.”14Hiɔwe ta hwuli nɛ wo afɛu bo kpakpa tade hiɔhi nɛ he tsɔ nyɛɛ e se ngɛ okpɔngɔ hiɔhi a nɔ.15Nɛ ta yami ha nɛ nya ba saminya ngɛ e nya he nɛ e ma kɛ kpata ma amɛ a hɛ mi. E ma kpaka mɛ kɛ dade, nɛ e maa naa wai ngami nɔ́ ɔ, nɛ ji Mawu Ope ɔ mi mi fumi nɛ nya wa a nɔ.16A ngma ngɛ e tade ɔ kɛ e fiɔ nɔ ke, “Matsɛmɛ a Matsɛ kɛ Nutsɔmɛ a Nutsɔ.”17Jehanɛ ɔ, i na bɔfo ko nɛ daa si ngɛ pu ɔ nɔ, nɛ e ngɛ ngmlaa kpae wawɛɛ kɛ ngɛ lohwe pɛlitsɛ ɔmɛ tsɛe ke, “Nyɛɛ ba! Nyɛ ba bua nyɛ he nya kɛ ha Mawu Ope ɔ gbɔkuɛ niye ni ɔ!18Nyɛɛ ba nɛ nyɛ ba ye matsɛmɛ a he lo kɛ asafoatsɛmɛ kɛ tatsɛ nguahi, okpɔngɔhi kɛ a nɔ hili kɛ adesahi tsuo, nimli nguahi kɛ nimli guhi, nyɔguɛhi kɛ odehehi a he lo.”19Jehanɛ ɔ, i na Lohwe musutsɛ ɔ nɛ e ngɛ zugba a nɔ matsɛmɛ kɛ a ta hwuli tsuo a nya buae, nɛ a kɛ nɔ nɛ hii si ngɛ okpɔngɔ ɔ nɔ kɛ e ta hwuli ɔmɛ nɛ a hwu ta.20Nɛ a nu Lohwe musutsɛ ɔ kɛ nyangɔ gbalɔ ɔ, nɔ nɛ peeɔ nyakpɛ ni nguahi ngɛ Lohwe musutsɛ ɔ hɛ mi nɛ e kɛ mlɔɔ nihi kulaa nɛ hɛɛ Lohwe musutsɛ ɔ he okadi, kɛ nihi nɛ ja e amaga a. Nɛ a sake mɛ nihi enyɔ ɔmɛ tsuo hɛ ngmengmle kɛ fɔ La Taku nɛ ngɛ tsoe glegleegle ɔ mi.21Nɛ a kpata a ta hwuli ɔmɛ tsuo a hɛ mi kɛ ta yami ha nɛ nya ba a, nɛ ngɛ okpɔngɔ futa nɔ hilɔ ɔ nya he ɔ. Nɛ hiɔwe lohwe pɛlitsɛhi ye a lo nɛ a tɔ.Biblica, Inc.